ភ្នំពេញ ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានណែនាំឱ្យលេខាធិការដ្ឋានដឹកនាំត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់សហការជាមួយនាយកដ្ឋានព័ត៌មានវិទ្យា និងទំនាក់ទំនងសាធារណៈ ប្រើប្រាស់ប្រព័ន្ធបច្ចេកវិទ្យាថ្មី ដើម្បីទប់ស្កាត់ការដឹកជញ្ជូនលើសទម្ងន់កម្រិតកំណត់។ ការណែនាំនេះ បានធ្វើឡើងក្នុងកិច្ចប្រជុំថ្នាក់ដឹកនាំក្រសួងតាមប្រព័ន្ធវីដេអូពីចម្ងាយ នាថ្ងៃពុធ ទី១៤ ខែកក្កដា ឆ្នាំ២០២១នេះ។ នៅក្នុងកិច្ចប្រជុំនេះ រដ្ឋមន្ត្រីក្រសួងសាធារណការ និងដឹកជញ្ជូន បានវាយតម្លៃខ្ពស់ ចំពោះសមិទ្ធផលសម្រេចបានជោគជ័យនូវការដាក់ឱ្យដំណើរការប្រព័ន្ធគ្រប់គ្រងការដឹកជញ្ជូនលើស ទម្ងន់កម្រិតកំណត់ ដោយប្រើប្រាស់បច្ចេកវិទ្យាកាមេរ៉ាឆ្លាតវៃ និងជញ្ជីងស្វ័យប្រវត្តិ (AI Camera and Weigh in Motion Sensor)។ លោក ស៊ុន ចាន់ថុល បានលើកឡើងថា រាជរដ្ឋាភិបាល នឹងអនុវត្តវិធានការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់ឱ្យដូចភ្លៀងរលឹម មិនថយក្រោយទេ និងបានសំណូមពរឱ្យនាយកដ្ឋានព័ត៌មានវិទ្យា និងទំនាក់ទំនងសាធារណៈ សហការជាមួយអ្នកសារព័ត៌មានដើម្បីផ្សព្វផ្សាយមាត្រា ៦០ ដែលចែងថា៖ ឡានដឹកលើស២០%ត្រូវ ឃាត់ទុកមួយឆ្នាំ ដើម្បីឱ្យក្រុមហ៊ុនដឹកជញ្ជូនបានយល់ច្បាស់អំពីមាត្រាច្បាប់ និងការដាក់ទោសទណ្ឌ ឱ្យ បានទូលំទូលាយ ដើម្បីចូលរួមថែរក្សាផ្លូវថ្នល់ឱ្យបានរឹងមាំ ជៀសវាងមតិរិះគន់ថា ធ្វើផ្លូវជាប់រហូត។ លោកទេសរដ្ឋមន្ត្រី បានសំណូមពរឱ្យមន្ទីរ សាធារណការ និងដឹកជញ្ជូនរាជធានី-ខេត្ត ជួយថែរក្សាយានយន្តដែលត្រូវបានចាប់ឃាត់ទុករយៈពេលមួយឆ្នាំ ឱ្យបានត្រឹមត្រូវ និងមិនត្រូវដោះលែងទៅវិញជាដាច់ខាត ។ សូមបញ្ជាក់ថា មកដល់ពេលនេះ ក្រសួងសាធារណការ កំពុងដំណើរការសាកល្បង ប្រព័ន្ធគ្រប់គ្រងការដឹកជញ្ជូនលើសទម្ងន់កម្រិតកំណត់ ដោយប្រើប្រាស់បច្ចេកវិទ្យាកាមេរ៉ាឆ្លាតវៃ សម្រាប់ចាប់រថយន្តលើសល្បឿន និងជញ្ជីងស្វ័យប្រវត្តិ (AI Camera and Weight in Motion Sensor) ចំនួន២ស្ថានីយ ដើម្បីត្រួតពិនិត្យយានយន្តដឹកទំនិញ លើសទម្ងន់កម្រិតកំណត់៕