[Rasmei Kampuchea Daily News] - វិទ្យាស្ថានតេជោសែន សាធារណការ បណ្តុះបណ្តាលថ្នាក់ដឹកនាំដើម្បីបង្កើនសមត្ថភាពលើការងារដឹកនាំ និងគ្រប់គ្រងអង្គភាព
ដោយៈសុផល/ភ្នំពេញៈ វិទ្យាស្ថានតេជោសែននិងដឹកជញ្ជូនកាលពីថ្ងៃទី១៤ខែមីនាបានរៀបចំវគ្គបណ្តុះបណ្តាលស្តីពីទ្រឹស្ដី Six Sigma ជូនសិក្ខាកាមដែលជាថ្នាក់ដឹកនាំក្រសួង ដើម្បីពង្រឹងប្រសិទ្ធភាពការងារនិងបង្កើនសមត្ថភាពលើការងារ ដឹកនាំ និងគ្រប់គ្រងអង្គភាពឱ្យកាន់តែមានប្រសិទ្ធភាព។
សិក្ខាកាមចូលរួមជាថ្នាក់ដឹកនាំក្រសួងចាប់ពីប្រធាននាយកដ្ឋានរហូតដល់ថ្នាក់រដ្ឋលេខាធិការសរុបចំនួន១៧០រូប ក្នុងនោះរួមមាន៖ រដ្ឋលេខាធិការចំនួន២៧រូប អនុរដ្ឋលេខាធិការចំនួន២៦រូប អគ្គនាយក ចំនួន១០រូប អគ្គនាយករងចំនួន ៣៩ រូប ប្រធាននាយកដ្ឋានចំនួន ៤៣រូប និងប្រធានមន្ទីរសាធារណការ និងដឹកជញ្ជូនចំនួន២៥នាក់។
វគ្គបណ្ដុះបណ្ដាលនេះរៀមានគោល បំណងពង្រឹងប្រសិទ្ធភាពលើការងារដឹកនាំគ្រប់គ្រងស្ថាប័ន/អង្គភាព បង្កើនសមត្ថភាពលើការងារដឹកនាំនិងគ្រប់គ្រងស្ថាប័នបង្កើនប្រាក់ចំណូលនិងប្រាក់ចំណេញកាត់បន្ថយពេលវេលានិងកាត់បន្ថយការចំណាយនិងបង្កើនជំនាញដោះស្រាយបញ្ហារបស់មន្ត្រីនៅតាមអង្គភាពនីមួយៗឱ្យកាន់តែប្រសើរឡើង។
នាយកវិទ្យាស្ថាន លោក ហឿន សំនៀង បានមានប្រសាសន៍ថាលទ្ធផលរំពឹងទុកក្រោយពេលបញ្ចប់វគ្គបណ្តុះបណ្តាល នេះគឺ៖ សិក្ខាកាមនឹងយល់ដឹងពីរបៀបនៃការបំពេញការងារតាមរបៀបទស្សនវិជ្ជាSix Sigmaមានការផ្លាស់ប្តូរផ្នត់គំនិត និងឥរិយាបទក្នុងការបំពេញការងារ ឱ្យបានល្អប្រសើររកឃើញឬសគល់នៃបញ្ហាចំណុចខ្វះខាតនិងនីតិវិធីការងារ ដែលមិនសូវមាន គុណភាពនិងចំណាយពេលវេលា និងធនធានច្រើនដែលមិនចាំបាច់ ហើយមិនបំពេញចិត្តសេចក្តី ត្រូវការរបស់អតិថិជនដែលមកទទួលសេវា បង្កើតនីតិវិធីរបៀបរបបការងារ និងមានលទ្ធភាពកែលម្អ ចំណុចខ្វះខាត អនុវត្ដការងារឱ្យកាន់តែប្រសើរ និងកាត់បន្ថយវដ្តនៃនីតិវិធីការងារជាដើម។
ថ្លែងក្នុងកម្មវិធីបើកវគ្គបណ្តុះបណ្តាលនាឱកាសនោះ លោករដ្ឋលេខាធិការ រស់ វណ្ណាបានគូសបញ្ជាក់ពីសារសំខាន់នៃការ គាំទ្រ និងការប្តេជ្ញាចិត្តខ្ពស់ពីថ្នាក់ដឹកនាំ ជាពិសេសការចូលរួមពីគ្រប់ភាគីពាក់ព័ន្ធ ទាំងអស់នៅក្នុងអង្គភាព/ស្ថាប័ន រាប់ចាប់តាំងពីមន្ត្រីថ្នាក់ក្រោមបំផុតរហូតទៅដល់ថ្នាក់ដឹកនាំអង្គភាព/ ស្ថាប័ននោះ ដើម្បីអនុវត្តទ្រឹស្តីទស្សនវិជ្ជាSix Sigmaនេះបានជោគជ័យ ក៏ដូចជាដើម្បីបញ្ជ្រៀបទ្រឹស្តីនេះ ឱ្យក្លាយជាវប្បធម៌មួយរបស់អង្គភាព/ស្ថាប័ននោះ។
ជាមួយគ្នានោះផងដែរលោករដ្ឋលេខាធិការបានសំណូមពរឱ្យសិក្ខាកាមទាំងអស់យកចិត្តទុកដាក់ប្រកបដោយការប្ដេជ្ញាចិត្តខ្ពស់ដើម្បីក្រេបជញ្ជក់យកចំណេះដឹងនិងបទពិសោធន៍ពីកម្មវិធីនេះយកទៅអនុវត្តនៅក្នុងអង្គភាពរបស់ខ្លួនឱ្យមានប្រសិទ្ធភាពខ្ពស់និងបានបញ្ជាក់បន្ថែមថាឯកឧត្តមនឹងខិតខំប្រឹងប្រែងធ្វើបទបង្ហាញពន្យល់ឱ្យបានក្បោះក្បាយអំពីទ្រឹស្តីសំខាន់ៗជូនដល់សិក្ខាកាមទាំងអស់ ដើម្បីឱ្យ វគ្គបណ្តុះបណ្តាលនេះអាចសម្រេចបានជោគជ័យតាមការគ្រោងទុក។
សូមជម្រាបជូនថា៖ វគ្គបណ្ដុះបណ្ដាលនេះ បែងចែកជា ៣ វគ្គ សម្រាប់ក្រុមគោលដៅផ្សេងៗគ្នាក្នុងនោះ៖ វគ្គទី១ រៀបចំសម្រាប់ថ្នាក់ដឹកនាំចាប់ពីប្រធានមន្ទីរ ប្រធាននាយកដ្ឋានដល់រដ្ឋលេខាធិការ វគ្គទី២ រៀបចំ សម្រាប់អនុប្រធានមន្ទីរសាធារណការ និងដឹកជញ្ជូនទាំង២៥ រាជធានី-ខេត្ត និងវគ្គទី៣រៀបចំសម្រាប់ ថ្នាក់អនុប្រធាននាយកដ្ឋាន៕សរន-PC
