ឯកឧត្តម ហឿន សំនៀង ជាអគ្គនាយករងនៃអគ្គនាយកដ្ឋានរដ្ឋបាល និងហិរញ្ញវត្ថុក្រសួងសាធារណការ និងដឹកជញ្ជូន​ ជានាយករងខុទ្ទកាល័យ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ត្រូវបានព្រះមហាក្សត្រ ចេញព្រះរាជក្រឹត្យតែងតាំង នៅថ្ងៃទី ១២ ខែមិថុនា ឆ្នាំ២០២១ ជានាយក វិទ្យាស្ថានតេជោសែន សាធារណការ និងដឹកជញ្ជូន។ ក្រៅពីការងាររដ្ឋ ឯកឧត្តម ហឿន សំនៀង ក៏ជាស្ថាបនិក និងជាអតីតនាយកប្រតិបត្តិ សមាគមជីវិត និងក្តីសង្ឃឹម មានទីតាំងនៅវត្តដំណាក់ ខេត្តសៀមរាប (www.lifeandhopeangkor.org) ដែលបានជួយកុមារកំព្រា កុមារគ្រួសារក្រីក្រ យុវជនយុវតី ស្ត្រីរងគ្រោះនិងងាយរងគ្រោះ ឲ្យមានជំនាញ និងបានចូលរៀន​​​សិក្សាចប់ថ្នាក់ឧត្តមសិក្សា តាមរយ:គម្រោងនានារបស់សមាគម។ ឯកឧត្តម ជាអតីតអ្នកបួសខ្មែរមួយរូប ដែលធ្លាប់បួសរៀនជ្រៅជ្រះ ក្នុងសំណាក់ព្រះពុទ្ធសាសនា អស់រយ:ពេល ១៩ ព្រះវស្សា នៅវត្ដដំណាក់ និងបានចូលរួមសកម្មភាពសង្គម និងព្រះពុទ្ធសាសនា ទំាងជាតិ និងអន្តជាតិ ជាច្រើនផងដែរ។ ឯកឧត្តម បានបញ្ចប់ការសិក្សាថ្នាក់បរិញ្ញាបត្រជាន់ខ្ពស់ ជំនាញរដ្ឋបាលសាធារណ: ពីសកលវិទ្យាល័យហាវឺដ (Harvard University, Kennedy School of Government 2013) សហរដ្ឋអាមេរិក និង បរិញ្ញាបត្រ​​​​​​ជំនាញគ្រប់គ្រងពីសាកលវិទ្យាល័យសិនអែមប្រុស (St. Ambrose University) រដ្ឋអាយូវ៉ា សហរដ្ឋអាមេរិក​​​ (ដែលកាលនោះ ឯកឧត្តម នៅជាព្រះសង្ឃនៅឡើយ)។ ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់ សម្តេចតេជោនាយករដ្ឋមន្រ្តី និងការតាំងចិត្តដ៏មោះមុត ប្រកបដោយចក្ខុវិស័យច្បាស់លាស់របស់ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្ត្រីក្រសួងសាធារណការ និងដឹកជញ្ជូន វិទ្យាស្ថានតេជោសែន សាធារណការ និងដឹកជញ្ជូន ត្រូវបានបង្កើតឡើងក្នុងគោលបំណងបណ្តុះបណ្តាលធនធានមនុស្ស ប្រកបដោយសមត្ថភាព ចំណេះដឹងទូលំទូលាយ និងសីលធម៌ វិជ្ជាជីវៈ ដើម្បីដោះស្រាយបញ្ហាវិបត្តិកង្វះអ្នកជំនាញបច្ចេកទេស ក្នុងវិស័យសាធារណការ និងដឹកជញ្ជូន។ វិទ្យាស្ថានតេជោសែន សាធារណការ និងដឹកជញ្ជូន បានប្រារព្ធពិធីសម្ពោធន៍ជាផ្លូវការ កាលពីថ្ងៃទី២២ ខែមករា ឆ្នាំ២០២១ ក្រោមអធិបតីភាពដ៍ខ្ពង់ខ្ពស់បំផុតរបស់ សម្តេចតេជោនាយករដ្ឋមន្ត្រី។ វិទ្យាស្ថានបានបើកទទួលនិស្សិតជំនាន់ទី១ ចំនួន ១៩១នាក់ បាននឹងកំពុងសិក្សាតាមប្រព័ន្ធអនឡាញ លើជំនាញ ចំនួន ៦ ក្នុងដេប៉ាតឺម៉ង់ចំនួន ៣ រួមមាន ១)ដេប៉ាតឺម៉ង់សំណង់ សាធារណការ៖ លើជំនាញសំណង់ផ្លូវ ថ្នល់ ផ្លូវ​ល្បឿនលឿន ស្ពាន ផ្លូវដែក និងកំពង់ផែ, និងជំនាញប្រព័ន្ធចម្រោះទឹកកខ្វក់។ ២)ដេប៉ាតឺម៉ង់គ្រប់គ្រងដឹក ជញ្ជូន និងភស្តុភារកម្ម៖ លើជំនាញសេដ្ឋកិច្ចនិងគ្រប់គ្រង​ដឹកជញ្ជូន​ផ្លូវគោក និងជំនាញគ្រប់គ្រងភស្ដុភារកម្ម និងខ្សែច្រវ៉ាក់ផ្គត់ផ្គង់ និង ៣) ដេប៉ាតឺម៉ង់នាវាចរណ៍៖ លើជំនាញបរិបាលនាវា និងម៉ាស៊ីននាវា ដែលកម្ម វិធីសិក្សា ពេញមួយថ្ងៃ (ព្រឹក/រសៀល) ៥ថ្ងៃក្នុងមួយសប្តាហ៍៕