ខេត្តកណ្តាល៖ ថ្ងៃសៅរ៍ ៥រោច ខែស្រាពណ៍ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី២៨ ខែសីហា ឆ្នាំ២០២១ ឯកឧត្តមទេសរដ្ឋមន្ត្រី ស៊ុន ចាន់ថុល ប្រធានក្រុមការងារថ្នាក់ជាតិរបស់រាជរដ្ឋាភិបាលចុះមូលដ្ឋានស្រុកកោះធំ បានអញ្ជើញដឹកនាំក្រុមការងារទៅទទួលសម្ភារបរិក្ខារវេជ្ជសាស្ត្រពីសប្បុរសជន ដើម្បីប្រគល់ជូនមន្ទីរពេទ្យបង្អែកស្រុកកោះធំ និងមណ្ឌលសុខភាពនានាក្នុងស្រុកកោះធំ នៅមន្ទីរពេទ្យស្រុកកោះធំ ខេត្តកណ្តាល។ ថ្លែងក្នុងកម្មវិធីប្រគល់-ទទួលសម្ភារបរិក្ខារវេជ្ជសាស្ត្រនាឱកាសនោះ ឯកឧត្តមទេសរដ្ឋមន្រ្តី បានជម្រាប ជូនផងដែរថា៖ រចនាសម្ព័ន្ធអាគារថ្មីនៃមន្ទីរពេទ្យបង្អែកស្រុកកោះធំ គ្រោងនឹងបើកការដ្ឋានក្នុងខែតុលា ឆ្នាំ២០២១ខាងមុខនេះ សាងសង់នៅលើទីតាំងចាស់ ហើយការសាងសង់មានរយៈពេល១២ខែ គ្រោងនឹងបញ្ចប់ការនៅឆ្នាំចុងឆ្នាំ២០២២ ដើម្បីផ្តល់សេវាថែទាំសុខភាព និងព្យាបាលអ្នកជំងឺឱ្យកាន់តែមានប្រសិទ្ធភាពខ្ពស់ សមរម្យ គុណភាពល្អ និងឆាប់រហ័សជូនដល់ប្រជាពលរដ្ឋរស់នៅក្នុងស្រុកកោះធំ ក៏ដូចជាបងប្អូនប្រជាពលរដ្ឋដែលរស់នៅក្នុងស្រុក និងតំបន់ដែលនៅជិតស្រុកកោះធំឱ្យទទួលបានទំនុកចិត្ត និងភាពកក់ក្តៅកាន់តែខ្លាំងឡើងក្នុងការទទួលសេវាសុខភាពពីរាជរដ្ឋាភិបាលកម្ពុជា។ ឆ្លៀតក្នុងឱកាសនោះដែរ ឯកឧត្តមទេសរដ្ឋមន្ត្រី បានជម្រាបជូនថា៖ អាគារមន្ទីរពេទ្យនេះមានគ្រែអ្នកជំងឺ ចំនួន១៥០ ត្រូវសាងសង់ឡើងដោយបំពាក់នូវសម្ភារៈបរិក្ខារវេជ្ជសាស្ត្រទំនើបៗ និងត្រូវដំឡើងជាមន្ទីរពេទ្យ ដែលមានស្តង់ដារលំដាប់ខ្ពស់ចុងក្រោយបង្អស់ នាពេលអនាគត ដើម្បីផ្តល់សេវាថែទាំសុខភាពឱ្យកាន់តែប្រសើរឡើងសម្រាប់បងប្អូន ប្រជាពលរដ្ឋក្នុងស្រុកកោះធំក្នុងផ្នែកសុខាភិបាល ក្រោមការគាំទ្រ និងកិច្ចសហការយ៉ាងជិតស្និទ្ធពីមន្ទីរពេទ្យកាល់ម៉ែតផងដែរ៕