តំបន់ណាមានការអភិវឌ្ឍហេដ្ឋារចនាសម្ព័ន្ធ តម្លៃដីធ្លីនៅតាមតំបន់នោះនឹងរង្គោះរង្គើរ កើនឡើងទៅតាមគម្រោងអភិវឌ្ឍន៍ទាំងនោះដែរ នេះគឺជាអ្វីដែលកំពុងតែកើតមានជាក់ស្តែងនៅតាមតំបន់នីមួយៗ ដែលមានការអភិវឌ្ឍទាំងគម្រោងរដ្ឋ និងគម្រោងឯកជន។ ឧទាហរណ៍ដូចជា៖ នៅតំបន់ផ្លូវ៦០ម៉ែត្រ ភាគខាងត្បូងរាជធានីភ្នំពេញ តំបន់ព្រៃស តំបន់ជ្រោយចង្វារ និងតំបន់ផ្សេងៗជាច្រើនទៀតនៅបណ្តាលជាយក្រុងនីមួយៗ។ ទាក់ទងនឹងគម្រោងអភិវឌ្ឍន៍ហេដ្ឋារចនាសម្ព័ន្ធនេះដែរ កាលពីពេលថ្មីៗនេះ ក្រសួងសាធារណការ និងដឹកជញ្ជូនទើបតែបង្ហាញនូវគម្រោងស្ថាបនា និងលើកកម្ពស់គុណភាពបណ្តាញផ្លូវជាតិនិងស្ពានសំខាន់ៗ និងគម្រោងនាពេលអនាគត ដោយក្នុងនោះរួមមាន៖ គម្រោងពង្រីកនិងលើកកំពស់គុណភាពផ្លូវជាតិលេខ១ ,ផ្លូវជាតិលេខ២ និង២២ ,ផ្លូវជាតិលេខ៣ ,ផ្លូវជាតិលេខ៤ ,ផ្លូវជាតិលេខ៥ ,ផ្លូវជាតិលេខ៦ ,ផ្លូវជាតិលេខ៧ ,ផ្លូវជាតិលេខ៨ ,ផ្លូវជាតិលេខ៩ ,ផ្លូវជាតិលេខ១០ ។ រីឯគម្រោងសាងសង់ និងលើកកម្រិតគុណភាពផ្លូវជាតិលេខ៤៨ ប្រវែងសរុប១៤៨ គីឡូម៉ែត្រចាប់ពីចំការហ្លួង ស្រុកស្រែអំបិលដល់ក្រុងខេមរភូមិន្ទ ខេត្តកោះកុង ក៏ត្រូវបានចុះហត្ថលេខាលើកិច្ចសន្យាគម្រោងសាងសង់ ក្រោមហិរញ្ញប្បទានសម្បទានពីសាធារណរដ្ឋកូរ៉េផងដែរ។ ចំពោះគម្រោងដែលត្រៀមនឹងបើកការដ្ឋាននៅថ្ងៃខាងមុខវិញនោះ មានដូចជា៖ ផ្លូវជាតិលេខ៤១ តភ្ជាប់ផ្លូវជាតិលេខ៣ និងផ្លូវជាតិលេខ៤ ផ្លូវជាតិលេខ៣១ តភ្ជាប់ផ្លូវជាតិលេខ៣ទៅស្រុកកំពង់ត្រាច និងផ្លូវជាតិលេខ៣៣ តភ្ជាប់ពីខេត្តកែបទៅស្រុកកំពង់ត្រាច។ គម្រោងនេះដែរ បើតាមការឱ្យដឹងពីឯកឧត្តម ស៊ុន ចាន់ថុលបានបញ្ជាក់ថា៖ គម្រោងនេះនឹងលើកកម្ពស់គុណភាពផ្លូវ ពីផ្លូវកៅស៊ូពីរស្រទាប់ស្តើង(DBST) ទៅជាផ្លូវបេតុងកៅស៊ូ(AC)។ ចំណែកឯគម្រោងសាងសង់ស្ពានឆ្លងកាត់ទន្លេមេគង្គនៅខេត្តក្រចេះ កំពុងចរចាជាមួយក្រុមហ៊ុនម៉ៅការសាងសង់ ដែលគ្រោងនឹងបើកការដ្ឋាននៅចុងឆ្នាំនេះ។ជាមួយនឹងគ្នានេះ ឯកឧត្តមបានឱ្យដឹងបន្ថែមថា៖ សម្រាប់ផ្លូវក្រវ៉ាត់ក្រុងទី៤ និងគម្រោងសាងសង់ ផ្លូវល្បឿនលឿន ភ្នំពេញ-បាវិត-ម៉ុកបៃ ព្រំដែនកម្ពុជា-វៀតណាម ដោយលើគោលការណ៍កសាង ប្រតិបត្តិ ផ្ទេរ(BOT) នោះ ក្រសួងបាននិងកំពុងសិក្សាបន្តឱ្យបានលម្អិតច្បាស់លាស់ មុនចេញដំណើរការសាងសង់។ ចំណែកឯគម្រោងបញ្ចប់ការសិក្សាវិញនោះ រួមមាន៖ គម្រោងផ្លូវតភ្ជាប់ពីខេត្តកំពង់ឆ្នាំងទៅខេត្តកំពង់ធំ និងគម្រោងផ្លូវតភ្ជាប់ពីខេត្តបាត់ដំបងទៅកាន់ខេត្តសៀមរាប។ ហើយគម្រោងដែលកំពុងបន្តការសាងសង់នោះមានដូចជា៖ គម្រោងសាងសង់ផ្លូវល្បឿនលឿនភ្នំពេញ-ក្រុងព្រះសីហនុ សម្រេចបាន៦៥% គ្រោងបញ្ចប់ការសាងសង់ក្នុងខែកញ្ញា ឆ្នាំ២០២២ និង គម្រោងសាងសង់ហេដ្ឋារចនាសម្ព័ន្ធផ្លូវចំនួន៣៨ខ្សែនៅក្រុងសៀមរាប ខេត្តសៀមរាប គិតរហូតមកទល់ ពេលនេះសម្រេចបានប្រមាណ៧០% និងគ្រោងបញ្ចប់ការសាងសង់នៅចុងឆ្នាំនេះ ខណៈដែលគម្រោងសាងសង់ហេដ្ឋារចនាសម្ព័ន្ធផ្លូវថ្នល់នៅក្រុងព្រះសីហនុចំនួន៣៤ខ្សែ បានបញ្ចប់បានសាងសង់រួចរាល់។ គម្រោងអភិវឌ្ឍន៍ទាំងអស់នេះ គឺជាដង្ហើម និងជាសរសៃឈាមដ៏សំខាន់របស់អ្នកវិនិយោគ ក៏ដូចជាអ្នករកស៊ីដីធ្លី បើទោះជាបច្ចុប្បន្នយើងកំពុងស្ថិតក្នុងបរិបទនៃជំងឺកូវីដ-១៩ ក៏វិស័យអចលនទ្រព្យនេះនៅតែដើរទៅមុខផងដែរ។ជួ