នៅថ្ងៃពុធ ១៤កើត ខែបឋមសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៣ ខែមិថុនា ឆ្នាំ២០២១ លោកជំទាវ មឹន មាណវី រដ្ឋលេខាធិការក្រសួងសាធារណការណការ និងដឹកជញ្ជូន និងជាអគ្គលេខាធិការ នៃអគ្គលេខាធិការដ្ឋាន គ.ស.ច.គ. បានធ្វើជាអធិបតីភាពក្នុងពិធីប្រកាសផ្សព្វផ្សាយជាផ្លូវការនូវ របាយការណ៍ជនរងគ្រោះ និងគ្រោះថ្នាក់ចរាចរណ៍ផ្លូវគោកឆ្នាំ២០១៩ តាមរយៈប្រព័ន្ធវីដេអូពីចម្ងាយ និងមានការចូលរួមជាកិត្តិយសពី លោក Nick Beresford តំណាងប្រធានអង្គការ UNDP ប្រចាំកម្ពុជា ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ នៃក្រសួងមហាផ្ទៃ ក្រសួងសាធារណការ និងដឹកជញ្ជូន ឯកឧត្តមនាយឧត្តមសេនីយ ហ៊ឹម យ៉ាន អគ្គរងស្នងការរងនគរបាលជាតិ ឯកឧត្តមអគ្គនាយក អគ្គនាយករង ឯកឧត្តមឧត្តមសេនីយ៍ទោ តំណាងស្នងការនគរបាលជាតិរាជធានី ខេត្ត តំណាងបញ្ជាការដ្ឋានកងរាជអាវុធហត្ថរាជធានី ខេត្ត តំណាងមន្ទីរសាធារណការដឹកជញ្ជូនរាជធានី ខេត្ត លោក លោកស្រីប្រធាននាយកដ្ឋាន សមាជិកសមាជិកា នៃអគ្គលេខាធិការដ្ឋាន គ.ស.ច.គ. តំណាងក្រសួង ស្ថាប័ន អង្គការពាក់ព័ន្ធ ក្រុមហ៊ុនឯកជន និងប្រព័ន្ធផ្សព្វផ្សាយសរុបចំនួន ១៦០នាក់។ កម្មវិធីរៀបចំឡើងក្នុងគោលបំណងផ្សព្វផ្សាយអំពីទិន្នន័យគ្រោះថ្នាក់ចរាចរណ៍ផ្លូវគោក ព្រមទាំងលទ្ធផលនៃការវិភាគអំពីការខាតបង់ផ្នែកសេដ្ឋកិច្ចដោយសារគ្រោះថ្នាក់ចរាចរណ៍ផ្លូវគោកក្នុងឆ្នាំ២០១៩ ជូនដល់ស្ថាប័នជាតិ អន្តជាតិ អង្គការដៃគូ ក្រុមហ៊ុនឯកជន និងបណ្តាញផ្សព្វផ្សាយព័ត៌មានឱ្យជ្រួតជ្រាប និងចូលរួមផ្សព្វផ្សាយបន្តអំពីហានិភ័យ នៃគ្រោះថ្នាក់ចរាចរណ៍ផ្លូវគោក ដើម្បីចូលរួមសហការជាមួយរាជរដ្ឋាភិបាលក្នុងការកាត់បន្ថយ និងទប់ស្កាត់គ្រោះថ្នាក់នេះទៅថ្ងៃអនាគត។ កម្មវិធីនេះបានសហការរៀបចំឡើងដោយ អគ្គលេខាធិការដ្ឋាន នៃគណៈកម្មាធិការជាតិសុវត្ថិភាពចរាចរណ៍ផ្លូវគោក ក្រសួងសាធារណការ និងដឹកជញ្ជូន និងមានការគាំទ្រពីអង្គការ UNDP ប្រចាំនៅកម្ពុជា និងក្រុមហ៊ុន Grab។