[Rasmei Kampuchea Daily News] - គម្រោងសាង់សង់ស្ពានអាកាស ស្តុបផ្សារស៊ិនជូរី ផ្លាហ្សា គ្រោងនឹងចាប់ផ្តើមសាងសង់ ពីខែមីនា ខាងមុខនេះ ដោយប្រើប្រាស់រយៈពេលសាងសង់ ជាង ១៤ ខែ
ដោយៈ រ៉ាម៉ន / ភ្នំពេញៈ គម្រោងសាង់សង់ស្ពានអាកាស ផ្លូវ២០០៤ ស្ថិតនៅផ្លូវ ប្រសព្វ រវាងមហាវិថីសហព័ន្ធរុស្ស៊ី និងវិថីសម្តេចចៅហ្វាវាំង គង់ សំអុល (ផ្លូវ២០០៤) គ្រោងនឹងស្ថាបនា ចាប់ពីខែមីនា ឆ្នាំ២០២២ ខាងមុខនេះហើយ ដោយប្រើប្រាស់រយៈពេល នៃការសាងសង់ ចំនួនជាង ១៤ ខែ ពោលគឺ នឹងស្ថាបនា ឱ្យបានរួចរាល់ នៅមុនពេលដែលកម្ពុជា នឹងធ្វើជាម្ចាស់ផ្ទះ នៃការប្រកួតកីឡា ស៊ីហ្គេម ឆ្នាំ២០២៣។
នេះបើតាមការបញ្ជាក់ឲ្យដឹង នៅក្នុងកិច្ចប្រជុំមួយ នៅសាលារាជធានីភ្នំពេញ ក្រោមអធិបតីភាពលោក ឃួង ស្រេង អភិបាលរាជធានីភ្នំពេញ លោក ស ថេត ស្នងការនគរបាល រាជធានីភ្នំពេញ លោករដ្ឋលេខាធិការ នៃរដ្ឋលេខាធិដ្ឋាន អាកាសចរណ៍ស៊ីវិល តំណាងក្រុមហ៊ុន OCIC និងមានការចូលរួមពី មន្ត្រីជំនាញ មួយចំនួនទៀត។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូន រាជធានីភ្នំពេញ បានបង្ហាញពីគម្រោង នៃការសាងសង់ ស្ពានអាកាសនេះថាៈ គម្រោងស្ពានអាកាស ផ្លូវ២០០៤ នឹងចាប់ផ្ដើម នៅខែមីនា ឆ្នាំ២០២២ ខាងមុខ ដោយប្រើប្រាស់រយៈពេល ជាង ១៤ ខែ ហើយក្នុងរយៈពេលនេះ រហូតដល់ខែមីនា ក្រុមជំនាញ នឹងធ្វើការ សិក្សា ពីផ្លូវវាង នឹងធ្វើការសិក្សា ពីផលប៉ះពាល់មួយចំនួន។
ស្ពាននេះ នឹងធ្វើឡើងស្របពីលើ បណ្ដោយផ្លូវសហព័ន្ធរុស្ស៊ី គ្របពីលើផ្លូវ ២០០៤ ប្រសព្វជាមួយនឹងផ្លូវ ២០១១ ។
គម្រោងស្ពានអាកាសផ្លូវ ២០០៤ នេះ មានប្រវែង ៥១៦,២ ម៉ែត្រ ប្រវែងបណ្តោយ តួស្ពាន ២៣៣,៩ ម៉ែត្រ ប្រវែងទទឹងតួស្ពាន ១៥,៨ ម៉ែត្រ កំពស់តួស្ពាន ត្រង់ចំណុច កណ្ដាល ៥,០~៥,៥ ម៉ែត្រ។
លោក ឃួង ស្រេង បានមានប្រសាសន៍ថាៈ ស្ពានអាកាសថ្មីនេះ យើងនឹងធ្វើការងារ ទាំងថ្ងៃ ទាំងយប់ ដើម្បីឲ្យរួចរាល់ ទៅតាមការគ្រោងទុក មានន័យថា ធ្វើឱ្យបានរួច រាល់ នៅមុនដែលកម្ពុជា ធ្វើជាម្ចាស់ផ្ទះ ការប្រកួតកីឡាស៊ីហ្គេម ឆ្នាំ២០២៣។
ប៉ុន្តែ ទោះបីជាយ៉ាងណាក្តី ការបង្កើតនូវគម្រោងទី១ នៃការកសាងស្ពានអាកាស នៅចំណុចខាងលើនេះ លោក ឃួង ស្រេង នៅតែជំរុញឱ្យមន្ទីរសាធារណការ និងដឹកជញ្ជូន រាជធានីភ្នំពេញ ធ្វើការសហការជាមួយនឹងក្រុមហ៊ុន ocic សិក្សាពី ការសាងសង់ ផ្លូវក្រោមដី នៅចំណុចស្ពាននេះបន្ថែមទៀត អោយបានលឿនផងដែរ ថាតើមានផលប៉ះពាល់ទំហំប៉ុណ្ណា ហើយគ្រោង នឹងចំណាយថវិកាប៉ុន្មាន នៃផល ប៉ះពាល់នេះ ដើម្បីយើងអាចដោះស្រាយ ការកកស្ទះចរាចរណ៍ នៅតំបន់នេះ បានយូរអង្វែង។
លោក ឃួង ស្រេង បានបន្តថាៈ ស្ពានអាកាស និងផ្លូវក្រោមដី នៃរង្វង់មូលចោមចៅ ក្រោយពីមានការដាក់ ឲ្យដំណើរការនោះ លំហូរចរាចរ នៅតាមបណ្តោយផ្លូវ សហព័ន្ធរុស្ស៊ី នឹងមកកកស្ទះចរាចរ នៅផ្លូវលេខ២០០៤ ក៏ដូចជា ផ្លូវលេខ២០១១ កាន់តែខ្លាំង ដោយហេតុនេះ ទើបរដ្ឋបាលរាជធានីភ្នំពេញ ធ្វើការសាងសង់ស្ពាន អាកាស ថ្មីមួយទៀត នៅចំណុចស្តុបផ្សារ ស៊ិនជូរីផ្លាហ្សា (ផ្លូវ២០០៤ កែងផ្លូវ សហពន្ធរូស៊ី) នេះ៕
