[Kley Kley News] - ការសាងសង់ផ្លូវជាតិលេខ៥ មានប៉ុន្មានកំណាត់?
2018-03-27
Go to the website published Kley Kley News
ការស្ថាបនាផ្លូវជាតិលេខ៥ ដែលពង្រីកពី២គន្លង ទៅ៤គន្លងគឺមាន៥កំណាត់រួមមាន៖ ១. ភ្នំពេញ-ព្រែកក្តាម ២. ព្រែកក្តាម-ធ្លាម្អម ៣. ធ្លាម្អម-បាត់ដំបង ៤. បាត់ដំបង-សិរីសោភ័ណ និង៥. ពីសិរីសោភ័ណ្ឌ ទៅប៉ោយប៉ែត (ព្រំដែនកម្ពុជា-ថៃ)។
សម្តេចនាយករដ្ឋមន្រ្តី ហ៊ុន សែន បានលើកឡើងក្នុងពិធីបើកការដ្ឋានកំណាត់ផ្លូវពីបាត់ដំបង ទៅក្រុងសិរីសោភ័ណកាលពីព្រឹកថ្ងៃទី២៦ ខែមីនា ឆ្នាំ២០១៨ថា ផ្លូវពីភ្នំពេញទៅព្រែកក្តាម ត្រូវបានសាងសង់បញ្ចប់ហើយ ដោយឡែកផ្លូវពីព្រែកក្តាម ទៅដល់ព្រំដែនកម្ពុជា-ថៃ គឺជប៉ុនជាអ្នកផ្តល់ជំនួយសម្រាប់ការសាងសង់។
សូមជម្រាបថា គម្រោងសាងសង់កំណាត់ផ្លូវជាតិលេខ៥ ដំណាក់កាលទី១ ចាប់ពីបាត់ដំបង ទៅសិរីសោភ័ណ ខេត្តបន្ទាយមានជ័យ មានប្រវែង ៨៤,៧៤គីឡូម៉ែត្រ ចំណាយថវិកាជាង ១៨៥លានដុល្លារ។ ការសាងសង់គឺមានរយៈពេល ៣៦ខែ ចាប់ផ្តើមពីខែកុម្ភៈ ឆ្នាំ២០១៧ និងគ្រោងបញ្ចប់នៅខែមីនា ឆ្នាំ២០២០។
គួររម្លឹកថា កាលពីថ្ងៃទី១០ ខែមករា ឆ្នាំ២០១៨ ក្រសួងសាធារណការ បានចុះហត្ថលេខាជាមួយក្រុមហ៊ុនជប៉ុន លើគម្រោងធ្វើឲ្យប្រសើរឡើងវិញនូវកំណាត់ផ្លូវជាតិលេខ៥ ពីព្រែកក្តាម ទៅធ្លាម្អម ខេត្តពោធិ៍សាត់ ប្រវែង ១៣៥,២៥គីឡូម៉ែត្រ។ ការសាងសង់កំណាត់ផ្លូវនេះ ត្រូវចំណាយ ២៤៦,៣៥លានដុល្លារ ដោយប្រើរយៈពេល៤ឆ្នាំ។ សម្តេច ហ៊ុន សែន នឹងអញ្ជើញបើកការដ្ឋានសាងសង់កំណាត់ផ្លូវដែលជាដំណាក់កាលទី២នេះ នៅខែឧសភាខាងមុខ។
ដោយឡែកកំណាត់ផ្លូវជាតិលេខ៥ ចាប់ពីធ្លាម្អមដល់បាត់ដំបង និងកំណាត់ផ្លូវពីសិរីសោភ័ណ ទៅប៉ោយប៉ែត ប្រវែងសរុប ១៤៩គីឡូម៉ែត្រ ត្រូវបានសម្តេចនាយករដ្ឋមន្រ្តីបញ្ជាក់ថា គឺជាដំណាក់កាលសាងសង់ក្នុងផ្នែកកណ្តាល (ផ្នែកទី៣) និងផ្នែកបញ្ចប់។ ដូច្នេះផ្លូវពីភ្នំពេញ ដល់ប៉ោយប៉ែត (ព្រំដែនកម្ពុជា-ថៃ) គឺមានប្រវែងសរុប ៤០០គីឡូម៉ែត្រ។
ក្រសួងសាធារណការ ឲ្យដឹងថា ផ្លូវជាតិលេខ៥ គឺជាផ្លូវយុទ្ធសាស្ត្រយ៉ាងសំខាន់ ជាផ្លូវអាស៊ានហាយវេលេខ១ ហើយក៏ជាផ្លូវរបៀងសេដ្ឋកិច្ចកើត-លិចទី២ដ៏មានសក្ដានុពល សម្រាប់ប្រកួតប្រជែងពាណិជ្ជកម្ម ទេសចរណ៍ ភស្តុភារកម្ម វិនិយោគ និងសេដ្ឋកិច្ចនៃមហាតំបន់មេគង្គ GMS ដែលតភ្ជាប់រវាង បាកក-ភ្នំពេញ-ហូជីមិញ៕
