ភ្នំពេញ ៖ នៅក្នុងសេចក្តីជូនដំណឹង របស់ក្រសួងសាធារណៈការ និងដឹកជញ្ជូន ដោយបានព្រមានចាត់វិធាន ឃាត់ទុកយានយន្ត ដឹកជញ្ជូនលើសទម្ងន់កម្រិតកំណត់ ដែលផ្ទុកទម្ងន់ លើសពី ២០(ម្ភៃ)ភាគរយ ក្នុងរយៈពេល ១ឆ្នាំ និងគ្មានការលើកលែងនិងបានបញ្ជាក់ថា ទោះបីជាគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានធ្វើការផ្សព្វផ្សាយ អប់រំណែនាំច្បាប់និងលិខិតបទដ្ឋានគតិយុត្តអស់រយៈពេលជាច្រើនឆ្នាំ ព្រមទាំងបាន ចេញសេចក្តីជូនដំណឹងបន្តបន្ទាប់ ជាពិសេសសេចក្តីជូនដំណឹងលេខ០៤៩សជណ.សក.គតលទ ចុះថ្ងៃ ទី២៨ ខែតុលា ឆ្នាំ២០២០ ស្តីពីការពង្រឹងវិធានការតឹងរ៉ឹងបន្ថែមចំពោះយានយន្តដឹកជញ្ជូនធុនធ្ងន់ ដែលបើកបរលើបណ្តាញផ្លូវថ្នល់ក៏ដោយ ក៏នៅតែសង្គេតឃើញថា ម្ចាស់ក្រុមហ៊ុនដឹកជញ្ជូន ឬម្ចាស់រថយន្ត ធុនធ្ងន់ និងអ្នកបើកបររថយន្ដធុនធ្ងន់មួយចំនួនតូច នៅតែព្រងើយកន្តើយ និងមិនព្រមចូលរួមអនុវត្តតាម បទប្បញ្ញត្តិច្បាប់និងលិខិតបទដ្ឋានគតិយុត្តជាធរមានឱ្យបានត្រឹមត្រូវនៅឡើយ។ នៅក្នុងសេចក្តីជូនដំណឹងដដែលនោះបន្តថា ជាក់ស្តែង បន្ទាប់ពីរថយន្ត ដែលផ្ទុកលើសទម្ងន់កម្រិតកំណត់ចំនួន ២២៩គ្រឿង ដែលបានឃាត់ទុករយៈពេល១ (មួយ)ឆ្នាំ ត្រូវបានសម្តេចតេជោនាយករដ្ឋមន្តី នៃព្រះរាជាណាចក្រកម្ពុជា លើកលែងបន្ធូរបន្ថយ កាលពីថ្ងៃទី៣០ ខែ កញ្ញា ឆ្នាំ២០២១ ដើម្បីផ្ដល់ឱកាសដល់ម្ចាស់រថយន្តទាំងនោះ ឱ្យចូលរួមគោរពប្រតិបត្តិ និងអនុវត្តតាម បទប្បញ្ញត្តិច្បាប់ឱ្យម៉ឺងម៉ាត់ និងត្រឹមត្រូវទាំងអស់គ្នា។ ប៉ុន្តែរហូតមកដល់បច្ចុប្បន្ននេះ នៅតែមានរថយន្ត ដឹកជញ្ជូនលើសទម្ងន់កម្រិតកំណត់ ដែលផ្ទុកទម្ងន់លើសពី២០(ម្ភៃ)ភាគរយ ធ្វើចរាចរណ៍នៅលើបណ្តាញ ផ្លូវថ្នល់ ហើយត្រូវបានមន្ត្រីមានសមត្ថកិច្ចប្រចាំស្ថានីយជញ្ជីងអចល័ត និងជញ្ជីងចល័តនៃក្រសួងសាធារណការ និងដឹកជញ្ជូន បង្ក្រាប និងស្ទាក់ចាប់បានចំនួន ៧៥គ្រឿង។ ផ្អែកលើមូលដ្ឋានដូចបានរៀបរាប់ខាងលើ ដើម្បីពង្រឹងវិធានការអនុវត្តតាមបទប្បញ្ញត្តិច្បាប់ស្តីពី ផ្លូវថ្នល់និងលិខិតបទដ្ឋានគតិយុត្តពាក់ព័ន្ធឱ្យមានប្រសិទ្ធភាពខ្ពស់និងប្រសិទ្ធផលល្អ គណៈកម្មាធិការដឹកនាំ ការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ សូមធ្វើការក្រើនរម្លឹកសារជាថ្មីដូចខាងក្រោម៖ ១. ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ ម្ចាស់ការដ្ឋានអាជីវកម្មថ្ម ម្ចាស់ដេប៉ូខ្សាច់ ម្ចាស់ការដ្ឋានជីកយកអាចម៍ដី ឬប្រតិបត្តិករដឹកជញ្ជូនធុនធ្ងន់ទាំងអស់ ត្រូវអនុវត្តយ៉ាងម៉ឺងម៉ាត់តាម សេចក្តីជូនដំណឹងលេខ០៤៩សជណ.សក.គតលទំ ចុះថ្ងៃទី២៨ ខែតុលា ឆ្នាំ២០២០ ស្តីពីការពង្រឹង វិធានការតឹងរ៉ឹងបន្ថែមចំពោះយានយន្តដឹកជញ្ជូនធុនធ្ងន់ដែលបើកបរលើបណ្តាញផ្លូវថ្នល់។ ២. ម្ចាស់រោងចក្រផលិតស៊ីម៉ងត៍ ម្ចាស់ការដ្ឋានអាជីវកម្មថ្ម ម្ចាស់ដេប៉ូខ្សាច់ ម្ចាស់ការដ្ឋានជីក យកអាចម៍ដី ឬប្រតិបត្តិករដឹកជញ្ជូនធុនធ្ងន់ទាំងអស់ ត្រូវធ្វើការណែនាំដល់អ្នកបើកបររថយន្តរបស់ខ្លួនឱ្យ ផ្ទុកទម្ងន់ត្រឹមត្រូវតាមច្បាប់កំណត់ មុនពេលដឹកជញ្ជូនទំនិញចេញពីចំណុចគោលដៅដើមទីនីមួយៗ។ ៣. ក្នុងករណីនៅតែបណ្តែតបណ្តោយឱ្យអ្នកបើកបរ ឬចរាចរណ៍រថយន្តផ្ទុកទម្ងន់លើស កម្រិតកំណត់ ជាពិសេសការផ្ទុកទម្ងន់លើសពី ២០(ម្ភៃ)ភាគរយ ឡើងទៅ ធ្វើចរាចរណ៍នៅតាមបណ្តាញ ផ្លូវថ្នល់ នឹងត្រូវឃាត់ទុករថយន្តក្នុងរយៈពេល១(មួយ)ឆ្នាំ ស្របតាមមាត្រា៦០ នៃច្បាប់ស្តីពីផ្លូវថ្នល់ ដោយ គ្មានការលើកលែងតទៅទៀតឡើយ។ ៤. អាជ្ញាធរដែនដីគ្រប់លំដាប់ថ្នាក់ នឹងចូលរួមផ្តល់កិច្ចសហការជាមួយគណៈកម្មាធិការ សម្របសម្រួលអចិន្ត្រៃយ៍ ដើម្បីចាត់វិធានការបង្ក្រាបបទល្មើសយានយន្តដឹកជញ្ជូនលើសទម្ងន់កម្រិត កំណត់ដែលបំផ្លិចបំផ្លាញហេដ្ឋារចនាសម្ព័ន្ធផ្លូវថ្នល់ នៅក្នុងដែនសមត្ថកិច្ចរាជធានី ខេត្តនីមួយៗ។ ៥. ការចូលរួមគោរពប្រតិបត្តិ និងអនុវត្តតាមបទប្បញ្ញត្តិច្បាប់និងលិខិតបទដ្ឋានគតិយុត្តឱ្យ បានត្រឹមត្រូវរបស់ប្រតិបត្តិករដឹកជញ្ជូនធុនធ្ងន់ទាំងអស់ ជាចំណែកដ៏សំខាន់មួយដើម្បីធានាការពារហេដ្ឋា រចនាសម្ព័ន្ធផ្លូវថ្នល់ ស្ពាន និងសំណង់សិល្បការ្យផ្លូវថ្នល់ឱ្យបានរឹងមាំ ស្ថិតស្ថេរ គង់វង្ស ធន់ជាប់តាមអាយុ កាលបច្ចេកទេស និងរួមចំណែកកាត់បន្ថយថវិកាជាតិក្នុងការជួសជុលថែទាំផ្លូវថ្នល់ ក្នុងគ្រាដែលប្រទេស ជាតិកំពុងប្រឈមនឹងវិបត្តិជម្ងឺកូវិត(Covid-19)៕