[Rasmei Kampuchea Daily News] - មន្ទីរសាធារណការនិងដឹកជញ្ជូនខេត្តកំពង់ឆ្នាំងចាប់ផ្ដើមកសាងបញ្ចប់កំណាត់ផ្លូវលេខ៥២ក្នុងឃុំឆ្នុកទ្រូ
កំពង់ឆ្នាំងៈ កំណាត់ផ្លូវលេខ៥២ ពីចំណុចដើមច្រកែង ទៅដល់មាត់ទន្លេកំពង់ទឹកឆ្នុកទ្រូស្ថិតនៅក្នុងភូមិឆ្នុកទ្រូ ឃុំឆ្នុកទ្រូស្រុកបរិបូណ៌មានប្រវែងជាងពីរគីឡីម៉ែត្រម៉ែត្រដែលជាផ្លូវក្រាលក្រួសក្រហមពេលនេះកំពុងកសាងឲ្យក្លាយទៅជាផ្លូវក្រាលកៅស៊ូនិងចាក់បេតុង ។នេះបើតាមការបញ្ជាក់របស់អាជ្ញាធរឃុំឆ្នុកទ្រូនៅព្រឹកថ្ងៃទី៣១ខែមីនានេះ។
មេឃុំឆ្នុកទ្រូលោក សាំងគឹមស៊ន បានឲ្យដឹងថា កំណាត់ផ្លូវលេខ៥២ ពីចំនុចផ្ដើមចេញពីដើមច្រកែងចុះទៅដល់មាត់កំពង់ទឹកឆ្នុកទ្រូ មានប្រវែង២.៧០០ម៉ែត្រ ពេលនេះត្រូវបានមន្ទីរសាធារណការនិងដឹកជញ្ជូនខេត្តកំពង់ឆ្នាំង ចាប់ផ្ដើមកសាងជាថ្មីដោយធ្វើ ជាផ្លូវក្រាលកៅស៊ូ។ផ្លូវស្ថាបនាជាថ្មីនេះដោយលើកកម្ពស់ឲ្យខ្ពស់ជាងផ្លូវចាស់កម្ពស់មួយម៉ែត្រ។ក្នុងនោះធ្វើជាផ្លូវចាក់កៅស៊ូ២.២០០ ម៉ែត្រនិង៥០០ម៉ែត្រជាផ្លូវចាក់បេតុងព្រោះជាជាប់មាត់ទឹកទន្លេ ។
លោកមេឃុំបន្ថែមថាតាំងពីដើមមកទីនេះពុំដែលមានផ្លូវល្អទេ ។ក្នុងនាមអាជ្ញាធរឃុំនិងប្រជាពលរដ្ឋក្នុងឃុំលោកសូមថ្លែងអំណរគុណដល់រាជរដ្ឋាភិបាល ដល់គណៈអភិបាលខេត្ត និងក្រសួងសាធារណការដែលបានយកចិត្តដាក់អភិវឌ្ឍន៍ឃុំឆ្នុកទ្រូ ឲ្យកាន់តែប្រសើរឡើងថែមទៀត។
លោកមេឃុំឆ្នុកទ្រូបញ្ជាក់ថា កំណាត់ផ្លូវលេខ៥២បានតភ្ជាប់ពីផ្លូវជាតិលេខ ៥ ត្រង់ចំណុចមុខផ្សារពន្លៃចុះទៅមាត់កំពង់ទឹក ឆ្នុកទ្រូមានប្រវែង៩គីឡូម៉ែត្រ។ កន្លងមកក្រសួងសាធារណការបានធ្វើផ្លូវមួយចំនួនធំហើយ និងបើកការកសាងលើកនេះ (២៧០០ម៉ែត្រ)ដើម្បីបញ្ចប់កំណាត់ផ្លូវនេះ៕
