(ភ្នំពេញ)៖ ក្រសួងសាធារណការ និងដឹកជញ្ជូន បាននិងកំពុងពន្លឿនដំណើការពិភាក្សាលើសេចក្តីព្រាងអនុក្រឹត្យស្តីពី ការគ្រប់គ្រងលើការប្រើប្រាស់ដីចំណីផ្លូវនៅតាមបណ្តាញផ្លូវ និងផ្លូវរថភ្លើង ឲ្យបានរួចរាល់ក្នុងពេលខាងមុខ។ ក្រសួងសាធារណការ បានដឹងថា ឯកឧត្តម ប៉ាល់ ចន្ទតារា រដ្ឋលេខាធិការ នៅថ្ងៃទី២១ ខែតុលា ឆ្នាំ២០២១ បានដឹកនាំកិច្ចប្រជុំក្រុមការងារពិនិត្យ និងពិភាក្សាលើសេចក្តីព្រាងអនុក្រឹត្យស្តីពីការគ្រប់គ្រងលើកិច្ចការប្រើប្រាស់ដីចំណីផ្លូវ នៅតាមបណ្តោយផ្លូវ និង ផ្លូវរថភ្លើង ដោយមានការអញ្ជើញចូលរួម ដោយផ្ទាល់ និងតាមប្រព័ន្ធវីដេអូពីចម្ងាយពីថ្នាក់ដឹកនាំក្រសួង និងមន្ត្រីជំនាញបច្ចេកទេសពាក់ព័ន្ធ។ កិច្ចប្រជុំនេះធ្វើឡើងក្នុងគោលបំណងពិនិត្យពិភាក្សា និងកែសម្រួលចំពោះខ្លឹមសារសេចក្តីព្រាងអនុក្រឹត្យស្តីពីការគ្រប់គ្រង ការប្រើប្រាស់ដីចំណីផ្លូវ នៅតាមបណ្តោយផ្លូវថ្នល់ និងផ្លូវរថភ្លើង ក៏ដូចជាដើម្បីប្រមូលធាតុ ចូលឱ្យកាន់តែទូលំទូលាយ ដើម្បីបំពេញបន្ថែមនូវចំណុចខ្វះខាត និងធ្វើយ៉ាងណាឱ្យការរៀបចំសេចក្ដីព្រាងអនុក្រឹត្យនេះមានខ្លឹមសារកាន់តែសុក្រឹត្យច្បាស់លាស់ និង គ្រប់ជ្រុងជ្រោយសំដៅគ្រប់គ្រងរក្សាការពារដីចំណីផ្លូវឱ្យមានប្រសិទ្ធិភាព ក្នុងគោលដៅបម្រើឱ្យផលប្រយោជន៍សាធារណៈ និងទប់ស្កាត់ការរំលោភដីចំណីផ្លូវ។ អង្គប្រជុំស្នើឱ្យមានការរៀបចំពង្រាងអនុក្រឹត្យស្តីពីការគ្រប់គ្រងការប្រើប្រាស់ដីចំណីផ្លូវ នៅតាមបណ្តោយផ្លូវថ្នល់ និងផ្លូវរថភ្លើង ជាពីរដាច់ដោយឡែកពីគ្នា គឺមួយសម្រាប់ផ្លូវថ្នល់ និងមួយទៀតសម្រាប់ផ្លូវរថភ្លើង ហើយក៏បានពិភាក្សាកែសម្រួលចំណងជើងនៃអនុក្រឹត្យ ការកំណត់ដីចំណីផ្លូវ ការប្រែប្រួលដែនកំណត់ជាក់ស្តែងនៃដីចំណីផ្លូវនៅក្នុងកាលៈទេសៈមានការផ្លាស់ប្តូរអ័ក្សទ្រូងផ្លូវ ការបោះបង្គោលកំណត់ដីចំណីផ្លូវ និង ខ្លឹមសារលំអិតនៃមាត្រានីមួយៗ។ ជាមួយគ្នានោះផងដែរ អង្គប្រជុំបានឯកភាពលើការកំណត់របៀបរបបនៃប្រជុំពិភាក្សាសេចក្តីព្រាងអនុក្រឹត្យនេះ ដើម្បីពន្លឿនការរៀបចំសេចក្តីព្រាងអនុក្រឹត្យនេះឱ្យបានឆាប់ចប់៕