ក្រសួងសាធារណការនិងដឹកជញ្ជូន និងក្រសួងសេដ្ឋកិច្ចនិងហិរញ្ញវត្ថុ រៀបចំកិច្ចប្រជុំអន្តរក្រសួងកម្រិតបច្ចេកទេស ដើម្បីពិភាក្សាលើកិច្ចការថវិកា សម្រាប់ឆ្នាំ២០២២ នាព្រឹកថ្ងៃអង្គារ ១១កើត ខែទុតិយាសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២០ ខែកក្កដា ឆ្នាំ២០២១ វេលាម៉ោង ៨:៣០ នាទីព្រឹក ឯកឧត្តម កែន រដ្ឋា អគ្គនាយកនៃអគ្គនាយកដ្ឋានរដ្ឋបាលនិងហិរញ្ញវត្ថុ ប្រធានប្រតិភូតំណាងក្រសួងសាធារណការនិងដឹកជញ្ជូន និង លោកជំទាវ ឈិន ដាលីន អគ្គនាយករង នៃអគ្គនាយកដ្ឋានថវិកា និងជាប្រធានប្រតិភូតំណាងក្រសួងសេដ្ឋកិច្ចនិងហិរញ្ញវត្ថុ បានដឹកនាំកិច្ចប្រជុំអន្តរក្រសួងពិភាក្សាកម្រិតបច្ចេកទេសថវិកា សម្រាប់ឆ្នាំ២០២២ តាមរយៈប្រព័ន្ធវីដេអូពីចម្ងាយ(Zoom Video Conference) ដោយមានការចូលរួមពីឯកឧត្តមអគ្គនាយកនៃអគ្គនាយកដ្ឋានជំនាញ និងអង្គភាពដែលជាសមាសភាពអង្គភាពថវិកាស្ថិតក្រោមឱវាទក្រសួង ព្រមទាំងមន្ទីរសាធារណការនិងដឹកជញ្ជូនរាជធានី-ខេត្ត និងក្រុមការងារជំនាញរបស់ក្រសួងសេដ្ឋកិច្ចនិងហិរញ្ញវត្ថុ សរុបប្រមាណ១៥០រូប។ កិច្ចប្រជុំខាងលើនេះ ត្រូវបានរៀបចំឡើងក្នុងគោលបំណងពិនិត្យពិភាក្សាលើផែនការយុទ្ធសាស្រ្តថវិកាឆ្នាំ២០២២-២០២៤ និងការពិភាក្សាលើគម្រោងចំណូល-ចំណាយថវិកាសម្រាប់ឆ្នាំ២០២២ របស់ក្រសួងសាធារណការនិងដឹកជញ្ជូន ដើម្បីឆ្លុះបញ្ចាំងពីទិដ្ឋភាពនៃការគ្រប់គ្រង ការប្រមូលចំណូល ការសម្របសម្រួលចំណាយ និងការប្រើប្រាស់ថវិកាជាតិប្រកបដោយប្រសិទ្ធភាព និងអាចចូលរួមសន្សំសំចៃថវិកាក្នុងបរិបទនៃការរីករាលដាលជំងឺកូវីដ-១៩ ផងដែរ។ ប្រធានប្រតិភូតំណាងក្រុមការងារបច្ចេកទេសថវិកានៃក្រសួងទាំងពីរ បានលើកឡើងថា៖ ដោយសារបញ្ហាជំងឺកូវីដ-១៩ នៅតែបន្តរីករាលដាលរហូតដល់បច្ចុប្បន្ននេះ យើងបានគិតគូរយ៉ាងហ្មត់ចត់ និងច្បាស់លាស់ អំពីការជ្រើសរើសសកម្មភាពអាទិភាព ដាក់បញ្ចូលក្នុងទិសដៅការងារអនុវត្តសម្រាប់ឆ្នាំ២០២២ ដោយបានរៀបចំផែនការយុទ្ធសាស្ត្រថវិកាប្រចាំឆ្នាំ(BSP) គម្រោងផែនការថវិកា(BP) និងកិច្ចការពាក់ព័ន្ធនឹងថវិកា ស្របតាមច្បាប់ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ សារាចរណែនាំ និងចក្ខុវិស័យវែងឆ្ងាយរបស់ប្រមុខរាជរដ្ឋាភិបាលកម្ពុជា ដើម្បីធ្វើជាមូលដ្ឋានដាក់បញ្ចូលក្នុងកិច្ចប្រជុំពិភាក្សាកម្រិតបច្ចេកទេសថវិកាសម្រាប់ឆ្នាំ២០២២នេះ និងសម្រាប់កិច្ចប្រជុំកម្រិតថ្នាក់ដឹកនាំ នាពេលបន្ទាប់ខាងមុខ។ ជារួម ប្រធានប្រតិភូតំណាងក្រុមការងារបច្ចេកទេសថវិកានៃក្រសួងទាំងពីរ បានពិភាក្សាគ្នាប្រកបដោយស្មារតីយោគយល់ ទទួលខុសត្រូវខ្ពស់ និងប្រកបដោយផ្លែផ្កាលើការងារគ្រោងប្រមូលចំណូល និងការស្នើសុំគម្រោងចំណាយថវិកាឆ្នាំ២០២២ ទៅតាមជំពូក កម្មវិធី អនុកម្មវិធី គណនី អនុគណនី ដោយបានឯកភាពរួមគ្នាលើខ្ទង់ថវិកាអាទិភាពមួយចំនួនដែលបានស្នើ សម្រាប់ដាក់ស្នើជូនថ្នាក់ដឹកនាំនៃក្រសួងសេដ្ឋកិច្ចនិងហិរញ្ញវត្ថុជាមូលដ្ឋានក្នុងការពិនិត្យ និងសម្រេចនៅក្នុងកិច្ចប្រជុំកម្រិតថ្នាក់ដឹកនាំបន្តទៀត។ សូមបញ្ជាក់ផងដែរថា ដោយសារស្ថានភាពនៃការរីករាលដាលជំងឺកូវីដ-១៩ អស់រយៈពេលប្រមាណជាង២ឆ្នាំកន្លងមកនេះ ស្ថានភាពសេដ្ឋកិច្ចរបស់ប្រទេសកម្ពុជា ក៏ដូចជាពិភពលោកទាំងមូល បានជួបប្រទះនឹងផលលំបាក ហើយស្ថិតក្នុងបរិបទនេះ រាជរដ្ឋាភិបាលកម្ពុជាក៏បានធ្វើវិចារណកម្មចំណាយថវិកាទៅតាមក្រសួង ស្ថាប័ន និងអង្គភាពរដ្ឋ ដើម្បីកាត់បន្ថយការចំណាយ និងរក្សាទុកកញ្ចប់ថវិកាមួយផ្នែក សម្រាប់ត្រៀមបម្រុងទុកប្រើប្រាស់តាមការចាំបាច់ផ្សេងៗ។