បាត់ដំបង៖ ថ្ងៃចន្ទ ៨កើត ខែបុស្ស ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១០ ខែមករា ឆ្នាំ២០២២ ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន បានអញ្ជើញអម ដំណើរសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក្នុងពិធីសម្ពោធដាក់ឱ្យប្រើប្រាស់ជាផ្លូវការកំណាត់ផ្លូវជាតិលេខ៥ ភាគខាងជើង ដោយមានការអញ្ជើញ ចូលរួមពីឯកឧត្តម MIKAMI Masahiro ឯកអគ្គរាជទូតនៃប្រទេសជប៉ុន ប្រចាំព្រះរាជាណាចក្រកម្ពុជា សមាជិកសមាជិការព្រឹទ្ធសភា រដ្ឋសភាពនិងរាជរដ្ឋាភិបាល ថ្នាក់ដឹកនាំខេត្តបាត់ដំបង និងបន្ទាយមាន ជ័យ ក្រុមប្រឹក្សាខេត្ត មន្ទីរ-អង្គភាពជំនាញជុំវិញខេត្ត មន្ត្រីរាជការ កងកម្លាំងប្រដាប់អាវុធ ព្រមទាំងបង ប្អូនប្រជាពលរដ្ឋ លោកគ្រូ អ្នកគ្រូ សិស្សានុសិស្សផងដែរ។ កំណាត់ផ្លូវជាតិលេខ ៥ ភាគខាងជើង(បាត់ដំបង-សិរីសោភ័ណ) ប្រវែងសរុប ៨៤,៧៤គីឡូម៉ែត្រ ចំណាយថវិកាសាងសង់សរុបប្រមាណ ១៦៥,៧៨លានដុល្លារអាមេរិក។ ថ្លែងក្នុងរបាយការណ៍គោរពជូនសម្តេចតេជោនាយករដ្ឋមន្ត្រី និងអង្គពិធីទាំងមូល ឯកឧត្តមទេសរដ្ឋមន្ត្រី បានថ្លែងអំណរគុណយ៉ាងជ្រាលជ្រៅជូនចំពោះប្រជាជន និងរដ្ឋាភិបាលជប៉ុន ដែលបានផ្ដល់ឥណទាន សម្បទានហិរញ្ញប្បទានឥតសំណង និងជំនួយបច្ចេកទេសជាបន្ដបន្ទាប់ ដើម្បីចូលរួមចំណែកក្នុងការស្ដារ និងអភិវឌ្ឍហេដ្ឋារចនាសម្ព័ន្ធដឹកជញ្ជូននៅកម្ពុជា សំដៅជំរុញកំណើនសេដ្ឋកិច្ចជាតិ និងកាត់បន្ថយភាព ក្រីក្រឱ្យកាន់តែថយចុះបន្ថែមទៀត និងបានថ្លែងអំណរគុណផងដែរជូនចំពោះក្រសួង-ស្ថាប័នពាក់ព័ន្ធ អាជ្ញាធរដែនដីខេត្តបាត់ដំបង និងខេត្តបន្ទាយមានជ័យ ក្រុមហ៊ុនសាងសង់ និងក្រុមហ៊ុនទីប្រឹក្សាបច្ចេក ទេស រួមទាំងបងប្អូនប្រជាពលរដ្ឋដែលមានដីធ្លី ភូមិឋាន និងផ្ទះសម្បែងស្ថិតនៅជិតការដ្ឋានសាងសង់ផ្លូវ និងតាមបណ្តោយផ្លូវជាតិលេខ៥ ដែលបានផ្តល់កិច្ចសហការយ៉ាងល្អប្រសើរជំរុញឱ្យការងារសាងសង់ អាចដំណើរការទៅបានដោយរលូន និងបញ្ចប់តាមផែនការគ្រោងទុក។ ជាមួយគ្នានេះ ឯកឧត្តមទេសរដ្ឋមន្ត្រី បានគូសបញ្ជាក់អំពីសក្តានុពលនៃផ្លូវជាតិលេខ៥ក្នុងការតភ្ជាប់ ទំនាក់ទំនងរូបវន្ត ស្ថាប័ន និងប្រជាជននៃខេត្តបាត់ដំបង ខេត្តបន្ទាយមានជ័យ និងបណ្តាខេត្តជាប់ព្រំ ប្រទល់គ្នា និងជាខ្សែផ្លូវយុទ្ធសាស្រ្តយ៉ាងសំខាន់តភ្ជាប់ពីរាជធានីភ្នំពេញ ទៅច្រកទ្វារព្រំដែនប៉ោយប៉ែត-អារញ្ញប្រាថេត (ព្រំដែនកម្ពុជា-ថៃ) ជាផ្នែកមួយនៃផ្លូវអាស៊ានហាយវ៉េលេខ១ (AH1) តភ្ជាប់គ្នារវាង រាជធានីភ្នំពេញ ទីក្រុងបាងកក និងទីក្រុងហូជីមិញ និងជាខ្សែផ្លូវស្ថិតក្នុងរបៀងសេដ្ឋកិច្ចខាងត្បូងដ៏មាន សក្តានុពល និងការប្រកួតប្រជែងខ្លាំងសម្រាប់វិស័យទេសចរណ៍ ពាណិជ្ជកម្ម វិនិយោគ ភស្តុភារកម្ម និងសេដ្ឋកិច្ចរបស់អាស៊ាន ក៏ដូចជាមហាអនុតំបន់មេគង្គ(GMS)ផងដែរ។ ឯកឧត្តមទេសរដ្ឋមន្ត្រី បានបន្ថែមថា៖ ទោះបីកម្ពុជាបានប្រឈមនឹងវិបត្តិកូវីដ-១៩ ក៏ដោយ រាជរដ្ឋា ភិបាលកម្ពុជា នៅតែចាត់ទុកការអភិវឌ្ឍហេដ្ឋារចនាសម្ព័ន្ធ គឺជាវិស័យអាទិភាពនៅក្នុងចំណោមវិស័យ អាទិភាពសំខាន់ៗ រួមមាន៖ ផ្លូវ ទឹក ភ្លើង និងមនុស្ស ដែលក្នុងនោះ គម្រោងហេដ្ឋារចនាសម្ព័ន្ធផ្លូវ និង ស្ពានជាច្រើន បានបញ្ចប់ការសាងសង់ជាស្ថាពរ គម្រោងសំខាន់ៗមួយចំនួនផ្សេងទៀត បាន និងកំពុង បន្តការសាងសង់ និងបានត្រៀមអនុវត្តគម្រោងថ្មីៗជាច្រើនទៀតនាពេលខាងមុខនេះ ដោយប្រើប្រាស់ ប្រភពថវិកាសន្សំរបស់ជាតិ និងហិរញ្ញប្បទានពីដៃគូអភិវឌ្ឍន៍ រួមទាំងជំនួយឥតសំណង និងជំនួយបច្ចេក ទេសពីបណ្ដាប្រទេសជាមិត្ត រួមមាន៖ សាធារណរដ្ឋប្រជាមានិតចិន ប្រទេសជប៉ុន សាធារណរដ្ឋ កូរ៉េ និងដៃគូអភិវឌ្ឍន៍នានាដូចជា៖ ធនាគារអភិវឌ្ឍន៍អាស៊ី និងធនាគារពិភពលោកជាដើម។ ឯកឧត្តមទេសរដ្ឋមន្ត្រី បានកត់សម្គាត់ផងដែរថា៖ សមិទ្ធផលថ្មីនេះគឺជាចំណងដៃដ៏ថ្លៃថ្លាមិនអាចកាត់ថ្លៃ បានរបស់រាជរដ្ឋាភិបាលកម្ពុជាជូនដល់បងប្អូនប្រជាពលរដ្ឋខេត្តបាត់ដំបង ខេត្តបន្ទាយមានជ័យ ព្រម ទាំងប្រជាពលរដ្ឋរស់នៅតាមបណ្តោយផ្លូវជាតិលេខ៥ ក៏ដូចជាប្រជាពលរដ្ឋនៅទូទាំងប្រទេស ដើម្បីប្រើ ប្រាស់ជាប្រយោជន៍ទូទៅ និងយូរអង្វែង ហើយក៏ជាសមិទ្ធផលកើតឡើងក្រោមការដឹកនាំប្រកបដោយ គតិបណ្ឌិត និងចក្ខុវិស័យវែងឆ្ងាយរបស់សម្តេចតេជោនាយករដ្ឋមន្រ្តី ជាមគ្គុទ្ទេសន៍ឯក ដែលបានដឹកនាំ កម្ពុជាឱ្យមានការរីកចម្រើនជឿនលឿន ការពារបាននូវបូរណភាពទឹកដី ស្ថិរភាពនយោបាយ និងសុខ សន្តិភាព ជូនប្រជាជាតិកម្ពុជា ព្រមទាំងលើកកម្ពស់មោទនភាព និងកិត្យានុភាពជាតិលើឆាកអន្តរជាតិ។ ជាងនេះទៅទៀត ឯកឧត្តមទេសរដ្ឋមន្ត្រី បានវាយតម្លៃខ្ពស់ចំពោះសុខសន្តិភាព ក្រោមនយោបាយឈ្នះ-ឈ្នះរបស់សម្តេចតេជោនាយករដ្ឋមន្ត្រី បានផ្តល់ឱកាសឱ្យបងប្អូនប្រជាពលរដ្ឋទាំងអស់មានមុខរបរមាន ការងារធ្វើ មានប្រាក់ចំណូល មានជីវភាពរស់នៅប្រសើរជាងមុន រួមទាំងការទទួលបាននូវការសិក្សាអប់រំ អាហារូបត្ថម្ភ ការប្រើប្រាស់ទឹកស្អាត និងអនាម័យ បរិស្ថានរស់នៅល្អ សេវាថែទាំសុខភាពផ្សេងៗទាំងនៅ តាមទីប្រជុំជន និងជនបទ និងមានបណ្តាញអគ្គិសនី បណ្តាញគមនាគមន៍ ទូរសព្ទ អ៊ីនធឺណែត និង ប្រព័ន្ធបច្ចេកវិទ្យាទំនើប ដែលអាចភ្ជាប់ទីក្រុង និងជនបទឱ្យនៅជិតគ្នា។ ជាមួយគ្នានោះផងដែរ សម្តេចតេជោនាយករដ្ឋមន្ត្រី បានគូសបញ្ជាក់ពីការប្តេជ្ញាចិត្តក្នុងការអភិវឌ្ឍហេដ្ឋា រចនាសម្ព័ន្ធរូបវន្តកម្ពុជា បន្ដរួមសហការខិតខំបំពេញការងារឱ្យបានកាន់តែខ្លាំងក្លាឡើងថែមទៀត ដើម្បីលើកកម្ពស់ការចូលរួមចំណែកអភិវឌ្ឍផ្លូវ-ស្ពាន ក្នុងការតភ្ជាប់បណ្ដាញផ្លូវគមនាគមន៍ទៅគ្រប់តំបន់ជិតឆ្ងាយទូទាំងប្រទេស និងភ្ជាប់ជាមួយប្រទេសជិតខាងឱ្យមាននិរន្ដរភាពទាំងគុណភាព និងប្រសិទ្ធផល ទោះបីកម្ពុជាកំពុងប្រយុទ្ធប្រឆាំងនឹងការរាតត្បាតនៃមេរោគកូវីដ-១៩ក៏ដោយ។ ឆ្លៀតក្នុងឱកាសនេះ ក្នុងនាមប្រជាពលរដ្ឋ និងរាជរដ្ឋាភិបាលនៃព្រះរាជាណាចក្រកម្ពុជា សម្តេចតេជោ នាយករដ្ឋមន្ត្រី បានវាយតម្លៃខ្ពស់ ព្រមជាមួយនឹងការដឹងគុណដ៏ជ្រាលជ្រៅចំពោះប្រជាជននិងរដ្ឋាភិបាល នៃប្រទេសជប៉ុន ដែលបានជួយដល់ប្រជាពលរដ្ឋកម្ពុជាលើគ្រប់វិស័យនៅគ្រប់កាលៈទេសៈទាំងអស់ និង មិនមានលក្ខខណ្ឌស្មុគស្មាញ ដោយបានផ្តល់នូវជំនួយឥតសំណង និងឥណទានសម្បទានដ៏ច្រើន សន្ធឹកសន្ធាប់សម្រាប់ជួយកសាង និងអភិវឌ្ឍហេដ្ឋារចនាសម្ព័ន្ធរូបវន្តនៅកម្ពុជា និងបានជូនពរសូមឱ្យ ចំណងមិត្តភាពជប៉ុន-កម្ពុជាកាន់តែមានភាពរឹងមាំ និងបន្តឋិតថេរចីរកាលតរៀងទៅ។ ឆ្លៀតក្នុងឱកាសនោះដែរ សម្តេចតេជោនាយករដ្ឋមន្ត្រី ក៏បានអំពាវនាវផងដែរសូមឱ្យបងប្អូនប្រជាពលរដ្ឋ បន្តអនុវត្តឱ្យបានខ្ជាប់ខ្ជួននូវវិធានការរបស់ក្រសួងសុខា ភិបាល ពិសេសវិធានការ “៣-កុំ ៣-ការពារ” ឱ្យ បានជាប់ជាប្រចាំ និងត្រូវបន្តសម្របបន្ស៊ាំខ្លួន និងរៀនរស់នៅជាមួយជំងឺកូវីដ-១៩ ទៅតាមគន្លងប្រក្រតី ភាពថ្មី។ សូមជម្រាបជូនថា៖ គម្រោងធ្វើឱ្យប្រសើរឡើងកំណាត់ផ្លូវជាតិលេខ៥ ភាគខាងជើង (បាត់ដំបង-សិរីសោភ័ណ)នេះ ត្រូវបានបើកការដ្ឋានសាងសង់ក្រោមអធិបតីភាពដ៏ខ្ពង់ខ្ពស់របស់សម្តេចតេជោ នាយករដ្ឋមន្រ្តីកាលពីថ្ងៃទី២៦ ខែមីនា ឆ្នាំ២០១៨ ប្រើប្រាស់រយៈពេលសាងសង់ចំនួន៥៥ខែ និង បានបញ្ចប់ជាស្ថាពរនៅក្នុងខែកញ្ញា ឆ្នាំ២០២១ ចំណាយថវិកាសរុបប្រមាណ ១៦៥,៧៨លាន ដុល្លារ អាមេរិក ក្រោមឥណទានសម្បទានពីរដ្ឋាភិបាលនៃប្រទេសជប៉ុន រួមជាមួយនឹងថវិកាបដិភាគរបស់ រាជរដ្ឋាភិបាល សម្រាប់ការងារដោះស្រាយផលប៉ះពាល់ បោសសម្អាតគ្រាប់មីន និងយុទ្ធភ័ណ្ឌមិនទាន់ ផ្ទុះផងដែរ។ កំណាត់ផ្លូវនេះមានប្រវែងសរុប៨៤,៧៤គីឡូម៉ែត្រ ជាប្រភេទផ្លូវចាក់បេតុងកៅស៊ូ(AC) កម្រាស់១៥សង់ទី ម៉ែត្រ ក្នុងនោះរួមមាន៖ ការងារពង្រីកទំហំផ្លូវមេដែលមានស្រាប់ប្រវែង៥១,៤៨គីឡូម៉ែត្រ ទទឹងមានប្រវែង ២៣ម៉ែត្រ មាន៤គន្លង (គន្លងនីមួយៗ មានទទឹង ៣,៥០ម៉ែត្រ និងមាន២គន្លងទៅ និង២គន្លងមក) ចិញ្ចើមផ្លូវមានទទឹង ៣ម៉ែត្រ (សងខាង) និងសួនទ្រូងផ្លូវខណ្ឌចែកទិសដៅចរាចរណ៍នៅចំកណ្តាល មានទទឹង ៣ម៉ែត្រ មានផ្លូវវាងក្រុង២ខ្សែ ប្រវែងសរុប ៣៣,២៦គីឡូម៉ែត្រ (ផ្លូវវាងក្រុងបាត់ដំបង ប្រវែង ២៣,៩២គីឡូម៉ែត្រ និងផ្លូវវាងក្រុងសិរីសោភ័ណប្រវែង ៩,៣៤គីឡូម៉ែត្រ) ក្នុងនោះសាងសង់ស្ពានថ្មីចំនួន ២កន្លែង (លើផ្លូវវាង) ពង្រីក និងជួសជុលស្ពានដែលមានស្រាប់ចំនួន១០កន្លែង (លើផ្លូវមេ)។ ការសាងសង់កំណាត់ផ្លូវនេះរួមមានការងារដាក់លូប្រអប់ចំនួន ៧៦កន្លែង និងលូមូលតាមបណ្តោយផ្លូវ ចំនួន ១១៣កន្លែង ព្រមទាំងបំពាក់ភ្លើងបំភ្លឺ LED នៅតាមផ្លូវប្រសព្វ និងត្រូវបានបែងចែកកិច្ចសន្យា សាងសង់ជា២កញ្ចប់ រួមមាន៖ កញ្ចប់កិច្ចសន្យាទី១៖ សាងសង់ដោយសម្ព័ន្ធ ក្រុមហ៊ុន ថិកខេន ដាយយ៉ូ (Teken-Taiyo Joint Venture) មានប្រវែងសរុប ៤៦,២៧គីឡូម៉ែត្រ រួមមានការពង្រីកផ្លូវមេ ប្រវែង ២២,៣៥គីឡូម៉ែត្រ និងការសាងសង់ផ្លូវវាងក្រុងបាត់ដំបង ប្រវែង ២៣,៩២គីឡូម៉ែត្រ។ កញ្ចប់កិច្ចសន្យា ទី២៖ សាងសង់ដោយសម្ព័ន្ធក្រុមហ៊ុន ដាយហូ អាសាណូម៉ា (Daiho-Asanuma Joint Venture) មាន ប្រវែងសរុប ៣៨,៤៧គីឡូម៉ែត្រ រួមមាន ការពង្រីកផ្លូវមេ ប្រវែង ២៩,១៣ គីឡូម៉ែត្រ និងសាងសង់ផ្លូវវាង ក្រុងសិរីសោភ័ណ ប្រវែង ៩,៣៤គីឡូម៉ែត្រ ត្រួតពិនិត្យបច្ចេកទេសដោយសម្ព័ន្ធក្រុមហ៊ុន ខេអ៊ីអាយ អូស៊ីស៊ី (KEI-OCC) Katahira & Engineers International-Oriental Consultants Company Limited Joint Venture។ គួរកត់សម្គាល់ផងដែរថា៖ គម្រោងធ្វើឱ្យប្រសើរឡើងវិញផ្លូវជាតិលេខ៥ មានប្រវែងសរុប ៣៦៦គីឡូម៉ែត្រ ចាប់ផ្តើមពីព្រែកក្តាម រហូតដល់ក្រុងប៉ោយប៉ែត ខេត្តបន្ទាយមានជ័យ គ្រោងប្រើប្រាស់ថវិកាប្រមាណ ៥០០លានដុល្លារអាមេរិក បែងចែកចេញជា ៣កំណាត់ រួមមាន៖ កំណាត់ទី១៖ ភាគខាងជើង (បាត់ដំបង-សិរីសោភ័ណ) មានប្រវែង ៨៤,៧៤គីឡូម៉ែត្រ បានបញ្ចប់ការងារសាងសង់ជាស្ថាពរ ១០០% ។ កំណាត់ទី២៖ ភាគខាងត្បូង (ព្រែកក្តាម-ធ្លាម្អម) មានប្រវែង ១៣៥,២៥គីឡូម៉ែត្រ សម្រេចបាន ប្រមាណ៦៤% គ្រោងនឹងបញ្ចប់នៅពាក់កណ្តាលឆ្នាំ២០២២។ កំណាត់ទី៣៖ ភាគកណ្តាល (ធ្លាម្អម-បាត់ដំបង និងសិរីសោភ័ណ-ប៉ោយប៉ែត) មានប្រវែង ១៤៦,០៤គីឡូម៉ែត្រ ដែលកំណាត់ធ្លាម្អម-បាត់ដំបង សម្រេចបានប្រមាណ៥៥% និងកំណាត់សិរីសោភ័ណ-ប៉ោយប៉ែត កំពុងរៀបចំនីតិវិធីដេញថ្លៃជ្រើសរើស ក្រុមហ៊ុនសាងសង់៕