នំពេញ៖ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃព្រហស្បតិ៍ ទី៣១ ខែមីនា ឆ្នាំ២០២២បានអញ្ជើញជាអធិបតីក្នុងពិធីបិទវគ្គបណ្តុះបណ្តាលស្តីពីទ្រឹស្តី Six Sigma ដើម្បីពង្រឹងសមត្ថភាពដឹកនាំគ្រប់គ្រងស្ថាប័ន/អង្គភាព និងបង្កើនជំនាញដោះស្រាយបញ្ហារបស់មន្ត្រីនៅតាមអង្គភាពនីមួយៗ ដោយមានការចូលរួមពីថ្នាក់ដឹកនាំក្រសួង ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជាគ្រូឧទ្ទេស ឯកឧត្តម ហឿន សំនៀង នាយកវិទ្យាស្ថានតេជោ សែន សាធារណការ និងដឹកជញ្ជូន និងសិក្ខាកាម។ វគ្គបណ្ដុះបណ្ដាលនេះរៀបចំឡើងដោយវិទ្យាស្ថានតេជោ សែន សាធារណការ និងដឹកជញ្ជូន ក្នុងគោលបំណងពង្រឹងប្រសិទ្ធភាពលើការងារដឹកនាំគ្រប់គ្រងស្ថាប័ន/អង្គភាព បង្កើនសមត្ថភាពលើការងារដឹកនាំ និងគ្រប់គ្រងស្ថាប័ន បង្កើនប្រាក់ចំណូល និងប្រាក់ចំណេញ កាត់បន្ថយពេលវេលា និង កាត់បន្ថយការចំណាយដើមទុន ធ្វើឱ្យការពេញចិត្តរបស់អតិថិជនកាន់តែប្រសើរឡើង បង្កើនជំនាញដោះស្រាយបញ្ហារបស់មន្ត្រីនៅតាមអង្គភាពនីមួយៗឱ្យកាន់តែប្រសើរឡើង។ នាឱកាសនោះ ឯកឧត្តមទេសរដ្ឋមន្ត្រីបានថ្លែងអំណរគុណយ៉ាងជ្រាលជ្រៅដល់ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជាគ្រូឧទ្ទេស ដែលបានផ្ដល់ការបណ្ដុះបណ្ដាលដល់សិក្ខាកាមជាថ្នាក់ដឹកនាំក្រសួងចាប់ពីប្រធាននាយកដ្ឋានរហូតដល់ថ្នាក់រដ្ឋលេខាធិការ និងសិក្ខាកាមជាថ្នាក់អនុប្រធានមន្ទីរសាធារណការ និងដឹកជញ្ជូនទាំង២៥រាជធានី-ខេត្ត និងអនុប្រធាននាយកដ្ឋាន និងបានថ្លែងអំណរគុណផងដែរដល់វិទ្យាស្ថានតេជោសែន សាធារណការ និងដឹកជញ្ជូន ដែលបានរៀបចំវគ្គបណ្តុះបណ្តាលនេះប្រកបដោយជោគជ័យ។ ជាងនេះទៅទៀត ឯកឧត្តមទេសរដ្ឋមន្ត្រី បានសំដែងនូវការគាំទ្រឱ្យមានការរៀបចំវគ្គបណ្ដុះបណ្ដាលបែបនេះបន្តទៀត ដើម្បីជាផលប្រយោជន៍ដល់ការពង្រឹងសមត្ថភាពរបស់មន្ត្រីជំនាញបច្ចេកទេសរបស់ក្រសួង ឱ្យកាន់តែទូលំទូលាយ និងបានផ្ដាំផ្ញើសុំឱ្យសិក្ខាកាមទាំងអស់យកចំណេះដឹង និងទ្រឹស្ដីនៃការបណ្ដុះ បណ្ដាលទៅបំពេញការងាររបស់ខ្លួនឱ្យមានគុណភាព និងប្រសិទ្ធភាពខ្ពស់ទៅថ្ងៃអនាគត ក៏ដូចជាយកទៅប្រើប្រាស់ ដើម្បីបានជាគុណប្រយោជន៍សម្រាប់ការបម្រើសេវាសាធារណៈជូនបងប្អូនប្រជាពលរដ្ឋផងដែរ។ សូមជម្រាបជូនថា៖ វគ្គបណ្តុះបណ្តាលនេះរៀបចំឡើងជាពីរវគ្គ៖ វគ្គទី១បានប្រព្រឹត្តទៅនៅថ្ងៃចន្ទ ១២កើត ខែផល្គុន ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៤ ខែមីនា ឆ្នាំ២០២២ ដោយមានការចូលរួមពីសិក្ខ កាមជាថ្នាក់ដឹកនាំក្រសួងចាប់ពីប្រធាននាយកដ្ឋានរហូតដល់ថ្នាក់រដ្ឋលេខាធិការសរុបចំនួន១៧០រូប និងវគ្គទី២ មានការចូលរួមពីសិក្ខាកាមជាថ្នាក់អនុប្រធានមន្ទីរសាធារណការ និងដឹកជញ្ជូនទាំង ២៥ រាជធានី-ខេត្ត និងអនុប្រធាននាយកដ្ឋានសរុបចំនួន២៣៦រូប សរុបរួមទាំងអស់ចំនួន៤០៦រូប។ គួរកត់សម្គាល់ថា៖ ចំណេះដឹងទទួលបានពីវគ្គបណ្តុះបណ្តាលទាំងពីរនេះគឺជាចំណេះដឹងថ្មីមួយ និងមានសារសំខាន់សម្រាប់បំពេញបន្ថែម ពង្រឹងប្រសិទ្ធភាពការងារដឹកនាំគ្រប់គ្រងស្ថាប័ន ឬអង្គភាព បង្កើនសមត្ថភាពលើការងារដឹកនាំ គ្រប់គ្រង កាត់បន្ថយពេលវេលា កាត់បន្ថយការចំណាយ និងបង្កើនជំនាញដោះស្រាយបញ្ហារបស់មន្រ្តី នៅតាមអង្គភាពនីមួយៗឱ្យកាន់តែមានភាពប្រសើរឡើងថែមទៀត៕