ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូន បានស្នើឱ្យ ធនាគារពិភពលោកជួយបំពាក់ប្រព័ន្ធគ្រប់គ្រងយានយន្តដឹកជញ្ជូនលើសទម្ងន់កម្រិតកំណត់ ដោយស្វ័យប្រវត្តិនៅតាមទីតាំងផ្លូវជាតិសំខាន់ៗ ខណៈនៅតែមានយានយន្តបន្តប្រព្រឹត្តបទល្មើសនឹងច្បាប់កំណត់។ ថ្លែងក្នុងឱកាសពិភាក្សាការងារជាមួយលោកស្រី ម៉ារីយ៉ាម សាលីម (Maryam Salim) នាយិកាគ្រប់គ្រងថ្មីនៃការិយាល័យធនាគារពិភពលោកប្រចាំកម្ពុជា តាមរយៈប្រព័ន្ធវីដេអូពីចម្ងាយ ឯកឧត្តមទេសរដ្ឋមន្ត្រី បានបញ្ជាក់ថា កម្ពុជាចង់បានប្រព័ន្ធនេះ ដោយសារវាមានសមត្ថភាពអាចចាប់ល្បឿនយានយន្ត ដឹងពីល្បឿន អត្តសញ្ញាណ និងទម្ងន់ផ្ទុករបស់យានយន្តដឹកជញ្ជូន ដែលឈានទៅកាត់បន្ថយការដឹកជញ្ជូនលើសទម្ងន់កម្រិតកំណត់ ដែលបង្កឱ្យផ្លូវឆាប់ខូចមុនអាយុកាល និងទប់ស្កាត់គ្រោះថ្នាក់ចរាចរណ៍។ ឯកឧត្តម ក៏បានស្នើទៅកាន់ធនាគារពិភពលោក ឱ្យជួយពិនិត្យលទ្ធភាពលើការរៀបចំកម្មវិធី ដើម្បីដោះស្រាយបញ្ហាសំខាន់ៗមួយចំនួនទាក់ទងនឹងបញ្ហាសុវត្ថិភាពចរាចរណ៍ផ្លូវគោក និងបញ្ហាគំនូសចរាចរណ៍និងសញ្ញាចរាចរណ៍គ្រប់ផ្លូវទាំងអស់នៅកម្ពុជា ដើម្បីជួយកាត់បន្ថយគ្រោះថ្នាក់ចរាចរណ៍ ឱ្យនៅកម្រិតទាបតាមដែលអាចធ្វើទៅបាន។ លោកស្រី ម៉ារីយ៉ាម សាលីម បានសម្តែងចំណាប់អារម្មណ៍ចំពោះសំណើនានាដែល ឯកឧត្តមទេសរដ្ឋមន្ត្រីបានលើកឡើង ដោយលោកស្រីបញ្ជាក់ថា ក្រុមការងារនឹងធ្វើការពិនិត្យពិចារណា និងសម្រប សម្រួលចំពោះសំណើទាំងនេះ។ សូមបញ្ជាក់ថា បច្ចុប្បន្ននេះ ធនាគារពិភពលោក បាននិងកំពុងអនុវត្តនូវគម្រោងអភិវឌ្ឍន៍ នានា ជាមួយរាជរដ្ឋាភិបាលកម្ពុជា និងដៃគូអភិវឌ្ឍន៍ ក្នុងកញ្ចបទឹកប្រាក់សរុបប្រមាណ១,១ប៊ីលានដុល្លារអាមេរិក ដែលភ្នាក់ងារ នានារបស់រាជរដ្ឋាភិបាលកំពុងអនុវត្ត តាមរយៈជំនួយហិរញ្ញវត្ថុ និងបច្ចេកទេសពីធនាគារ ពិភពលោក៕