រតនគិរី ថ្ងៃទី២៤ ខែកុម្ភៈ ឆ្នាំ២០២១ -- នៅថ្ងៃ១២កើត ខែផល្គុន ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃអង្គារ ទី២៣ ខែកុម្ភៈ ឆ្នាំ២០២១ ឯកឧត្តម ថង សាវុន អភិបាលខេត្តរតនគិរី បានបើកការដ្ឋានជួសជុលកំណាត់ផ្លូវជាតិលេខ ៧៨-៥ ប្រវែង ១.៦៥០ម៉ែត្រ ទទឹង ១៤ម៉ែត្រចាប់ពីចំណុចមុខផ្សារទំនើបស៊ីត្រា ដល់ចំណុចមុខសណ្ឋាគារ SN បឹងកំសាន្ត ស្ថិតនៅសង្កាត់បឹងកន្សែង ក្រុងបានលុង ខេត្តរតនគិរី ។ លោក សាយ សាមាន ប្រធានមន្ទីរសាធារណការ និងដឹកជញ្ជូនខេត្តរតនគិរីបានលើកឡើងថា ការជួសជុលផ្លូវនេះ ជាប្រភេទគ្រឹះថ្មម៉ិច និងក្រាលកៅស៊ូពីរជាន់(DBST) ដោយប្រើប្រាស់កញ្ចប់ថវិកាជាតិ តាមរយៈក្រសួងសាធារណការ និង ដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ អនុវត្តន៍គម្រោងជួសជុលឡើងវិញដោយមន្ទីរសាធារណការ និងដឹកជញ្ជូនខេត្តរតនគិរី។ ផ្លូវជាតិលេខ ៧៨-៥ ជាផ្លូវមួយយ៉ាងសំខាន់សម្រាប់ការអភិវឌ្ឍសេដ្ឋកិច្ចក្នុងក្រុងបានលុង ហើយបានតភ្ជាប់ឆ្ពោះទៅបណ្ដាស្រុកអូរជុំ , វើនសៃ និង ស្រុកតាវែង ដែលមានចរាចរណ៍យ៉ាងមមារញឹក ។ លោកប្រធានមន្ទីរបានស្នើឱ្យប្រជាពលរដ្ឋក្នុងក្រុងបានលុង ជាពិសេសអ្នកដែលរស់នៅសងខាងតាមបណ្តោផ្លូវជាតិ៧៨-៥ទាំងអស់ ចូលរួមបង្កលក្ខណៈងាយស្រួល និងផ្តល់កិច្ចសហការជាមួយមន្ទីរសាធារណការ និង ដឹកជញ្ជូនខេត្ត ដើម្បីជំរុញឱ្យគម្រោងជួសជុលនេះ អាចដំណើរការបានដោយរលូន និងសម្រេចជោគជ័យតាមការគ្រោងទុក ។ ក្នុងឱកាសនោះ ឯកឧត្តម ថង សាវុន អភិបាលខេត្តរតនគិរី បានចាត់ទុកហេដ្ឋារចនាសម្ព័ន្ធ ផ្លូវ ស្ពាន ជាសសៃឈាមក្នុងការជំរុញកំណើនសេដ្ឋកិច្ចជាតិ និងការកាត់បន្ថយភាពក្រីក្ររបស់ប្រជាពលរដ្ឋ តាមរយៈការដឹកជញ្ជូនកសិផលផ្សេងៗ ដែលប្រមូលផលបានទៅកាន់ទីផ្សារ ក៏ដូចជាការងាយស្រួល ក្នុងការដឹកសម្ភារ ឧបភោគបរិភោគ និងសម្ភារសំណង់ ពីទីផ្សារ ដែលផ្គត់ផ្គង់ដល់ជីវភាពរស់នៅប្រចាំថ្ងៃរបស់បងប្អូន។ ដើម្បីដំណើរការជួសជុលផ្លូវនេះឱ្យទទួលបានជោគជ័យ ឯកឧត្តមអភិបាលខេត្តបានសំណូមពរដល់បងប្អូនប្រជាពលរដ្ឋ មេត្តាជួយសហការ កុំដឹកជញ្ជូនសំពីងសំពោង និងដឹកក្រួស ថ្ម ខ្សាច់ ដោយគ្មានការវេចខ្ចប់ឱ្យបានត្រឹមត្រូវ ។ ពិសេសអាជ្ញាធរដែនដី មេត្តាផ្សព្វផ្សាយឱ្យបានទូលំទូលាយ ដល់ប្រជាពលរដ្ឋរបស់ខ្លួនដែលរស់នៅតាមបណ្តោយផ្លូវ សូមចូលរួមសហការសម្របសម្រួលរាល់បញ្ហាដែលប៉ះពាល់ដល់ផលប្រយោជន៍របស់បងប្អូនប្រជាពលរដ្ឋ។ ឆ្លើយតបនឹងសភាពការណ៍ ព្រឹត្តិការណ៍សហគមន៍២០កុម្ភៈ ដែលកំពុងមានការឆ្លងរាត ត្បាតជំងឺកូវីដ-១៩ ក្នុងសហគមន៍ ឯកឧត្តម ថង សាវុន បានធ្វើការអំពាវនាវដល់ប្រជាពលរដ្ឋក្នុងខេត្តរតនគិរី បន្តថែរក្សាការពារខ្លួន ហើយបើមិនមានការចាំបាច់ទេ សូមកុំធ្វើដំណើរទៅភ្នំពេញ ពីព្រោះថា ទីក្រុងភ្នំពេញកំពុងមានការផ្ទុះជំងឺកូវីដ-១៩ក្នុងសហគមន៍ និងត្រូវគោរពតាមការណែនាំរបស់រាជរដ្ឋាភិបាល ក៏ដូចជាក្រសួងសុខាភិបាល នូវវិធានការ៣កុំ ៣ការពារ ដើម្បីយើងរួមគ្នាប្រយុទ្ធប្រឆាំងជំងឺដ៏កាចសាហាវនេះ៕