[Rasmei Kampuchea Daily News] - អាជ្ញាធរខណ្ឌទួលគោក ជួលជុលផ្លូវ២៥៩ ចាប់ពីសហព័ន្ធរុស្ស៊ី ដល់ផ្លូវកម្ពុជាក្រោម ជាគម្រោងមូលនិធិសង្កាត់ ឆ្នាំ២០២១
ភ្នំពេញៈ កំណាត់ផ្លូវលេខ២៥៩ គឺចាប់ផ្ដើមពីមហាវិថីសហព័ន្ធរុស្ស៊ី ដល់ផ្លូវកម្ពុជាក្រោម ស្ថិតនៅក្នុងសង្កាត់ទឹកល្អក់ទី១ ខណ្ឌទួលគោក បានដំណើរការ ជួសជុល ក្រោយរដូវភ្លៀងបានបញ្ចប់ ។
លោក ប៉ិច សុខឃឿន ចៅសង្កាត់ទឹកល្អក់ទី១ បានមានប្រសាសន៍ ឲ្យដឹង នៅព្រឹកថ្ងៃទី២០ ខែធ្នូ ឆ្នាំ២០២១ នេះថាៈ អនុវត្តតាមការណែនាំរបស់លោក ឃួង ស្រេង អភិបាលរាជធានីភ្នំពេញ គឺបានជម្រុញអោយអាជ្ញាធរខណ្ឌ សង្កាត់ ជួសជុល កំណាត់ផ្លូវ ដែលខូចខាតឡើងវិញ ដើម្បីសម្រួលការធ្វើចរាចរណ៍ របស់បងប្អូនប្រជាពលរដ្ឋ ។ កំណាត់ផ្លូវលេខ២៥៩ មួយខ្សែ ដែលមានប្រវែងប្រមាណជាង ១០០ ម៉ែត្រ ត្រូវបានអាជ្ញាធរខណ្ឌទួលគោក ធ្ជួសជុលឡើងវិញ ក្រោយពីខូចខាត ដោយកន្លែងខ្លះ មានជង្ហុក សំបុកមាន់ ដើម្បីសម្រួលការធ្វើចរាចរណ៍ របស់បងប្អូន ប្រជាពលរដ្ឋ និងម្យ៉ាងទៀតដើម្បីជាការលើកសោភ័ណភាព រាជធានីភ្នំពេញ ឲ្យមានភាពស្រស់បំព្រង សមជាទីក្រុង ដែលជាបេះដូង នៃព្រះរាជាណាចក្រកម្ពុជា។
លោកបានបន្តថាៈ ជាក់ស្តែង នៅថ្ងៃទី២០ ធ្នូនេះ យើងបានធ្វើការជួសជុលអ៊ុតកៅស៊ូ ផ្លូវ ២៥៩ ដោយចាប់ពីផ្លូវសហព័ន្ធរុស្ស៊ី រហូតដល់ផ្លូវកម្ពុជាក្រោម ។ ការជួសជុល ផ្លូវ២៥៩ នេះ គឺត្រូវជួសជុល ដោយអ៊ុតកៅស៊ូ អាស់ហ្វា ដោយចាប់ផ្តើមអនុវត្ត ចាប់ពីព្រឹកថ្ងៃទី២០ ធ្នូ ២០២១ ដោយធ្វើការជួសជុល តែមួយថ្ងៃប៉ុណ្ណោះ ដែលជាគម្រោងមូលនិធិសង្កាត់ ឆ្នាំ២០២១៕
