ជប៉ុន៖ នាយករដ្ឋមន្រ្តីជប៉ុន ជម្រាបសម្តេចតេជោ ថា ជប៉ុនបន្តគាំទ្រក្នុងការអភិវឌ្ឍកំពង់ផែទឹកជ្រៅនៅខេត្តព្រះសីហនុ ដើម្បីចូលរួមចំណែកអភិវឌ្ឍន៍ប្រទេសកម្ពុជា និងបន្តការផ្តល់ជំនួយសម្បទាន ក្នុងការអភិវឌ្ឍកំពង់ផែ។ នេះជាការលើកឡើងរបស់លោកនាយករដ្ឋមន្រ្តីជប៉ុន ក្នុងឱកាសជួបពិភាក្សាការងារជាមួយសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជានាថ្ងៃទី២៣ មេសា ឆ្នាំ២០២២នេះនៅប្រទេសជប៉ុន។ នៅក្នុងជំនូប នាយករដ្ឋមន្ត្រីជប៉ុន លោក ហ្វូមីអូ គីស៊ីដា បានបញ្ជាក់ថា ទំនាក់ទំនងកិច្ចសហប្រតិបត្តិ ការនៃប្រទេសទាំងពីរ កម្ពុជា-ជប៉ុន មានការរីកចំរើនឡើង ពិសេសវិស័យសន្តិសុខ និងលើវិស័យការពារជាតិ ជាមួយនឹងការបណ្តុះបណ្តាលធនធានមនុស្ស នៃកងរក្សាសន្តិភាព ក្រោមឆ័ត្រអង្គការសហប្រជាតិ។ លោក ក៏បានអរគុណកម្ពុជា ដែលអនុញ្ញាត និងទទួលនាវាជើងទឹករបស់ជប៉ុនមកកាន់កម្ពុជានាពេលកន្លងទៅ ដែលចូលរួមចំណែកជួយពង្រឹងទំនាក់ទំនងលើវិស័យការពារជាតិនៃប្រទេសទាំងពីរ។ លោក គីស៊ីដា បានប្រកាសបន្តគាំទ្រក្នុងការអភិវឌ្ឍកំពង់ផែទឹកជ្រៅនៅខេត្តព្រះសីហនុ ដើម្បីចូលរួមចំណែកអភិវឌ្ឍប្រទេសកម្ពុជា និងបន្តការផ្តល់ជំនួយសម្បទាន ក្នុងការអភិវឌ្ឍកំពង់ផែ។ សម្តេចតេជោ ហ៊ុន សែន សង្ឃឹមថា ជប៉ុននឹងបន្តជួយដល់កម្ពុជា ក្នុងកិច្ចសហការលើការប្រពន្ធ័ស្រោចស្រព និងទឹកស្អាតនៅប្រទេសកម្ពុជា។ សម្តេចតេជោ ហ៊ុន សែន បន្ថែម កម្ពុជា នឹងបន្តធ្វើការងារលើវិស័យការពារជាតិជាមួយប្រទេសជប៉ុនបន្ថែមទៀត សំដៅជំរុញកិច្ចសហប្រតិបត្តិការទ្វេភាគីនៃប្រទេសទាំងពីរ។ សម្តេចតេជោ បញ្ជាក់ថា កម្ពុជា នឹងបន្តស្វាគមន័នាវាជើងទឹកជប៉ុន មកទស្សនកិច្ច និងចូលចត នៅកំពង់ផែរបស់កម្ពុជា។ សម្តេចតេជោ បញ្ជាក់ថា ការអភិវឌ្ឍកំពង់ផែទឹកជ្រៅនៅខេត្តព្រះសីហនុ នឹងជួយបង្កើនល្បឿននៃការអភិវឌ្ឍសេដ្ឋកិច្ច និងការជំរុញការនាំចេញផលិតផល កសិផលរបស់កម្ពុជាទៅទីផ្សារអន្តរជាតិ និងការនាំចូលពីក្រៅប្រទេស ដោយមិនពឹងផ្អែកកំពង់ផែនៃប្រទេសនានាក្នុងតំបន់នោះទេ។ សម្តេចតេជោ បានស្នើឲ្យទំនាក់ទំនងទ្វេភាគីពីដៃគូយុទ្ធសាស្ត្រទៅជាដៃគូយុទ្ធសាស្ត្រគ្រប់ជ្រុងជ្រោយកម្ពុជា-ជប៉ុននៅពេលខាងមុខនេះ ។ លោកនាយករដ្ឋមន្រ្តីជប៉ុន បានទទួលយកគំនិតផ្តួចផ្តើមរបស់សម្តេច ក្នុងតម្លើងទំនាក់ទំនង ទ្វេភាគីនេះផងដែរ។ ចំពោះសភាពនៅមីយ៉ាន់ម៉ា លោកនាយករដ្ឋមន្ត្រីជប៉ុន នៅតែបន្តកិច្ចសហការជា មួយរាជរដ្ឋាភិបាលកម្ពុជា និងបន្តគាំទ្រកម្ពុជា ក្នុងនាមប្រធានអាស៊ាន ដែលបាន ជំរុញលើការដោះស្រាយកិច្ចការនេះ ជាមួយនឹងការបន្តធ្វើការជាមួយគ្នាលើ បញ្ហាឧបទ្វីបកូរ៉េ និងបញ្ហាវិបត្តិនៅអ៊ុយក្រែនផងដែរ៕ អត្ថបទ៖លោក ហ៊ន សុភ័ក្រ