[Rasmei Kampuchea Daily News] - ក្រសួងសាធារណការ កំណត់ពេល ៣ ខែ ឱ្យក្រុមហ៊ុនចិន បញ្ចប់ការសិក្សា ផ្លូវល្បឿនលឿន ភ្នំពេញ-បាវិត
ដោយៈ សុផល / ភ្នំពេញ: លោក សូរ វ៉ិចទ័រ រដ្ឋលេខាធិការ ក្រសួងសាធារណការ និងដឹកជញ្ជូន បានកំណត់ពេល ៣ ខែ ដើម្បីឱ្យក្រុមហ៊ុនចិន សិក្សាពិនិត្យ និងកែសម្រួលលទ្ធផល នៃការសិក្សារបស់ខ្លួន លើគម្រោងផ្លូវល្បឿនលឿន ភ្នំពេញ-បាវិត។
ការកំណត់ពេលឱ្យបញ្ចប់ការសិក្សា គម្រោងផ្លូវល្បឿនលឿន ភ្នំពេញ-បាវិតនេះ បានត្រូវធ្វើឡើង នៅក្នុងកិច្ចប្រជុំពិនិត្យមើល គម្រោងសិក្សាផ្លូវល្បឿនលឿន តភ្ជាប់ពី រាជធានីភ្នំពេញ ទៅក្រុង បាវិត ជាមួយក្រុមហ៊ុន China Railway International Group Co., Ltd នៅទីស្តីការក្រសួង កាលពីថ្ងៃទី៧ ខែមេសា ឆ្នាំ២០២២ ។
កិច្ចប្រជុំនេះ បានផ្តោតជាសំខាន់ លើការពិភាក្សា អំពីការកំណត់ពេលវេលាជាក់លាក់ ឱ្យក្រុមហ៊ុន បញ្ចប់របាយការណ៍សិក្សារបស់ខ្លួន ប្រកបដោយលក្ខណៈគ្រប់ជ្រុងជ្រោយ ត្រឹមត្រូវតាមបទដ្ឋាន និងមានគុណភាព ដែលអាចទទួលយកមកពិនិត្យ និងវាយតម្លៃជារួមបាន។
ថ្លែងក្នុងកិច្ចប្រជុំ នាឱកាសនោះ លោករដ្ឋលេខាធិការ បានកំណត់ពេលវេលា ចំនួនបីខែ ដើម្បីឱ្យ ក្រុមហ៊ុន ធ្វើការសិក្សា ពិនិត្យ និងកែសម្រួលលទ្ធផល នៃការសិក្សារបស់ខ្លួន ឬសិក្សាបន្ថែម ដើម្បីផ្ដល់របាយការណ៍ ដែលមានលក្ខណៈ គ្រប់ជ្រុងជ្រោយជាងមុន និងបានជំរុញ ឱ្យក្រុមហ៊ុន ធ្វើយ៉ាងណា បញ្ចប់ការសិក្សារបស់ខ្លួន ឱ្យបានលឿន និងទាន់ពេលវេលា ដែលបានកំណត់ ដើម្បីឈានទៅការចាប់ផ្ដើម គម្រោងសាងសង់ផ្លូវល្បឿនលឿន ភ្នំពេញ-បាវិត ក្នុងពេលវេលា ឆាប់ៗ តាមអនុសាសន៍ណែនាំ ដ៏ខ្ពង់ខ្ពស់របស់ រាជរដ្ឋាភិបាល៕/V
