[The World News] - ការតម្លើងម៉ូទ័របូមទឹកខ្នាតធំ បីគ្រឿង នៅស្ថានីយ៍បូមទឹក បឹងទំពុន ដែលមានសមត្ថភាព បូមទឹកបាន ១២ ម៉ែត្រគូប ក្នុងមួយវិនាទី នឹងរួចរាល់នៅខែមីនា ឆ្នាំ២០២២ ខាងមុខនេះ
2021-12-15
Go to the website published The World News
ភ្នំពេញៈ ក្រុមការងារនៃមន្ទីរសាធារណការ និងដឹកជញ្ជូន រាជធានីភ្នំពេញ ក្រោមការណែនាំពីលោក ឃួង ស្រេង អភិបាលរាជធានីភ្នំពេញ បាននិងកំពុងធ្វើសកម្ម ភាព តម្លើងម៉ូទ័របូមទឹកខ្នាតធំ ដែលមានអង្កត់ផ្ចឹត ទំហំ ១,៥ ម៉ែត្រ ចំនួន មួយគ្រឿង និងខ្នាតទំហំអង្កត់ផ្ចឹត ១,២ ម៉ែត្រ ចំនួន ពីរគ្រឿង នៅស្ថានីយ៍បូមទឹក បឹងទំពុន ។
ប្រធានមន្ទីរសាធារណការ និងដឹកជញ្ជូន រាជធានីភ្នំពេញ លោក សាំ ពិសិដ្ឋ បានបញ្ជាក់ឲ្យដឹង នៅរសៀល ថ្ងៃទី១៥ ខែធ្នូនេះថាៈ ម៉ូទ័របូមទឹក ទាំងបីគ្រឿងនេះ មានសមត្ថភាព បូមទឹក ៤២.០០០ ម៉ែត្រគូប ក្នុងមួយម៉ោង ឬស្មើនឹង ១២ ម៉ែត្រគូប ក្នុងមួយវិនាទី ដែលជាគម្រោងសាងសង់ បន្ថែមសមត្ថភាពបូមទឹក លើស្ថានីយ៍បច្ចុប្បន្ន ធ្វើអោយសមត្ថភាពបូមទឹកថ្មី កើនរហូតដល់ ៣៣ ម៉ែត្រគូប ក្នុងមួយវិនាទី។
លោក សាំ ពិសិដ្ឋ បានបន្តថាៈ ការតម្លើងម៉ូទ័របូមទឹកខ្នាតធំ ខាងលើនេះ យើងបានអនុវត្ត តាំងពីថ្ងៃទី៣ ខែធ្នូ ឆ្នាំ២០២១ មកម្ល៉េះ ពោលគឺទាំងម៉ូទ័រ ទាំងទូរបញ្ជា រួមទាំងការតភ្ជាប់ បំពង់បង្ហូរទឹកក្រោមផ្លូវ ៣៧១ យើងបានស្ថាបនារួចរាល់។ ជារួម លទ្ធផល គិតមកដល់ ពេលនេះ ក្រុមការងារសម្រេចបាន ប្រមាណ ៧០ ភាគរយ។ គម្រោងនេះ នឹងបញ្ចប់ ១០០% នៅក្នុងខែមីនា ឆ្នាំ២០២២ ។
លោក សាំ ពិសិដ្ឋ បានបញ្ជាក់ថាៈ អភិបាល នៃអភិបាល រាជធានីភ្នំពេញ លោក ឃួង ស្រេង បានយកចិត្តទុកដាក់ខ្លាំងណាស់ ជុំវិញបញ្ហាខាងលើនេះ ដោយលោកបានជំរុញឲ្យ ក្រុមការងារ នៃមន្ទីរសាធារណការ និងដឹកជញ្ជូន រាជធានីភ្នំពេញ ពន្លឿនការស្ថាបនា ការដំឡើងម៉ូទ័របូមទឹក ខ្នាតធំខាងលើនេះ ឱ្យបានរួចរាល់ នៅមុនរដូវវស្សា មកដល់ ដើម្បីយើងអាចបូមទឹក រំដោះការលិចលង់ លំនៅដ្ឋានប្រជាពលរដ្ឋ នៅរដូវវស្សា ឆ្នាំ២០២២ ខាងមុខនេះ។
លោក សាំ ពិសិដ្ឋ បានបន្តទៀតថាៈ ស្ថានីយ៍នេះ នឹងក្លាយជាស្ថានីយ៍ មានម៉ូទ័របូមទឹក ខ្នាតធំ ជាងគេ និងសមត្ថភាពបូមទឹកធំជាងគេ ក្នុងរាជធានីភ្នំពេញ ដែលធានាកាត់បន្ថយ ការលិចលង់ នៅតំបន់ភូមិសាស្ត្របឹងទំពុន ស្ទឹងមានជ័យ មហាវិថីសម្តេចចៅហ្វាវាំង គង់ សំអុល (ផ្លូវលេខ ២០០៤) ស្តុបម៉ុងឌីយ៉ាល់ និងតំបន់ខាងត្បូង និងខាងកើតអាកាស យានដ្ឋានអន្តរជាតិភ្នំពេញ ៕
