[Post khmer] - រាជរដ្ឋាភិបាលស្នើឥណទានពីចិន ដើម្បីសង់ផ្លូវ និងស្ពានវែងជាងគេឆ្លងកាត់ទន្លេសាប
2021-07-14
Go to the website published Post khmer
ភ្នំពេញៈ រាជរដ្ឋាភិបាលកម្ពុជាបានដាក់សំណើទៅរដ្ឋាភិបាលចិន ដើម្បីស្នើឥណទានក្នុងការសាងសង់ផ្លូវ និងស្ពានដ៏វែងជាងគេនៅកម្ពុជា ដោយឆ្លងកាត់ទន្លេសាប តភ្ជាប់ពីខេត្តកំពង់ឆ្នាំងឆ្ពោះទៅខេត្តកំពង់ធំ បន្ទាប់ពីគម្រោងនេះត្រូវបានពន្យារពេលជាបន្តបន្ទាប់ ក្រោយពីមានការប្រកាសជាផ្លូវការពីលោកនាយករដ្ឋមន្ត្រីកាលពីឆ្នាំ ២០១៩។
លោក ហេង រត្នពិសិដ្ឋ អគ្គនាយកសាធារណការនៃក្រសួងសាធារណការ និងដឹកជញ្ចូនបានប្រាប់ភ្នំពេញ-ប៉ុស្តិ៍ពីម្សិលមិញថា តាមរយៈក្រសួងសាធារណការតំណាងឱ្យរាជរដ្ឋាភិបាលកម្ពុជាកាលពីថ្មីៗនេះបានដាក់សំណើរួចហើយទៅរដ្ឋាភិបាលចិន។ សំណើនេះគឺដើម្បីស្នើឥណទានពីចិនមកសាងសង់ផ្លូវថ្មី និងស្ពានដែលត្រូវចំណាយទឹកប្រាក់ ២០០ លានដុល្លារ តភ្ជាប់ពីខេត្តកំពង់ឆ្នាំង និងខេត្តកំពង់ធំ។
ទោះជាយ៉ាងណាលោក ហេង រត្នពិសិដ្ឋ បានអះអាងថា សំណើនេះមិនទាន់មានការឆ្លើយតបពីរដ្ឋាភិបាលចិនទេ ខណៈកម្ពុជាក៏កំពុងទន្ទឹងរង់ចាំចម្លើយនេះ ដើម្បីឈានទៅរកកិច្ចសហប្រតិបត្តិការថ្មីបន្ថែមទៀតក្នុងការអភិវឌ្ឍហេដ្ឋារចនាសម្ព័ន្ធទាំងនេះ។
លោកបានបញ្ជាក់ថា៖ «យើងកំពុងតែដាក់ស្នើសុំឥណទានពីរដ្ឋាភិបាលចិនហើយយើងមិនទាន់បានចុះកិច្ចសន្យាលើឥណទានទាំងនេះទេ។ សំណើនេះ គឺស្នើសុំធ្វើផ្លូវថ្មីជាមួយស្ពានឆ្លងកាត់ទន្លេសាបនៅខេត្តកំពង់ឆ្នាំងនេះ»។
តាមគម្រោងស្ពានតភ្ជាប់ពីខេត្តកំពង់ឆ្នាំងទៅខេត្តកំពង់ធំនេះនឹងត្រូវសង់ឆ្លងកាត់ដៃទន្លេចំនួន ៣ រួមមាន ទន្លេផ្សារក្រោម ទន្លេជល់មុខ និងទន្លេកំពង់ហាវដែលមានប្រវែង ៣ ៩០០ ម៉ែត្រ។ រីឯការសាងសង់ផ្លូវគឺមានប្រវែង ៥៧,៣ គីឡូម៉ែត្រ ដែលនឹងត្រូវសាងសង់ចាប់ពីស្រុកកំពង់លែង ក្នុងខេត្តកំពង់ឆ្នាំងទៅស្រុកស្ទឹងសែនក្នុងខេត្តកំពង់ធំ។
គម្រោងនេះត្រូវបានលោកនាយករដ្ឋមន្ត្រី ហ៊ុន សែន ប្រកាសជាផ្លូវការ កាលពីឆ្នាំ ២០១៩ ដោយគ្រោងចំណាយថវិកាប្រមាណ ២០០ លានដុល្លារ។ ប៉ុន្តែយ៉ាងណាគម្រោងនេះត្រូវបានពន្យារពេលការសាងសង់ជាបន្តបន្ទាប់រហូតដល់បច្ចុប្បន្ន។
លោក ស៊ុន សុវណ្ណារិទ្ធ អភិបាលខេត្តកំពង់ឆ្នាំងបានថ្លែងថា គម្រោងសាងសង់ផ្លូវ និងស្ពាននេះ គឺជាដំណឹងល្អមួយដែលពលរដ្ឋខ្មែរទូទៅ មិនថាតែពលរដ្ឋក្នុងខេត្តកំពង់ឆ្នាំងប៉ុណ្ណោះនោះទេ ដែលតែងទន្ទឹងរង់ចាំចង់ឱ្យគម្រោងនេះលេចជារូបរាងឡើង។
លោកបន្តថា ការសាងសង់ផ្លូវស្ពានឆ្លងកាត់ទន្លេសាបនឹងចូលរួមចំណែកយ៉ាងច្រើនដល់កំណើនសេដ្ឋកិច្ចជាតិ ជាពិសេសទេសចរខេត្តកំពង់ឆ្នាំង និងកំពង់ធំ រួមទាំងបង្កភាពងាយស្រួលដល់ការធ្វើដំណើរ និងការដឹកជញ្ជូនផលិតផលកសិកម្មផ្សេងៗផងដែរ។
លោកថា៖ «នេះដោយសារតែគម្រោងនេះ គឺជារបស់ក្រសួងសាធារណការ ដូច្នេះ អាជ្ញាធរខេត្តមិនទាន់ដឹងពីប្លង់មេពិតប្រាកដនៅឡើយទេ។ ប៉ុន្តែបើដូចអ្វីដែលបានដឹងមុនមែន ហើយចំគោលដៅដែលបានរៀបចំទុកនោះ គឺខេត្តបានត្រៀមរួចជាស្រេចហើយ និងចូលរួមសហការក្នុងការដោះស្រាយផលប៉ះពាល់នានាផងដែរ»។
លោក គង់ សុវណ្ណ អ្នកជំនាញសុខភាពសាធារណៈ និងជានាយកកម្មវិធីមូលនិធិសុវត្ថិភាពអន្តរជាតិបានថ្លែងថា ធម្មតាការផ្តល់ឥណទាន គឺខុសពីការផ្តល់ជំនួយឥតសំណង ដែលពាក់ព័ន្ធនឹងបញ្ហាសេដ្ឋកិច្ច និងសង្គម និងទំនាក់ទំនងអន្តរជាតិនៃប្រទេសទាំង ២។ យ៉ាងណាលោក ជឿ ថា សំណើនេះនឹងត្រូវបានរដ្ឋាភិបាលចិនអនុម័តក្នុងពេលឆាប់ៗ ព្រោះថ្មីៗនេះ ទំនាក់ទំនងរវាងរដ្ឋាភិបាលគឺស្ថិតក្នុងស្ថានភាពកាន់តែប្រសើរឡើង។
លោកថា៖ «ខ្ញុំគិតថា ប្រហែលជាអាចនឹងមានការអនុម័តតាមសំណើនេះបាន ព្រោះកន្លងមក ឃើញរដ្ឋាភិបាលចិនហ្នឹងគាត់ជួយកម្ពុជាច្រើនដែរ រឿងស្ពាន រឿងថ្នល់ រឿងអីទៀត។ ប៉ុន្តែអ្វីដែលសំខាន់ក្នុងនាមខ្ញុំជាអ្នកបច្ចេកទេសគឺគិតអំពីសុវត្ថិភាព និងគុណភាពនៃវិស្វកម្មស្ពានថ្នល់ហ្នឹងថាមានសុវត្ថិភាព មុនពេលសាងសង់ អំឡុងពេលសាងសង់ និងក្រោយពេលសាងសង់កម្រិតណា?»។
លោក គង់ សុវណ្ណ រំពឹងថានៅពេលគម្រោងនេះ ចាប់ផ្តើមអនុវត្តការសាងសង់ រាជរដ្ឋាភិបាលនឹងគិតគូរពីគុណភាពទាំងអស់នេះ ជាពិសេសការផ្តល់ចំណេះដឹងដល់ពលរដ្ឋ និងផលប៉ះពាល់ដែលកើតនានា ដែលកើតមានឡើងក្នុងគម្រោងឱ្យបានល្អប្រសើរ៕
