[Rasmei Kampuchea Daily News] - ប្រជាពលរដ្ឋដែលកំពុងធ្វើចត្តាឡីស័កនៅកោះធំទទួលគ្រឿងឧបភោគនិងសម្ភារៈប្រើប្រាស់ពីលោកទេសរដ្ឋមន្ត្រី ស៊ុន ចាន់ថុល
ភ្នំពេញ៖ ប្រជាពលរដ្ឋដែលកំពុងសម្រាកធ្វើចត្តាឡីស័កនៅក្នុងមូលដ្ឋានស្រុកកោះធំបានទទួលគ្រឿងឧបភោគបរិភោគនិងសម្ភារៈប្រើប្រាស់ដែលជាអំណោយរបស់លោក ទេសរដ្ឋមន្ត្រី ស៊ុន ចាន់ថុល ប្រធានក្រុមការងាររាជរដ្ឋាភិបាលចុះមូលដ្ឋានស្រុកកោះធំ ខេត្តកណ្តាល។
កាលពីថ្ងៃទី១៧ ខែមីនា ឆ្នាំ២០២១លោក ស៊ុយ សាន រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំក្រុមការងារនាំយកគ្រឿងឧបភោគបរិភោគ និងសម្ភារៈប្រើប្រាស់ ជាអំណោយទេសរដ្ឋមន្ត្រីទៅជូនគណបក្សប្រជាជនកម្ពុជាស្រុកកោះធំខេត្តកណ្ដាលដើម្បីរួមចំណែកក្នុងការប្រយុទ្ធប្រឆាំងនឹងជំងឺ កូវីដ-១៩។
គ្រឿងឧបភោគបរិភោគ និងសម្ភារៈដែលត្រូវបាននាំយកប្រគល់ជូននោះរួមមានអង្ករចំនួន ៥តោន មីចំនួន២០កេសធំ ត្រីខចំនួន២០កេសធំ ម៉ាស់ចំនួន៥កេស ទឹកសុទ្ធចំនួន៣០កេស និងទឹកអាល់កុលលាងដៃចំនួន៥០កាន ។
គួរកត់សម្គាល់ផងដែរថា ដោយសារស្ថានភាពជំងឺកូវីដ-១៩ មិនអនុញ្ញាតឱ្យមានការជួបជុំ គ្នាច្រើន ទើបការប្រគល់ និងទទួលគ្រឿងឧបភោគបរិភោគ និងសម្ភារៈប្រើប្រាស់ទាំងនេះ ធ្វើឡើងត្រឹមតែតំណាងក្រុមការងារមួយចំនួនប៉ុណ្ណោះ ដោយពុំមានការរៀបចំពិធីជា ផ្លូវការទេ។ ក្រោយពីការប្រគល់ទទួលរួចមក ក្រុមការងារក៏បានបែងចែកកម្លាំងទៅតាម គោលដៅរៀងៗខ្លួននាំយកគ្រឿងឧបភោគបរិភោគនិងសម្ភារៈប្រើប្រាស់ចាំបាច់ទាំងនោះទៅប្រគល់ជូនប្រជាពលរដ្ឋដែលកំពុងសម្រាកធ្វើចត្តាឡីស័កនៅក្នុងមូលដ្ឋានស្រុកកោះធំបន្តទៀត៕
