ក្រសួងសាធារណការ និងដឹកជញ្ជូន រៀបចំវគ្គបណ្តុះបណ្តាលស្តីពីការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ និងបែបបទនៃការរៀបចំលិខិតរដ្ឋបាលដល់មន្ត្រីនៃគ្រប់អង្គភាពថវិកា និងមន្ត្រីប្រមូលចំណូល នៅតាមស្ថានីយជញ្ជីង ខេត្តសៀមរាប៖ ថ្ងៃពុធ ៤រោច ខែចេត្រ ឆ្នាំខាល ចត្វាស័ក ព.ស. ២៥៦៥ ត្រូវនឹង ថ្ងៃទី២០ ខែមេសា ឆ្នាំ២០២២ ឯកឧត្តម ស៊ឹង សុគង់ អនុរដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជា អធិបតីក្នុងពិធីបើកវគ្គបណ្តុះ បណ្តាលស្តីពីការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ និងបែបបទនៃ ការរៀបចំលិខិតរដ្ឋបាលដល់មន្ត្រីនៃគ្រប់អង្គភាពថវិកា និងមន្ត្រីប្រមូលចំណូលនៅតាមស្ថានីយជញ្ជីង សរុបប្រមាណ១០០នាក់ ដោយមានការចូលរួមធ្វើបទ បង្ហាញពីគ្រូបង្គោលមកពីក្រសួងសេដ្ឋកិច្ច និង ហិរញ្ញវត្ថុ និងក្រសួងសាធារណការ និងដឹកជញ្ជូនផងដែរ។ ថ្លែងក្នុងសុន្ទរកថាបើកកម្មវិធី ឯកឧត្តមអនុរដ្ឋលេខាធិការបានថ្លែងអំណរគុណយ៉ាងជ្រាលជ្រៅចំពោះ ក្រសួងសេដ្ឋកិច្ច និងហិរញ្ញវត្ថុ ដែលបានសហការជាមួយក្រសួងសាធារណការ និងដឹកជញ្ជូនក្នុងការ រៀបចំវគ្គបណ្តុះបណ្តាលនេះឡើង។ ជាមួយគ្នានោះផងដែរ ឯកឧត្តមអនុរដ្ឋលេខាធិការ បានគូសបញ្ជាក់ពីសារសំខាន់នៃការងារគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ ដែលត្រូវផ្តោតការយកចិត្តទុកដាក់ និងតម្រូវឱ្យមានការគ្រប់គ្រងមួយប្រកប ដោយគុណភាព និងដែលអាចជឿទុកចិត្តបាន និងបានសង្កត់ធ្ងន់ថា៖ បញ្ជីសារពើភណ្ឌគឺជារបាយ ការណ៍អំពីទ្រព្យសម្បត្តិ ដែលត្រូវបានបែងចែកជាបួនប្រភេទគឺ៖ ១) ដី និងអគារ ២) បរិក្ខារបច្ចេកទេស ៣) រថយន្ត និងគ្រឿងចក្រ និង៤) សម្ភារៈ និងសង្ហារឹម ដែលទាមទារឱ្យមានការគ្រប់គ្រងប្រកបដោយការទទួលខុសត្រូវ ប្រសិទ្ធភាព តម្លាភាព គណនេយ្យភាព និងភាពច្បាស់លាស់។ ឯកឧត្តមអនុរដ្ឋលេខាធិការ ក៏បានជម្រាបជូនផងដែរថា៖ ការអនុវត្តកម្មវិធីការកែទម្រង់ការគ្រប់គ្រងហិរញ្ញ វត្ថុសាធារណៈបានឈានមកដល់ដំណាក់កាលទី៣ ក្នុងគោលដៅបង្កើនការផ្សារភ្ជាប់ថវិកាទៅនឹងគោល នយោបាយជាអាទិភាពរបស់រាជរដ្ឋាភិបាល ពិសេសការអនុវត្តថវិកាកម្មវិធីពេញលេញរបស់អង្គភាពថវិកា ដែលវគ្គបណ្តុះបណ្តាលនាថ្ងៃនេះ គឺពិតជាមានសារ:សំខាន់ណាស់សម្រាប់មន្ត្រីមកពីគ្រប់អង្គភាពថវិកា និងមន្ត្រីនៃស្ថានីយជញ្ជីងទាំងអស់ក្នុងការពង្រឹងសមត្ថភាព និងលើកកម្ពស់ការយល់ដឹងថែមទៀត អំពី ការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ និងបែបបទនៃការរៀបចំលិខិតរដ្ឋបាលឱ្យបានគ្រប់ជ្រុង ជ្រោយ និងមានប្រសិទ្ធភាពដើម្បីគាំទ្រដល់ប្រក្រតីភាព និងប្រសិទ្ធភាពនៃការអនុវត្តការងាររបស់អង្គភាព ខ្លួនផងដែរ។ ជាទីបញ្ចប់ ឯកឧត្តម បានជំរុញលើកទឹកចិត្តឱ្យសិក្ខាកាមទាំងអស់ផ្តោតការយកចិត្តទុកដាក់ស្វែងយល់ និងពិភាក្សាឱ្យកាន់តែស៊ីជម្រៅបន្ថែមទៀតទៅលើការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ និងបែប បទនៃការរៀបចំលិខិតរដ្ឋបាល ដើម្បីទទួលបាននូវចំណេះដឹងថ្មីបន្ថែមទៀតសម្រាប់យកទៅអនុវត្តក្នុង ការងារប្រចាំថ្ងៃសមស្របទៅតាមនីតិវិធី ដើម្បីប្រសិទ្ធភាពការងារខ្ពស់ និងផ្សព្វផ្សាយឱ្យកាន់តែទូលំ ទូលាយបន្ថែមទៀតនៅក្នុងអង្គភាពរបស់ខ្លួន៕