កិច្ចប្រជុំអនុគណៈកម្មការក្រុមការងារបច្ចេកទេសស្តីពីទឹកកខ្វក់ និងអនាម័យក្នុងទីក្រុង តាមរយៈ ប្រព័ន្ធវីដេអូពីចម្ងាយ នៅថ្ងៃពុធ ១៤រោច ខែជេស្ឋ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី៩ ខែមិថុនា ឆ្នាំ២០២១ នៅទីស្ដីការក្រសួង ឯកឧត្តម កឹម បូរី អនុរដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំអនុគណៈកម្មការក្រុមការងារបច្ចេកទេសស្តីពីទឹកកខ្វក់ និងអនាម័យ ក្នុងទីក្រុង ដោយមានការចូលរួមផ្ទាល់ពីមន្ត្រីជំនាញទទួលបន្ទុក ក្រុមការងារបច្ចេកទេស និងការចូលរួមតាមប្រព័ន្ធវីដេអូពីចម្ងាយពីតំណាងក្រសួង-ស្ថាប័នពាក់ព័ន្ធ និងដៃគូអភិវឌ្ឍន៍នានា ផងដែរ។ អង្គប្រជុំបានពិភាក្សាអំពីស្ថានភាពនៃការគ្រប់គ្រងទឹកកខ្វក់ និងអនាម័យទីក្រុង រចនាសម្ព័ន្ធគ្រប់គ្រង ភាពចាំបាច់ក្នុងតម្រូវការគោលកាណ៍ណែនាំ បទដ្ឋានស្តង់ដារបច្ចេកទេស លិខិតបទដ្ឋានគតិយុត្តិ សេចក្តីព្រាងច្បាប់ និងយន្តការក្នុងការទ្រទ្រង់ និងគ្រប់គ្រងវិស័យទឹកកខ្វក់ ការគ្រប់គ្រងទឹកស្អាត និងអនាម័យ រួមទាំងការធ្វើបច្ចុប្បន្នភាពអំពីគម្រោងសកម្មភាពការងារនានាដែលកំពុងអនុវត្ត ដើម្បីសម្របសម្រួលជាមួយដៃគូអភិវឌ្ឍនានាដែលធ្វើការក្នុងវិស័យនេះផងដែរ។ នាឱកាសនោះដែរ ឯកឧត្តមអនុរដ្ឋលេខាធិការ បានគូសបញ្ជាក់នូវការប្តេជ្ញាចិត្តក្នុងការធ្វើឱ្យប្រសើរឡើង នូវក្របខ័ណ្ឌស្ថាប័ន និង បទដ្ឋានគតិយុត្តិនានា ដើម្បីលើកកម្ពស់ការគ្រប់គ្រងអនាម័យ និងទឹកកខ្វក់ ប្រកបដោយប្រសិទ្ធភាព និងនិរន្តរភាព។ គួរកត់សម្គាល់ផងដែរថា៖ បច្ចុប្បន្ននេះក្រសួងសាធារណការ និងដឹកជញ្ជូន រួមជាមួយដៃគូពាក់ព័ន្ធនានា បាន និងកំពុងតែខិតខំប្រឹងប្រែងរៀបចំសេចក្តីព្រាងច្បាប់គតិយុត្តិ បទដ្ឋានបច្ចេកទេសក្នុងការសាងសង់ ជួសជុល ថែទាំ ប្រតិបត្តិការ គោលនយោបាយ និងយុទ្ធសាស្ត្រនានាទាក់ទងនឹងការគ្រប់គ្រង អភិវឌ្ឍ ប្រព័ន្ធចម្រោះទឹកកខ្វក់នៅកម្ពុជា ដើម្បីសម្រេចឱ្យបាននូវសោភ័ណភាពទីក្រុង (ទីក្រុងបៃតង) និងភាព ទាក់ទាញផងដែរ។ ឯកឧត្តមអនុរដ្ឋលេខាធិការ បានថ្លែងអំណគុណយ៉ាងជ្រាលជ្រៅដល់អង្គប្រជុំ ដែលបានពិភាក្សាយ៉ាង សកម្មក្នុងការបង្ហាញមតិយោបល់ ចែករំលែកបទពិសោធន៍ការងារ សហប្រតិបត្តិការ ដើម្បី ផលប្រយោជន៍រួម និងក្រុមការងារ តំណាងក្រសួង-ស្ថាប័នពាក់ព័ន្ធ ដៃគូអភិវឌ្ឍន៍នានា ដូចជាទីភ្នាក់ងារ សហប្រតិបត្តិការអន្តរជាតិជប៉ុន(JICA) តំណាងធនាគារអភិវឌ្ឍន៍អាស៊ី តំណាងធនាគារពិភពលោក និងទីភ្នាក់ងារEDCF របស់សាធារណរដ្ឋកូរ៉េ។ល។ ដែលបានចូលរួមចំណែកក្នុងការទ្រទ្រង់វិស័យ ទឹកកខ្វក់ និងអនាម័យក្នុងទីក្រុង ព្រមទាំងកិច្ចសហការគ្នាបានយ៉ាងល្អប្រសើរនាពេលកន្លងមក៕