ភ្នំពេញ៖រឿងអាស្រូវ ប្រធានមន្ទីរសាធារណការ និងដឹកជញ្ជូន ខេត្តព្រះសីហុន ត្រូវបានបែកធ្លាយ ជាសាធារណះហើយ។ មានការលើកឡើងថា ប្រធានមន្ទីរសាធារណការនិង ដឹកជញ្ជូនខេត្តព្រះសីហនុ លោកណុប ហេង ត្រូវប៉ាន់ខ្លាំងណាស់ តាមរយៈ កិបកេងលុយចំណាយ លើការងារថែទាំនិងជួសជុលផ្លូវ ការចំណាយលើការថែទាំ និងជួសជុលសម្ភារៈបច្ចេកទេស និងទទួលចំណូលពីមន្ត្រីគ្រប់គ្រងជញ្ជីងថ្លឹងរថយន្តទាំង២កន្លែង នៅផ្លូវជាតិលេខ៤ បានយ៉ាងស្ងាត់ស្ងៀម។ នេះបើតាមគេហទំព័រសារព័ត៌មាន ក្នុងស្រុកមួយបានចេញផ្សាយ មុននេះបន្តិច។ បើតាមគេហទំព័រ ដែលបានចេញផ្សាយនោះ ថា ក្នុងមួយឆ្នាំៗ លោកណុប ហេង ប្រធានមន្ទីរសាធារណការខេត្ត រូបនេះ អាចទទួលបានប្រាក់ ពីការកិបកេង លើការចំណាយក្នុងមន្ទីរ និង ចំណូលខ្មៅ ពីក្រុមជញ្ជីងថ្លឹងឡាន មានទឹកប្រាក់ មិនក្រោម ១០០០លានរៀល (មួយប៊ីលានរៀល) យ៉ាងស្ងាត់ស្ងៀម តាមរយះឃុបឃិត ជាមួយមន្ត្រីជំនិតមិនលើសពី៥នាក់ ។ ប្រភពបន្ថែមថា ចាប់ពីឆ្នាំ២០១៧ លោកណុប ហេង បានពង្រឹងអំណាច និងផ្លាស់ប្ដូរភារកិច្ច មន្ត្រីចាស់ៗចេញ ហើយដាក់ជំនួសមកវិញ មន្ត្រីក្មេង ដើម្បីងាយស្រួលបញ្ជា និងរកប្រយោជន៏ឱ្យខ្លួន ជាហេតុធ្វើឱ្យមន្ត្រីចាស់ៗ ក្ដៅក្រហាយ អាចកើតរឿងប្ដឹងតវ៉ា ទៅហើយ ។ សព្វថ្ងៃនេះលោក ណុប ហេង ក៏កំពុងជួយជ្រោមជ្រែង លើកតម្កើង កូនប្រុសខ្លួន ឈ្មោះ ហេង ប៊ុនហ៊ាន ជាបណ្ដើរៗ ដើម្បីត្រៀមបន្តតំណែងជាប្រធានមន្ទីរ នៅពេលរូបលោកចូលនិវត្តន៍ ។ ចំណែកអនុប្រធានមន្ទីរ មានដូចជា លោកជ្រា សារ៉ាវុធ លោកនុត លី និងលោកសុខ សារឿន កំពុងត្រូវបាន លោកប្រធានមន្ទីរណុប ហេង ផ្ដល់អំណាចកាន់តែតិចទៅៗ ប៉ុន្តែទោះជាយ៉ាងណាមន្ត្រីជើងចាស់ទាំងនេះ មិនហ៊ានតវ៉ាឡើយ ។ បើតាមប្រភពដដែលថាកន្លងទៅ លោកប្រធានមន្ទីរ តែងតែអួតអាង អំពីការទំនាក់ទំនង់ជិតស្និទ្ធជាមួយ លោករដ្ឋលេខាធិការ ដ៏មានអំណាចខ្លាំង នៅក្រសួងសាធារណការ ទើបធ្វើឱ្យ មន្ត្រីក្របខ័ណ្ឌទាំងជាង៦០នាក់ និងមន្ត្រីកិច្ចសន្យា មួយចំនួនទៀតមិនហ៊ានកម្រើក សុខចិត្តរក្សាភាពស្ងប់ស្ងាត់។ អង្គភាពសៀមរាបប៉ុស្ដិ៍ នៅមិនទាន់ ទទួលបានការ បកស្រាយបំភ្លឺពីលោកណុប ហេង បាននៅឡើយទេ នៅរសៀលថ្ងៃ១១មីនានេះ៕