មន្ត្រីជាន់ខ្ពស់ក្រសួងសាធារណការ និងដឹកជញ្ជូន បានអោយដឹងថា ក្នុងឆ្នាំ២០២០ កន្លងទៅនេះ មានករណីគ្រោះថ្នាក់ចរាចរណ៍ ដែលកើតទៅលើរថយន្តដឹកជញ្ជូនកម្មករ ចំនួន ១៥លើកប៉ុណ្ណោះ គឺមានការកើនឡើង ១ករណី បើប្រៀបធៀបទៅនឹងឆ្នាំ២០១៩ ខណៈម្ចាស់រថយន្តដឹក​កម្មករ​ជាងពាក់កណ្ដាល បានប្ដូរមកប្រើប្រាស់រថយន្ត ដែលមានសុវត្ថិភាព។ ថ្លែងពីពីសិក្ខាសាលាបណ្តុះបណ្តាល ស្តីពី សុវត្ថិភាពចរាចរណ៍ផ្លូវគោក សម្រាប់មន្ត្រីសហភាព​សហព័ន្ធ និងសហជីពកម្មករនិយោជិត នាថ្ងៃនេះ លោកជំទាវ មឹន មាណវី រដ្ឋលេខាធិការក្រសួងសាធារណៈការ និងដឹកជញ្ជូនបានឲ្យដឹងថា ក្នុងឆ្នាំ២០២០កន្លងទៅនេះ ករណីគ្រោះថ្នាក់ចរាចរណ៍ដែលកើតទៅលើរថយន្តដឹកជញ្ជូនកម្មករមានចំនួន១៥លើកប៉ុណ្ណោះ ដែលមានការកើនឡើង១ករណី បើប្រៀបធៀបទៅនឹងឆ្នាំ២០១៩។ ក្នុងគ្រោះថ្នាក់ចរចារណ៍លើរថយន្តដឹកកម្មករទាំង១៥លើបានបណ្តាលឲ្យមានការស្លាប់កម្មករ និយោជិត ធ្វើដំណើរទៅធ្វើការងារចំនួន ៤នាក់បាត់បង់ជីវិត និងរងរបួស ធ្ងន់ស្រាលសរុប ៣៥៣នាក់។ បើតាមអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោករូបនេះ ប៉ុន្មានឆ្នាំចុងក្រោយនេះ រថយន្តដឹកកម្មករប្រហែលជាពាក់កណ្តាលហើយ បានផ្លាស់ប្តូររថយន្តដែលមានសុវត្ថិភាពវិញ។ យោងតាមបេឡាជាតិរបបសន្តិសុខសង្គម នៅឆ្នាំ២០១៩ មានករណីគ្រោះថ្នាក់ចរាចរណ៍កើតឡើងលើរថយន្តដឹកកម្មករចំនួន១៤លើក មានកម្មកររងគ្រោះសរុប៣៣៤នាក់ របួសធ្ងន់ចំនួន៤៨នាក់ និងស្លាប់ចំនួន៥នាក់។ ស្ថិតក្នុងស្ថានភាពជំងឺកូវីត១៩យ៉ាងណាក៏ដោយ បេឡាជាតិសន្តិសុខសង្គម (ប.ស.ស.) នៅតែបន្ត និងជំរុញការអប់រំផ្សព្វផ្សាយបន្ថែមទៀតអំពីច្បាប់ស្តីពីសុវត្ថិភាពចរាចរណ៍ផ្លូវគោក ដល់បងប្អូនអ្នកបើកបររថយន្តដឹកកម្មករ និងបងប្អូនកម្មករនិយោជិត ធ្វើយ៉ាងណាចូលរួមចំណែកក្នុងការកាត់បន្ថយករណីគ្រោះថ្នាក់ចរាចរណ៍ផ្លូវគោកឱ្យមកនៅកម្រិតទាបបំផុត ឆ្លើយតបទៅនឹងអនុសាសន៍របស់ប្រមុខរាជរដ្ឋាភិបាលកម្ពុជា។ ទោះបីជាយ៉ាងណា បើតាម​ឯកឧត្តម ហេង សុផាន់ណារិទ្ធ ប្រធានការិយាល័យគោលនយោបាយនៃអង្គភាពមួយនេះ កន្លងមកបេឡាជាតិសន្តិសុខសង្គម សហការជាមួយក្រសួងសាធារណការ និងដឹកជញ្ជូន បានរៀបចំកម្មវិធីអប់រំផ្សព្វផ្សាយដល់អ្នកបើកបររថយន្តដឹកកម្មករ និងកម្មករនិយោជិត អំពីច្បាប់ស្តីពីសុវត្ថិភាពចរាចរណ៍ផ្លូវគោក និងជំរុញឱ្យអ្នកបើកបររថយន្តដឹកកម្មករនិយោជិតទាំងអស់ប្រើប្រាស់រថយន្ដដឹកអ្នកដំណើរ ដើម្បីដឹកជញ្ជូនកម្មករនិយោជិត ឱ្យស្របតាមស្តង់ដារតាមការណែនាំរបស់រាជរដ្ឋាភិបាល​។ សូមបញ្ជាក់ថា យោងតាមរបាយការណ៍របស់ការិយាល័យគោលនយោបាយ បច្ចុប្បន្នមានរថយន្តដឹកកម្មករនិយោជិតសរុបចំនួន ៤៥៣៧គ្រឿង បានចរាចរណ៍ដឹកកម្មករនិយោជិតនៅកម្ពុជា ក្នុងនោះរថយន្តប្រភេទទេសចរណ៍ មានចំនួន ១៧១០គ្រឿង ស្មើនឹង ៣៨% និងរថយន្តដឹកទំនិញមានចំនួន ២៨២៧គ្រឿង ស្មើនឹង ៦២%៕