[Thmey Thmey] - ជប៉ុនផ្តល់ថវិកាជាង២លានដុល្លារ សម្រាប់បោសសម្អាតមីន និងគ្រាប់បែកចង្កោមនៅកម្ពុជា
2021-03-03
Go to the website published Thmey Thmey
ភ្នំពេញ៖ រដ្ឋាភិបាលជប៉ុន សម្រេចបន្តផ្តល់ថវិកាជាង២,២៣លានដុល្លារដល់អង្គភាពចំនួនពីរ ដើម្បីជំរុញការអភិវឌ្ឍសហគមន៍ តាមរយៈការបោសសម្អាតមីននិងគ្រាប់បែកចង្កោម និងការកសាងសមត្ថភាពយុវជននៅកម្ពុជា។ បើតាមការចុះផ្សាយរបស់ស្ថានទូតជប៉ុនប្រចាំកម្ពុជា នៅថ្ងៃទី១មីនា ឆ្នាំ២០២១ ទំហំថវិកានេះ គឺជាជំនួយឥតសំណង សម្រាប់គម្រោងរបស់អង្គការក្រៅរដ្ឋាភិបាលជប៉ុន។
ស្ថានទូតជប៉ុនប្រចាំកម្ពុជាបានរៀបរាប់ថា ក្នុងចំណោមថវិកាជាង២លានដុល្លារនេះ មានទឹកប្រាក់១,៧៦៣,២៥១ដុល្លារ បានផ្តល់ឱ្យអង្គការសកម្មភាពកំចាត់មីនជប៉ុន(JMAS) ដើម្បីអនុវត្តគម្រោងគាំទ្រការស្ថាបនាហេដ្ឋារចនាសម្ព័ន្ធឡើងវិញ ជាមួយនឹងការបោសសម្អាតមីន នៅខេត្តបន្ទាយមានជ័យ ដែលហៅកាត់ថា គម្រោង RSDB (ឆ្នាំទី១)។ ថវិកានេះ ក៏សម្រាប់គម្រោងគាំទ្រ ការស្ថាបនាហេដ្ឋារចនាសម្ព័ន្ធឡើងវិញ ជាមួយនឹងការបោសសម្អាតគ្រាប់បែបចង្កោមនៅខេត្តស្ទឹងត្រែង ហៅកាត់ថាគម្រោង RSCS (ឆ្នាំទី១) ផងដែរ។
ដោយឡែក ថវិកា៤៧២,១១៣ដុល្លារទៀត រដ្ឋាភិបាលជប៉ុន បានផ្តល់ឱ្យអង្គការកុមារឥតព្រំដែន(KnK) ដើម្បីអនុវត្តគម្រោងកសាងសមត្ថភាពយុវជន ក្នុងខេត្តប៉ៃលិន តាមរយៈការពង្រឹងមជ្ឈមណ្ឌលសិក្សាសហគមន៍ (ឆ្នាំទី២)។ លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា និងអ្នកតំណាងមកពីអង្គការទាំងពីរ បានចុះហត្ថលេខា លើកិច្ចសន្យាផ្តល់ជំនួយឥតសំណងនេះ។ ឯកអគ្គរាជទូតជប៉ុនរូបនេះ បានប្រសាសន៍ដូច្នេះ៖«យើងជឿជាក់ថា ជំនួយឥតសំណងនេះ នឹងជួយកែលម្អគុណភាពជីវិតរបស់ប្រជាជន ដែលរស់នៅក្នុងទីតាំង នៃគម្រោងនីមួយៗ»។
ចាប់ពីឆ្នាំ១៩៧៩ ដល់ ២០២០ នៅកម្ពុជាមានប្រជាពលរដ្ឋជិត២ម៉ឺននាក់ បានស្លាប់ និងរងរបួស ដោយពិការដៃជើងជាង ៤,៥ម៉ឺននាក់ ដោយសារគ្រាប់មីន និងគ្រាប់សំណល់ជាតិផ្ទុះ។
កម្ពុជា ត្រូវបន្តបោសសម្អាតផ្ទៃដី ដែលមានមីនចំនួន ៨៤៥គីឡូម៉ែត្រការ៉េ និងសំណល់ជាតិផ្ទុះពីសង្គ្រាម រួមទាំងគ្រាប់បែកចង្កោម ចំនួន១,៣១៦គីឡូម៉ែត្រការ៉េបន្ថែមទៀត ដើម្បីសម្រេចឱ្យបាន នូវចក្ខុវិស័យតាមផែនការយុទ្ធសាស្ត្រជាតិ «កម្ពុជាមួយគ្មានមីនឆ្នាំ២០២៥»។ ដើម្បីសម្រេចឱ្យបាន នូវចក្ខុវិស័យតាមផែនការយុទ្ធសាស្ត្រជាតិ ការបោះសម្អាតផ្ទៃដីមីនទាំងនេះ កម្ពុជា ត្រូវការថវិកាជិត ៤០០លានដុល្លារអាមេរិក៕
