[Rasmei Kampuchea Daily News] - ទេសរដ្ឋមន្ត្រី ស៊ុន ចាន់ថុល ប្រជុំពិភាក្សាលើគម្រោងសាងសង់ ហេដ្ឋារចនាសម្ព័ន្ធផ្លូវ ចំនួន ៣៨ ខ្សែ នៅក្រុងសៀមរាប ដើម្បីស្វែងរកដំណោះស្រាយ ចំពោះបញ្ហាប្រឈម និងសំណូមពរ
សៀមរាបៈ នៅព្រឹកថ្ងៃទី២៦ ខែតុលា ឆ្នាំ២០២១ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចពិភាក្សា លើគម្រោងសាងសង់ ហេដ្ឋារចនាសម្ព័ន្ធផ្លូវ ចំនួន ៣៨ ខ្សែ នៅក្រុងសៀមរាប ខេត្តសៀមរាប ដោយមានការចូលរួម ពីថ្នាក់ដឹកនាំក្រសួង អភិបាលនៃគណៈអភិបាល ខេត្តសៀមរាប ប្រធាន គណៈកម្មការខេត្ត អង្គភាពសាងសង់ ក្រុមការងារត្រួតពិនិត្យបច្ចេកទេស មន្ត្រីជំនាញបច្ចេកទេស ក្រោមឱវាទក្រសួង និងភាគីពាក់ព័ន្ធ។កិច្ចប្រជុំនេះ បានធ្វើឡើងក្នុងគោលបំណង ស្ដាប់ការធ្វើបទបង្ហាញ ទាក់ទងនឹងបញ្ហាបច្ចេកទេស បញ្ហាប្រឈម សំណូមពរ របស់ក្រុមទទួលបន្ទុក ការងារសាងសង់នីមួយៗ សំដៅស្វែងរក ដំណោះស្រាយ ក៏ដូចជា ផ្ដល់អនុសាសន៍នានា ដើម្បីធានាឱ្យការសាងសង់ផ្លូវ ទាំង ៣៨ ខ្សែនេះ មានគុណភាពខ្ពស់ ស្របតាមបទដ្ឋាន បច្ចេកទេស និងសៀវភៅបន្ទុក ធ្វើឱ្យបានរឹងមាំ ជាប់គង់វង្សយូរអង្វែង។
លោកទេសរដ្ឋមន្ត្រី បានថ្លែងអំណរគុណ និងកោតសរសើរ យ៉ាងជ្រាលជ្រៅ ចំពោះអង្គភាព សាងសង់ទាំងអស់ ដែលបានខិតខំប្រឹងប្រែង បំពេញការងាររបស់ខ្លួន ដោយយកចិត្តទុកដាក់ និងប្រកបដោយការទទួលខុសត្រូវខ្ពស់ ព្រមទាំងបានផ្ដាំផ្ញើ ឱ្យភាគីពាក់ព័ន្ធទាំងអស់ សហការ និងពិភាក្សាគ្នា រិះរកបច្ចេកទេសល្អៗ ដើម្បីសាងសង់សង់ផ្លូវ ទាំង ៣៨ ខ្សែនេះ ឱ្យកាន់តែមាន គុណភាពខ្ពស់ ហើយក្នុងករណីការសាងសង់ កន្លងមក មិនត្រឹមត្រូវ តាមលក្ខណៈបច្ចេកទេស ត្រូវកែសម្រួលឱ្យត្រូវ តាមបទដ្ឋានបច្ចេកទេស ឡើងវិញ។យោងតាមរបាយការណ៍របស់ អគ្គនាយកដ្ឋានបច្ចេកទេស នៃក្រសួងសាធារណការ និងដឹកជញ្ជូន បានឱ្យដឹងថាៈ វឌ្ឍនភាពគម្រោងសាងសង់ ហេដ្ឋារចនាសម្ព័ន្ធផ្លូវ ៣៨ ខ្សែ នៅក្រុងសៀមរាប ខេត្តសៀមរាបនេះ គិតត្រឹមថ្ងៃទី១៥ ខែតុលា ឆ្នាំ២០២១ ឬរយៈពេលជាង ១១ ខែ សម្រេចបាន ៨៣,៨៧% នៃទំហំការងារសរុប (២% លឿនជាងផែនការ)។ គម្រោងនេះ គ្រោងបញ្ចប់ការស្ថាបនា នៅចុងខែធ្នូ ឆ្នាំ ២០២១ខាង មុខនេះ។
គួរកត់សម្គាល់ផងដែរថា បញ្ហាប្រឈម នៅរដូវធ្លាក់ភ្លៀង និងវិបត្តិនៃជំងឺកូវីដ-១៩ ក្នុងអំឡុងសាងសង់ផ្លូវ ៣៨ ខ្សែ នៅក្រុងសៀមរាប ខេត្តសៀមរាប មិនបានធ្វើឱ្យប៉ះពាល់ ដល់ដំណើរការ អង្គភាពសាងសង់ឡើយ ដោយហេតុថា គ្រប់អង្គភាពទាំងអស់ បានខិតខំប្រឹងប្រែង បំពេញការងាររបស់ខ្លួន យ៉ាងសកម្ម ដើម្បីជំរុញការងារស្ថាបនា ឱ្យសម្រេចតាមផែនការ ដែលបានគ្រោងទុក៕
