ភ្នំពេញ៖សំណើទាំង៣ចំណុច របស់អ្នកបើកបររថយន្តធុនធ្ងន់ ត្រូវបាន ក្រសួងសាធារណការនិងដឹកជញ្ជូន បដិសេធចោល ដោយហេតុថា «ផ្ទុយនឹងបទប្បញ្ញត្តិដូចមានចែងក្នុងមាត្រា២៦និងមាត្រា៦០ នៃច្បាប់ស្ដីពីផ្លូវថ្នល់និងលិខិតបទដ្ឋានគតិយុត្តជាធរមាន» ។ នេះបើយោងតាមសេចក្ដីប្រកាសព័ត៌មានរបស់គណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់នៃក្រសួងសាធារណការ នៅថ្ងៃទី២១ ខែកក្កដា ឆ្នាំ២០២១ នេះ ។ សំណើទាំង៣ចំណុច ដែលអ្នកបើកបររថយន្តធុនធំប្រមូលផ្ដុំគ្នាតវ៉ានោះរួមមាន ៖ ទី១-ស្នើសុំដំឡើងទម្ងន់ឬដឹកជញ្ជូនលើសទម្ងន់ក្នុងចន្លោះចាប់ពី៩តោនទៅ១៥តោន តាមប្រភេទរថយន្តធុនធ្ងន់បន្ថែមពីលើទម្ងន់នៃច្បាប់បានកំណត់ ។ ទី២-ស្នើសុំត្រឹមផាកពិន័យដោយមិនចាំបាច់ឃាត់ទុករថយន្តមួយឆ្នាំ ក្នុងករណីផ្ទុកទម្ងន់លើសពី២០% ឡើងទៅ ។ ទី៣-ស្នើសុំផ្តល់រថយន្តដែលបានឃាត់ទុកកន្លង មកឲ្យម្ចាស់ក្រុមហ៊ុនឬម្ចាស់រថយន្តវិញ ដោយគ្រាន់តែធ្វើការផាកពិន័យនិងមិនចាំបាច់ឃាត់ទុករថយន្តបន្តទៀតនោះទេ ក្រសួងសាធារណការ បន្តថា ម្ចាស់ក្រុមហ៊ុនដឹកជញ្ជូនម្ចាស់រថយន្តធុនធ្ងន់ឬអ្នកបើកបររថយន្តធុនធ្ងន់គួរតែចូលរួមសហការអនុវត្តវិធានការច្បាប់ទាំងអស់គ្នាដើម្បីធានាការពារទ្រព្យ សាធារណៈផ្លូវថ្នល់ស្ពាននិងសំណង់សិល្បការផ្លូវឲ្យស្ថិតស្ថេរគង់វង្សនៅជាប់តាមអាយុកាលបច្ចេកទេសកំណត់ស្របតាមកម្រិតស្តង់ដារនៃការសាងសង់ហើយក៏អាចចូលរួមចំណែកកាត់បន្ថយ ថវិកាជាតិលើការជួសជុលថែទាំហេដ្ឋារចនាសម្ព័ន្ធផ្លូវថ្នល់ដែលខូចខាតដោយសារការដឹកជញ្ជូនលើសទម្ងន់កម្រិត ផងដែរ ៕