រាជរដ្ឋាភិបាលកាលពីពេលកន្លងទៅ បានដាក់គោលដៅអភិវឌ្ឍន៍ប្រទេសកម្ពុជាឲ្យក្លាយជាប្រទេសចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០ផងដែរ។ ប៉ុន្ដែដើម្បីសម្រេចគោលដៅនេះបាន ឯកឧត្ដម ស៊ុន ចាន់ថុល ទេសរដ្ឋមន្រ្ដី រដ្ឋមន្រ្ដីក្រសួងសាធារណការ និងដឹកជញ្ជូន បានលើកឡើងការងារអាទិភាព ចំនួន៤ ដែលត្រូវធ្វើ។ តាមប្រសាសន៍លើកឡើងរបស់ឯកឧត្ដមនៅក្នុងកម្មវិធីតម្រង់ទិសជំនាញសិក្សានិងការងារ នៅវិទ្យាស្ថានតេជោសែន កាលពីថ្ងៃទី៦ ខែកុម្ភៈ ឆ្នាំ២០២២ បានឲ្យដឹងថា « ដើម្បីយើងអនុវត្តផែនការ គោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥បាន ដើម្បីឱ្យ ប្រទេសជាតិយើងប្រែក្លាយជាប្រទេសដែលមានចំណូលខ្ពស់បាន យើងត្រូវមានការងារអាទិភាពចំនួន៤ ដែលត្រូវធ្វើ្៖ ទី១.ត្រូវ បញ្ចុះតម្លៃអគ្គិសនីឱ្យនៅកម្រិតទាបទើបទាក់ទាញអ្នកវិនិយោគមកដាក់ទុននៅកម្ពុជាយើងបាន ទី២. ត្រូវមានធនធានមនុស្សល្អ គ្រប់គ្រាន់ ដើម្បីចូលរួមកសាងប្រទេសជាតិ ទី៣.ត្រូវបញ្ចុះតម្លៃភស្តុភារកម្ម និងដឹកជញ្ជូន ដើម្បីទាក់ទាញអ្នកវិនិយោគមកដាក់ទុន នៅកម្ពុជាយើងបាន ទី៤. រៀបចំខេត្តព្រះសីហនុទាំងមូលឱ្យក្លាយជាតំបន់សេដ្ឋកិច្ចពិសេស ទើបយើងអាចឈានទៅរក គោលដៅ របស់យើងជាប្រទេសដែលមានចំណូលខ្ពស់ នៅឆ្នាំ២០៥០ »។