ខេត្តប៉ៃលិន៖ មួកសុវត្ថិភាពពិតជាមានសារសំខាន់ខ្លាំងណាស់ដល់អាយុជីវិតរបស់មនុស្សម្នាក់ៗ ជាពិសេសអ្នកបើកបរ ឬជិះម៉ូតូ ដោយអាចជួយការពារថែរក្សាក្បាលរបស់យើង ពេលជួបគ្រោះថ្នាក់ដួលបោកទៅលើផ្លូវ ឬលើដី មិនឱ្យទទួលរងការគ្រោះថ្នាក់ធ្ងន់ធ្ងរ ឬស្លាប់នោះឡើយ។ ដូច្នេះសូមឱ្យប្រជាពលរដ្ឋទាំងអស់យកចិត្តទុកដាក់ ក្នុងការពាក់មួកសុវត្ថិភាពជាប្រចាំ ទោះបីបើកបរម៉ូតូពេលថ្ងៃ ឬយប់ក៏ដោយ ព្រោះករណីគ្រោះថ្នាក់ចរាចរណ៍កើតឡើង យើងមិនអាចដឹងជាមុននោះឡើយ។ នេះជាការលើកឡើងរបស់ឯកឧត្តម ផាន់ ចាន់ធុល អភិបាលរងខេត្តប៉ៃលិន ដែលថ្លែងកាលពីព្រឹក ថ្ងៃទី១៣ ខែកុម្ភ: ឆ្នាំ២០១៨ នៅមុខបរិវេណសាលាខេត្តប៉ៃលិន ក្នុងពិធីផ្សព្វផ្សាយច្បាប់មួកសុវត្ថិភាព និងចែកមួកសុវត្ថិភាពរបស់ក្រុមការងារអនុគណ:កម្មាការជាតិសុវត្ថិភាពផ្លូវគោកខេត្ត ។ ឯកឧត្តម បានបន្តទៀតថា ប្រជាពលរដ្ឋ ត្រូវមានប័ណ្ណបើកបរត្រឹមត្រូវតាមប្រភេទយានយន្ត ដែលកំពុងបើកបរ ហើយត្រូវបើកបរដោយចេះការពារខ្លួន ត្រូវចេះអធ្យាស្រ័យគ្នា ក្នុងពេលបើកបរ និងត្រូវចាំជានិច្ចថា ជីវិតគ្មានការដាក់លក់នៅទីផ្សារនោះទេ។ ម្យ៉ាងវិញទៀត កុំផ្ទុកមនុស្ស ឬទំនិញលើសចំណុះ កំណត់ កុំបើកបរហួសល្បឿនកំណត់ កុំបើកបរក្រោមឥទ្ធិពលនៃគ្រឿងស្រវឹង និងសារធាតុញៀន កុំជែងប្រថុយនឹងគ្រោះថ្នាក់។ សូមកុំប្រើទូរស័ព្ទក្នុងពេលបើកបរ កុំប្រមាថអាយុជីវិតអ្ន កដទៃ ដូចដែលយើងមិនចង់ឱ្យអ្នកដទៃប្រមាថអាយុជីវិតរបស់យើងដែរ។ ចំណែកលោក អ៊ាត សារ៉ាត់ ប្រធានមន្ទីរសាធារណ:ការ និងដឹកជញ្ជូនខេត្តប៉ៃលិន បានឱ្យដឹងដែរថា ក្រុមការងារអនុគណ:កម្មាធិការជាតិសុវត្ថិភាពផ្លូវគោកខេត្តផ្សព្វផ្សាយច្បាប់ចារាចរណ៍ និងចែកមួកសុវត្ថិភាពមានចំនួន៤លើករួចមកហើយ ដោយចែកជូនប្រជាពលរដ្ឋ និងណែនាំពីច្បាប់ចរាចរណ៍ជូនពួកគាត់ ដើម្បីជៀសវាងគ្រោះថ្នាក់កើតឡើង។ លោកបន្តទៀតថា ការចែកមួកនេះគឺដល់អ្នក ណាដែលឆ្លើយត្រូវនឹងសំណួរ ហើយក៏មានជូនសៀវភៅច្បាប់ចរាចរណ៍ ខិតប័ណ្ណស្តីពីការការពារករ ណីគ្រោះថ្នាក់ចរាចរផងដែរ។ លោកសំណូមពរដល់ប្រជាពលរដ្ឋទាំងអស់កុំស្តាយថវិកាក្នុងការទិញមួកយកទៅពាក់ដើម្បីការពារ និងរក្សាសុវត្ថិភាពជីវិតរបស់ខ្លួននោះឡើយ៕