[Rasmei Kampuchea Daily News] - ក្រុមការងារចុះជួយឃុំពើក បើកការដ្ឋានជួសជុលផ្លូវ ជិតបីពាន់ម៉ែត្រ
ដោយៈ យោធិន / កណ្តាលៈ នៅថ្ងៃទី១ ខែឧសភា ឆ្នាំ២០២២ លោក សែម សុវណ្ណនី សមាជិក គណៈកម្មាធិការកណ្តាល គណបក្សប្រជាជនកម្ពុជា និងជាប្រធានក្រុមការងារ គណបក្សប្រជាជនកម្ពុជា ចុះមូលដ្ឋានឃុំពើក ស្រុកអង្គស្នួល ខេត្តកណ្តាល បានអញ្ជើញជាអធិបតី ក្នុងការបើកការដ្ឋានជួសជុលផ្លូវលំ ប្រវែងប្រមាណជិត ៣ ពាន់ម៉ែត្រ សំដៅអបអរទិវាពលកម្មអន្តរជាតិ ព្រមទាំងជួបសំណេះសំណាលជាមួយ ប្រជាពលរដ្ឋ ប្រមាណ ១ ពាន់នាក់ នៅក្នុងភូមិត្រពាំងភូមិ ឃុំពើក ស្រុកអង្គស្នួល ខេត្តកណ្តាល។
លោក សែម សុវណ្ណនី បានលើកឡើថាៈ បើយើងធ្វើការប្រៀបធៀប ពីអតីតកាល ជាមួយនឹងបច្ចុប្បន្ន គឺមានការខុសគ្នាច្រើនណាស់ នៅក្នុងរបបខ្មែរក្រហម ដឹកនាំប្រទេសជាង ៣ ឆ្នាំ ធ្វើឱ្យប្រទេសកម្ពុជា គ្មានសល់អ្វីទាំងអស់ គឺរបប ប៉ុល ពត បានបំផ្លាញអស់គ្មានសល់ និងកាប់សម្លាប់ប្រជាពលរដ្ឋ អស់ប្រមាណជាង ៣ លាននាក់។ ប៉ុន្តែក្រោយថ្ងៃរំដោះ ដែលមានសម្តេចតេជោ ហ៊ុន សែន ជាស្ថាបនិកសន្តិភាព បានដឹកនាំប្រទេស អោយមានការរីកចំរើន យ៉ាងខ្លាំង លើគ្រប់វិស័យ។
ដោយឡែក ជាក់ស្តែង នៅថ្ងៃនេះ ប្រជាពលរដ្ឋជិត ១ ពាន់នាក់ មកចូលរួមកម្មវិធីសំណេះ សំណាល មានអ្នកជិះកង់តែ ៦ នាក់ប៉ុណ្ណោះ ដោយសារពួកគាត់ ជាមនុស្សចាស់ មិនចេះជិះម៉ូតូ ក្រៅពីនោះ គឺសុទ្ធតែជិះម៉ូតូហុងដា សេ១២៥ និង រថយន្ត។ សភាពបែបនេះនេះ សរបញ្ជាក់ ឱ្យឃើញថា ប្រជាពលរដ្ឋយើង មានជីវភាពធូរធារគ្រប់ៗគ្នា ហើយជាក់ស្តែង បច្ចុប្បន្ននេះ នៅក្នុង ១ គ្រួសារ យ៉ាងហោចណាស់ ក៏មានម៉ូតូ១គ្រឿងដែរ។
លោក សែម សុវណ្ណនី បានបញ្ជាក់ថាៈ បច្ចុប្បន្ន នៅក្នុងមូលដ្ឋាន ឃុំពើកទាំងមូល គឺមានរោង ចក្រ រហូតដល់ចំនួន ៣២ ដែលមានកម្មករ កម្មការិនី ជាច្រើនម៉ឺននាក់ បាននិងកំពុងធ្វើការ។
លោក សែម សុវណ្ណនី បានបញ្ជាក់ទៀតថាៈ កត្តាសន្តិភាពនេះហើយ ធ្វើអោយសេដ្ឋកិច្ច និងជីវភាពប្រចាំថ្ងៃ គ្រួសារ មានការកើនឡើង ជាលំដាប់ ។
លោក សែម សុវណ្ណនី បានវាយតម្លៃខ្ពស់ ពីកម្រិតជីវភាពរស់នៅរបស់ក្រុមគ្រួសារនីមួយៗ ក្នុងទូទាំងមូលដ្ឋានឃុំពើក រួមមានលំនៅដ្ឋានរបស់បងប្អូនប្រជាពលរដ្ឋ ភាគច្រើន សង់ពីថ្ម ដោយបានផ្លាស់ប្តូរទាំងស្រុង នូវផ្ទះ និងខ្ទមប្រក់ស្លឹក។
បច្ចុប្បន្ននេះ ស្លឹកត្រូវបានប្រើប្រាស់ ក្នុងការប្រក់ក្រោលគោវិញ។ នេះបើតាមការលើកឡើង ក្នុងពិធីសំណេះសំណាល ពីសំណាក់បងប្អូនប្រជាជន ឃុំពើក។ ទន្ទឹមនេះដែរ បងប្អូនមូលដ្ឋាន ខាងលើនេះ ក៏បានប្រកាសឱ្យដឹងថាៈ បច្ចុប្បន្ននេះ ក្នុងទូទាំងឃុំពើក នៅសល់មានទូរទស្សន៍ ស-ខ្មៅ តែមួយគ្រឿងគត់ ដែលត្រូវបានគេទុកចោល កៀនជញ្ជាំង ដោយប្តូរមកប្រើប្រាស់ ទូរទស្សន៍ ពណ៌ធម្មជាតិវិញ។
ក្នុងសម័យកាល ដែលប្រទេសជាតិ មានសន្តិភាពពេញលេញ នាលបច្ចុប្បន្ននេះ ស្ថានភាពជីវភាព រស់នៅ ក៏ដូចជា សម្ភារៈប្រើប្រាស់ ក៏ត្រូវបានវិវឌ្ឍន៍ផ្លាស់ប្តូរ ទាំងស្រុងផងដែរ តួយ៉ាងដូចជា រទេះគោ រទេះសេះ លែងបានប្រទះឃើញទៀតហើយ ដោយជំនួសមកវិញ ដោយរ៉ឺម៉កម៉ូតូ និងរថយន្តតូចធំ បើកបរច្រវាត់។ បើតាមការលើកឡើងពី សំណាក់បងប្អូន ប្រជាជនមូលដ្ឋាន ខាងលើនេះ សូម្បីតែចង្កៀង ខ្លាញ់ត្រី ប្រេងកាត ក៏ត្រូវបានប្តូរផ្លាស់ មកជាចង្កៀងអំពូលអគ្គិសនីផងដែរ។
សូមបញ្ជាក់ផងដែរថាៈ ចំពោះផ្លូវប្រវែងជិត ៣ គីឡូម៉ែត្រ ដែលត្រូវចាប់ផ្តើមជួសជុល នៅថ្ងៃ នេះ គឺបានបំរើសេវា ការដឹកជញ្ជូនកសិផលរបស់ពលរដ្ឋ ទៅកាន់ទីផ្សារ យ៉ាងងាយស្រួល។ ជាមួយគ្នា ចំពោះហេដ្ឋារចនាសម្ព័ន្ធ ក្នុងឃុំពើក បានស្ថាបនារួចជាច្រើនខ្សែ ដែលជាផ្លូវបេតុង និងបានដាក់អំពូលសូឡា តាមផ្លូវ ក្នុងភូមិទាំង១៩ នៃឃុំពើក ក្នុងប្រវែងផ្លូវជាង ២០ គីឡូម៉ែត្រ។
ក្នុងពិធីសំណេះសំណាល នៅថ្ងៃនេះដែរ ប្រធានក្រុមការងារគណបក្សប្រជាជនកម្ពុជា ក៏បានចែកជូនបងប្អូនប្រជាជន ដែលបានចូលរួម ក្នុងកម្មវិធី ម្នាក់ៗអំណោយសារុង១ និងថវិកា ១ម៉ឺនរៀល ព្រមទាំងឧបត្ថម្ភដល់កម្លាំងប្រដាប់អាវុធ ៣ ប្រភេទ និងប្រជាការពារ និងចំណាយ ផ្សេងទៀត សរុបជាថវិកាជិត ៣៧ លានរៀល៕/V.mara
