គម្រោងផ្លូវក្រវាត់ក្រុងទី៤ បាននឹងកំពុងសិក្សា ខណៈរាជរដ្ឋាភិបាលកំពុងរកលុយមកសាងសង់ផងដែរ។ ប៉ុន្ដែ មុននឹងគម្រោងនេះបើកដំណើរការសាងសង់ ទាល់តែគម្រោងផ្លូវក្រវ៉ាត់ក្រុងទី៣ ត្រូវបានសាងសង់រួចរាល់ជាមុនសិន។ នេះបើតាមការលើកឡើងរបស់ឯកឧត្ដម ស៊ុន ចាន់ថុល ទេសរដ្ឋមន្រ្ដី រដ្ឋមន្ដ្រីក្រសួងសាធារណការ និងដឹកជញ្ជូន ក្នុងកម្មវិធី MPWT LIVE SHOW ស្ដីពីប្រធានបទ"សមិទ្ធផលហេដ្ឋារចនាសម្ព័ន្ធផ្លូវថ្នល់ចាប់ពីចុងឆ្នាំ២០១៨ ដល់ពេលបច្ចុប្បន្ន និងផែនការកំពុងបន្តរហូតដល់ឆ្នាំ ២០២៣" នាថ្ងៃទី៣០ ខែសីហា ឆ្នាំ២០២១នេះ។ ក្នុងនោះឯកឧត្ដមបានបញ្ជាក់យ៉ាងដូច្នេះថា « យើងបានកំពុងសាងសង់ក្រវ៉ាត់ក្រុងទី៣ ក៏ប៉ុន្ដែយើងក៏កំពុងសិក្សាដែរ កំពុងសិក្សាក្រវ៉ាត់ក្រុងទី៤ (...) អ៊ីចឹងយើងត្រៀមហើយ សិក្សាហើយ នឹងត្រៀមស្វែងរកថវិកាមកសាងសង់ក្រវ៉ាត់ក្រុងទី៤។ ប៉ុន្ដែមុនឈានទៅរកការសាងសង់ក្រវ៉ាត់ក្រុងទី៤ យើងត្រូវបញ្ចប់ការសាងសង់ក្រវ៉ាត់ក្រុងទី៣ ឲ្យក្លាយទៅជាក្រវ៉ាត់តែម្ដង។» ឯកឧត្ដមបន្ដថា «សព្វថ្ងៃនេះ ថវិកាដែលយើងមាន គឺសាងសង់ពាក់កណ្ដាលក្រវ៉ាត់ទេ។ ដោយសារត្រើយខាងកើតយើងត្រូវសាងសង់ស្ពានឆ្លងទន្លេមេគង្គនៅក្ដីតាកុយ យើងត្រូវសាងសង់ស្ពានឆ្លងទន្លេមេគង្គនៅកោះដាច់។ល។ ទើបយើងក្លាយទៅជាក្រវ៉ាត់ក្រុងពេញលេញ។ ដូច្នេះជំហ៊ានបន្ទាប់ គឺសាងសង់ស្ពាន សាងសង់ផ្លូវ ក្រវ៉ាត់ក្រុងផ្នែកខាងកើតទន្លេមេគង្គសិន ទើបឈានទៅរកការសាងសង់ក្រវ៉ាត់ទី៤។» សូមជម្រាបថា ផ្លូវក្រវ៉ាត់ក្រុងទី៣ ត្រូវបានបើកដំណើរការសាងសង់ និងគ្រោងបញ្ចប់នៅខែធ្នូ ឆ្នាំ២០២១ ខាងមុខនេះ។ ប៉ុន្ដែដោយសារគម្រោងនេះ មានភាពស្មុគស្មាញ និងមានផលប៉ះពាល់ច្រើន បូករួមជាមួយបញ្ហាដោយសារកូវីដ១៩ ផងដែរនោះ ធ្វើឲ្យការសាងសង់នឹងសម្រេចយឺតយ៉ាវជាងការកំណត់។ ប៉ុន្ដែទោះជាយ៉ាងណា គ្រោងនេះនឹងអាចបញ្ចប់នៅអំឡុងខែកញ្ញា ឆ្នាំ ២០២២ ខាងមុខវិញ។ ដូច្នេះមានន័យថាគម្រោងក្រវ៉ាត់ក្រុងទី៤ អាចនឹងត្រូវចាប់ផ្ដើមធ្វើនៅក្នុងអំឡុងចុងឆ្នាំ២០២២ ឬឆ្នាំបន្ទាប់ពីនេះ៕