[Moneaksekar] - លោក ស៊ុន ចាន់ថុល បណ្ដោយឲ្យប្រធានមន្ទីរសាធារណការខេត្តរតនគិរី ប្រព្រឹត្តអំពើពុករលួយយ៉ាងគឃ្លើន
2018-02-27
Go to the website published Moneaksekar
កន្លងមកមន្ត្រីរាជការក្នុងមន្ទីរសាធារណការនិងដឹកជញ្ជូនខេត្តរតនគិរី បានបើកកកាយជាបន្តបន្ទាប់នូវរឿងអាស្រូវពុករលួយរបស់លោក ស៊ុន ប៉ូលីន ដែលជាប្រធានមន្ទីរ ដើម្បីឲ្យលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន ចាត់វិធានការទប់ស្កាត់ខ្លះផង។ ក៏ប៉ុន្តែរហូតមកដល់ពេលនេះលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន មិនទប់ស្កាត់អំពើពុករលួយតាមច្រើនរូបភាពរបស់លោក ស៊ុន ប៉ូលីន ប្រធានមន្ទីរសាធារណការនិងដឹកជញ្ជូនខេត្តរតនគិរី នោះទេ។ បញ្ហានេះហើយដែលធ្វើឲ្យមជ្ឈដ្ឋានខ្លះសង្ស័យថា លោក ស៊ុន ចាន់ថុល រដ្ឋមន្ត្រីក្រសួងសាធារណការ គឺជាអ្នកឃុបឃិតឲ្យលោក ស៊ុន ប៉ូលីន ប្រធានមន្ទីរសាធារណការខេត្តរតនគិរី ប្រើអំណាចនិងតួនាទីកេងប្រវ័ញ្ចថវិការដ្ឋយ៉ាងកំរោល។
តាមប្រភពពីមន្ត្រីរាជការនៅក្នុងមន្ទីរសាធារណការខេត្តរតនគិរី បានឲ្យដឹងថា ច្រើនឆ្នាំមកនេះលោក ស៊ុន ប៉ូលីន ប្រើអំណាចប្រព្រឹត្តអំពើពុករលួយយ៉ាងក្រអឺតក្រទមដោយមានការឃុបឃិតពីបក្ខពួកមួយចំនួនតូច ធ្វើឲ្យការងារក្នុងមន្ទីរគ្មានការរីកចំរើន។ ប្រភពបានឲ្យដឹងទៀតថា ផ្លូវថ្នល់ដែលត្រូវស្ថាបនានិងជួសជុលឡើងវិញក្នុងខេត្តរតនគិរី ភាគច្រើនគ្មានគុណភាពគឺធ្វើមិនបានប៉ុន្មានផងក៏រងការខូចខាតទៅវិញ ព្រោះគេធ្វើតាមរបៀបជាក់ស្ដើងស៊ីក្រាស់។ ប្រភពដែលស្និទ្ធនឹងលោក ស៊ុន ប៉ូលីន ប្រធានមន្ទីរសាធារណការខេត្តរតនគិរី បានឲ្យដឹងថា ក្រសួងសាធារណការ បានទម្លាក់ថវិកាមកមន្ទីរសាធារណការខេត្តរតនគិរី រាប់ពាន់លានរៀលសម្រាប់ស្ថាបនាផ្លូវនិងជួសជុលផ្លូវឡើងវិញ ក៏ប៉ុន្តែផ្លូវក្នុងក្រុងបានលុង និងតាមបណ្ដាស្រុកមួយចំនួននៅតែរងការខូចខាតធ្វើដំណើរមិនចង់កើត។
តាមការបង្ហើបពីមន្ត្រីរាជការក្នុងមន្ទីរសាធារណការខេត្តរតនគិរី បានឲ្យដឹងថា គ្រប់គម្រោងស្ថាបនាផ្លូវនិងជួសជុលផ្លូវក្នុងខេត្តរតនគិរី ទាំងមូលគឺជាប្រភពចំណូលរបស់លោក ស៊ុន ប៉ូលីន និងបក្ខពួកដែលគិតតែពីរឿងប្រព្រឹត្តអំពើពុករលួយកេងប្រវ័ញ្ចថវិការដ្ឋយកធ្វើមានធ្វើបានផ្ទាល់ខ្លួនយ៉ាងក្រអឺតក្រទម។ សេចក្ដីរាយការណ៍ខ្លះបានឲ្យដឹងថា ការដែលលោក ស៊ុន ប៉ូលីន ហ៊ានធ្វើអ្វីៗតាមអំពើចិត្ត គឺដោយសារអាងមានខ្នងបង្អែកយ៉ាងរឹងមាំនៅក្រសួងសាធារណការនិងដឹកជញ្ជូន ចាំជួយការពារគ្រប់ពេលវេលា។ ក្រុមជញ្ជីងថ្លឹងរថយន្តរបស់មន្ទីរសាធារណការខេត្តរតនគិរី ក៏ជាប្រភពចំណូលដ៏សំខាន់របស់លោក ស៊ុន ប៉ូលីន ផងដែរព្រោះមន្ត្រីទាំងនោះមិនចាត់វិធានការលើរថយន្តដឹកឈើឬដឹកទំនិញដែលបំផ្លាញផ្លូវថ្នល់ឲ្យខូចខាតជាបន្តបន្ទាប់នោះទេ គឺគិតតែពីរឿងប្រមូលលុយចែកគ្នាធ្វើមានធ្វើបាន។ មានន័យថាលោក ស៊ុន ប៉ូលីន កំពុងប្រើអំណាចប្រព្រឹត្តអំពើពុករលួយយ៉ាងពេញបន្ទុក ហើយលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន បែរជាសម្ងំស្ងៀមទុកឲ្យមន្ត្រីពុករលួយធ្វើអ្វីៗតាមអំពើចិត្ត៕
