ថ្ងៃសុក្រ ១១កើត ខែភទ្របទ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៧ ខែកញ្ញា ឆ្នាំ២០២១ នៅទីស្ដីការក្រសួង ឯកឧត្តម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំក្រុមការងារពិនិត្យ និងពិភាក្សាលើសេចក្តីព្រាងអនុក្រឹត្យស្តីពីការគ្រប់គ្រង លើកិច្ចការប្រើប្រាស់ដីចំណីផ្លូវនៅតាមបណ្តោយផ្លូវថ្នល់ និងផ្លូវរថភ្លើង ដោយមានការអញ្ជើញចូលរួមដោយផ្ទាល់ និងតាមប្រព័ន្ធវីដេអូពីចម្ងាយពីថ្នាក់ដឹកនាំក្រសួង និងមន្ត្រីជំនាញបច្ចេកទេសពាក់ព័ន្ធ។ កិច្ចប្រជុំនេះធ្វើឡើងក្នុងគោលបំណងពិនិត្យពិភាក្សា និងកែសម្រួលសេចក្តីព្រាងអនុក្រឹត្យស្តីពីការគ្រប់ គ្រងលើកិច្ចការប្រើប្រាស់ដីចំណីផ្លូវនៅតាមបណ្តោយផ្លូវថ្នល់ និងផ្លូវរថភ្លើង ក៏ដូចជាដើម្បីប្រមូលធាតុ ចូលឱ្យកាន់តែទូលំទូលាយ ដើម្បីបំពេញមន្ថែមចំណុចខ្វះខាត ធ្វើយ៉ាងណាឱ្យការរៀបចំសេចក្ដីព្រាងអនុក្រឹត្យនេះមានខ្លឹមសារកាន់តែច្បាស់លាស់គ្រប់ជ្រុងជ្រោយ។ ជាកិច្ចចាប់ផ្តើម ឯកឧត្តមរដ្ឋលេខាធិការ បានគូសបញ្ជាក់អំពីសារសំខាន់នៃអនុក្រឹត្យស្តីពីការគ្រប់គ្រងដី ចំណីផ្លូវនៅតាមបណ្តាញផ្លូវថ្នល់ និងផ្លូវរថភ្លើងក្នុងការទប់ស្កាត់ការរំលោភដីចំណីផ្លូវ និងបានជំរុញលើក ទឹកចិត្តឱ្យអង្គប្រជុំទាំងមូលចូលរួមជាមតិយោបល់ និងជួយគិតគូរយកចិត្តទុកដាក់ធ្វើយ៉ាងណាឱ្យអនុក្រឹត្យនេះចេញទៅអាចអនុវត្តប្រកបដោយប្រសិទ្ធភាព និងភាពរលូន ចៀសផុតពីភាពស្រពេចស្រពិល ដល់មន្ត្រីអនុវត្តច្បាប់ និងមិនបង្កផលប៉ះពាល់ដល់ផលប្រយោជន៍ស្របច្បាប់។ អង្គប្រជុំបានឯកភាពតាមសំណើរបស់ឯកឧត្តមប្រធានអង្គប្រជុំលើការអានសេចក្តីព្រាងមួយជំពូកម្តងៗ យ៉ាងផុសផុល និងបានពិភាក្សាអំពីប្រវត្តិដើមរឿងនៃការរៀបចំសេចក្តីព្រាងអនុក្រឹត្យនេះ ចំណងជើង ទម្រង់នៃច្បាប់ និងមូលបទនៃសេចក្តីព្រាងអនុក្រឹត្យ និងបានឯកភាពលើសំណើសុំដាក់បញ្ចូលបន្ថែមនូវលិខិតបទដ្ឋានពាក់ព័ន្ធមួយចំនួនក្នុងមូលបទនៃសេចក្តីព្រាងអនុក្រឹត្យ និងបានឯកភាពបញ្ចូលមាត្រា១ និងមាត្រា២បញ្ចូលគ្នា ដើម្បីឱ្យស្របទៅតាមទម្រង់ថ្មី តាមរយៈសេចក្តីជូនដំណឹងរបស់ទីស្តីការគណៈរដ្ឋ មន្រ្តីនៅឆ្នាំ២០២០។ ជាលទ្ធផលនៃការពិភាក្សា អង្គប្រជុំបានឯកភាពរក្សាទុកចំណងជើងអនុក្រឹត្យនេះឱ្យនៅដដែល យោង តាមតម្រូវការបន្ទាន់ និងសភាពការណ៍ជាក់ស្តែងនាពេលបច្ចុប្បន្ន និងផ្អែកលើលិខិតបទដ្ឋានមួយចំនួនហើយយោងតាមគោលការណ៍ច្បាប់ ចំណងជើងត្រូវស្របតាមការចង្អុលបង្ហាញរបស់ច្បាប់ និងប្រវត្តិនៃការរៀបចំផងដែរ។ ជាមួយគ្នានោះផងដែរ ឯកឧត្តមប្រធានអង្គប្រជុំ បានស្នើឱ្យប្រធាននាយកដ្ឋាននីតិកម្មស្តីទីធ្វើការសម្រប សម្រួល និងស្នើសុំមតិយោបល់ពីមន្រ្តីពាក់ព័ន្ធទាំងអស់ ដើម្បីរៀបចំឡើងវិញអត្ថបទនៃមាត្រា១ថ្មីឱ្យស្រប ទៅតាមស្មារតី និងសេចក្តីជូនដំណឹងរបស់ទីស្តីការគណៈរដ្ឋមន្រ្តីសម្រាប់ដាក់ពិភាក្សាក្នុងកិច្ចប្រជុំលើកក្រោយ។ ជាទីបញ្ចប់ ឯកឧត្តមប្រធានអង្គប្រជុំ បានថ្លែងអំណរគុណយ៉ាងជ្រាលជ្រៅដល់ក្រុមការងារបច្ចេកទេស ដឹកនាំដោយឯកឧត្តមរដ្ឋលេខាធិការ លឹម ស៊ី ដេនីន ដែលបានជំរុញ និងរៀបចំកែសម្រួលឡើងវិញនូវ អនុក្រឹត្យលេខ.១៩៧ ស្តីពីការគ្រប់គ្រងដីចំណីផ្លូវតាមបណ្តោយផ្លូវជាតិ និងផ្លូវរថភ្លើង ចុះថ្ងៃទី២៦ ខែ កុម្ភៈ ឆ្នាំ១៩៩៦ យោងតាមអនុសាសន៍ណែនាំដ៏ខ្ពង់ខ្ពស់របស់ឯកឧត្តមទេសរដ្ឋមន្ត្រី៕