ភ្នំពេញ៖ ក្រសួង​សាធារណការនិងដឹក​ជញ្ជូន​ បាន​ដាក់​ឱ្យ​ប្រើប្រាស់​​កំណាត់ផ្លូវ​ជាតិ​លេខ​៥ពីបាត់ដំបង-សិរីសោភ័ណជាផ្លូវការ ក្រោយសាងសង់រួច ១០០ភាគរយនៃ​គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគខាងជើង(បាត់ដំបង-សិរីសោភ័ណ)។ បើតាម​ក្រសួង​សាធារណការ កំណាត់ផ្លូវ​ជាតិ​លេខ​៥ ពីបាត់ដំបង-សិរីសោភ័ណនេះមានប្រវែងសរុប ៨៤,៧៤ គីឡូម៉ែត្រ ដោយ​​ចំណាយ​រយៈពេល​សាងសង់ជាង ៣ឆ្នាំ​។ កំណាត់ផ្លូវជាតិលេខ៥ ពីបាត់ដំបងដល់សិរីសោភ័ណ ប្រវែង៨៤,៧៤គីឡូម៉ែត្រ ដែលជាជំនួយរបស់​រដ្ឋាភិបាលជប៉ុន​ត្រូវ​បាន​ដាក់​ដំណើរជាផ្លូវការ​ ក្រោយសាងសង់រួចរាល់ ១០០ភាគរយ។ កំណាត់ផ្លូវនេះ​​ចាប់ផ្តើមបើកការដ្ឋាន​សាងសង់កាលពីឆ្នាំ​២០១៨ ចេញពីខេត្តបាត់ដំបងរហូតដល់ក្រុងសិរីសោភ័ណ ខេត្ត​បន្ទាយមានជ័យ ។ លោក តូច ចាន់កុសលរដ្ឋលេខាធិការប្រចាំការក្រសួងសាធារណការ និងដឹកជញ្ជូនដែលដឹកនាំក្រុមការងារបច្ចេកទេសក្រសួង រួមទាំង​តំណាង JICA ប្រចាំកម្ពុជាចុះត្រួតពិនិត្យប្រគល់-ទទួល កំណាត់ផ្លូវជាតិលេខ៥ ពីបាត់ដំបង ដល់សិរីសោភ័ណលើក​ឡើងយ៉ាងដូច្នេះ៖ «ឡានដឹកទំនិញធំៗអាចបង្វែរចរាចរណ៍ពីការឆ្លងកាត់ទីរួមខេត្ត មកផ្លូវវាងក្រុងថ្មីនេះវិញដើម្បីបង្ការកុំឱ្យមានគ្រោះថ្នាក់ចរាចរណ៍ ជួយការពារបរិស្ថាន សុខភាពសាធារណៈ។ ហើយចំនេញពេលវេលាក្នុងការធ្វើដំណើរ និងរួមចំណែកកាត់បន្ថយការកកស្ទះនៅទីរួមខេត្ត»។ បើតាមក្រសួងសាធារណការគម្រោង​ស្ថាបនា​កំណាត់ផ្លូវនេះ បាន​បែង​ចែក​ជា​ពីរ​កញ្ចប់ការងារ​ ដោយ​កញ្ចប់​ការងារទី១សាងសង់ដោយសម្ព័ន្ធក្រុមហ៊ុន Tekken-Taiyo Joint Venture មានប្រវែង ៤៦,២៧គីឡូម៉ែត្រ និងកញ្ចប់ការងារទី២ សាងសង់ដោយសម្ព័ន្ធក្រុមហ៊ុន Daiho-AsanumaJoint Venture មានប្រវែង ៣៨,៤៧គីឡូម៉ែត្រ។ ​ដើម្បី​បន្ថែម​សោភ័ណភាព និង​ការពារដល់ព្រំដីចំណីផ្លូវលើ​កំណាត់​ផ្លូវ​ជាតិលេខ៥នេះក្រសួង​សាធារណការ បាន​ដាំលម្អដើមត្របែកព្រៃ និងចំប៉ីនៅចំកណ្ដាលទ្រូងផ្លូវចំនួន៧១១០ដើម និងដើមក្ងោកនៅអមសងខាងផ្លូវវាង​ចំនួន ៦០០០ដើម។ រដ្ឋលេខាធិការប្រចាំការក្រសួងសាធារណការរូបនេះអះអាងថា ក្រោយ​ស្ថាបនា​រួចរាល់ ក្រុមហ៊ុនម៉ៅការសាងសង់ នឹងបន្តថែទាំកំណាត់​ផ្លូវ​ជាតិ​លេខ៥ពី​បាត់ដំបង-សិរីសោភ័ណនេះ រយៈពេលមួយឆ្នាំទៀត។ ជាមួយគ្នានេះ លោក តូច ចាន់កុសលក៏បាន​ស្នើសុំដល់អភិបាលខេត្តទាំងពីរ បន្តការការពារថែរក្សានិងគ្រប់គ្រងដីចំណីផ្លូវ៦០ម៉ែត្រ ដែលរដ្ឋបានចំណាយថវិកាជាតិទិញពីពលរដ្ឋ។ សូមបញ្ជាក់ថា​គម្រោងធ្វើឱ្យប្រសើរឡើងផ្លូវជាតិលេខ៥ មានប្រវែងសរុបចំនួន ៣៦៦គីឡូម៉ែត្រឆ្លងកាត់ខេត្តកណ្តាល កំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យជាគម្រោងក្រោមហិរញ្ញប្បទានសម្បទានពីរដ្ឋាភិបាលជប៉ុនតាមរយៈទីភ្នាក់ងារសហប្រតិបត្តិការអន្តរជាតិជប៉ុនប្រចាំកម្ពុជា(JICA) ដោយ​គ្រោងចំណាយថវិកាប្រមាណ៥០០លានដុល្លារ​៕