[Rasmei Kampuchea Daily News] - ក្រសួងសាធារណការនឹងធ្វើសន្និបាតនៅថ្ងៃទី១៦-១៧ ខែកុម្ភៈ ឆ្នាំ២០២១ ក្រោមប្រធានបទ “លើកកម្ពស់ការអភិវឌ្ឍធនធានមនុស្ស វិទ្យាសាស្ត្រ បច្ចេកវិទ្យា»
ភ្នំពេញ៖ ក្រសួងសាធារណការនិងដឹកជញ្ជូន នឹងប្រារព្ធធ្វើសន្និបាតបូក សរុបលទ្ធផលការងារឆ្នាំ២០២០និងលើកទិសដៅការងារឆ្នាំ២០២១នៅថ្ងៃទី១៦-១៧ ខែ កុម្ភៈក្រោមប្រធានបទ “លើកកម្ពស់ការអភិវឌ្ឍធនធានមនុស្ស វិទ្យាសាស្ត្រ បច្ចេកវិទ្យា ដើម្បីពង្រឹងគុណភាពប្រសិទ្ធភាពក្នុងវិស័យសាធារណការ និងដឹកជញ្ជូន”។
កាលថ្ងៃទី១២ ខែកុម្ភៈ ឆ្នាំ២០២១ នៅទីស្តីការក្រសួងសាធារណការ និងដឹកជញ្ជូន លោក តូច ចាន់កុសល រដ្ឋលេខាធិការប្រចាំការ និងជាប្រធានគណៈកម្មការ បានអញ្ជើញដឹកនាំកិច្ចប្រជុំពិនិត្យវឌ្ឍនភាពការងារត្រៀមរៀបចំសន្និបាតនេះ ដោយមានការចូលរួមពីថ្នាក់ ដឹកនាំ និងសមាជិកសមាជិកានៃអនុគណៈកម្មការទាំងអស់។
លោករដ្ឋលេខាធិការបានឱ្យដឹងថាការត្រៀមរៀបចំសន្និបាតបូកសរុបលទ្ធផលការងារឆ្នាំ២០២០ និងលើកទិសដៅការងារឆ្នាំ២០២១ របស់ក្រសួង ត្រូវបានរៀបចំស្ទើរតែ១០០%ហើយ ដោយសារអនុគណៈកម្មការនីមួយៗបានខិតខំប្រឹងប្រែងបំពេញការងារយ៉ាងយកចិត្តទុកដាក់ និងមានទំនួលខុសត្រូវខ្ពស់។
សន្និបាតនេះ នឹងធ្វើឡើងតាមរយៈការចូលរួមដោយផ្ទាល់ និង តាមរយៈប្រព័ន្ធវីដេអូពី ចម្ងាយដោយប្រកាន់ខ្ជាប់តាមវិធានការការពាររបស់ក្រសួងសុខាភិបាល ដើម្បីទប់ស្កាត់ការឆ្លងរីករាលដាលនៃជំងឺកូវីត-១៩។
គួបញ្ជាក់ផងដែរថា៖ សន្និបាតនេះនឹងប្រារព្ធធ្វើឡើង ក្រោមអធិបតីភាពឧបនាយករដ្ឋមន្ត្រីបណ្ឌិតសភាចារ្យ អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញវត្ថុ តំណាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕
