[Kampuchea Thmey] - ការជួសជុលផ្លូវជាតិលេខ៥ដែលរងការខូចខាតដោយជំនន់ទឹកភ្លៀង បានក្រាលកៅស៊ូជាបណ្តើរៗហើយ
2020-12-21
Go to the website published Kampuchea Thmey
បាត់ដំបង៖ កំណាត់ផ្លូវជាតិលេខ៥ក្រោយពីបានជួសជុលតាមកន្លែងដែលបានខូចខាតប្រវែងសរ៉ុប៧គីឡូម៉ែត្រ២០០ម៉ែត្រដែលចាប់ពីចំណុចរង្វង់មូលព្រះនរាយហ៍ទៅដល់រង្វង់មូលយាយទេពឋិតក្នុងសង្កាត់អូរចា ក្រុងបាត់ដំបង ដោយជំនន់ទឹកភ្លៀងចាប់ពីព្រឹកថ្ងៃទី២០ខែធ្នូ ឆ្នាំ២០២០នេះក្រុមការងាររបស់មន្ទីរសាធារណការនិងដឹកជញ្ជូនខេត្តបាត់ដំបងបានបន្តអនុវត្តក្រាលកៅស៊ូហើយ។
មន្ត្រីសាធារណការនិងដឹកជញ្ជូនខេត្តបាត់ដំបងបានឲ្យដឹងថា ផ្លូវដែលក្រុមការងារកំពុងអនុវត្តជួសជុលនិងក្រាលកៅស៊ូនាពេលនេះមន្ទីរសាធារណការរួមជាមួយនឹងក្រុមការងារ(អូរមីឡេកៅស៊ូអ៊ុតផ្លូវជាតិលេខ៥)បាននឹងកពុងពន្លឿននិងបង្កើនគុណភាពឲ្យបានល្អប្រសើរជាងមុននឹងបានរួចរាល់យ៉ាងយូរបីអាទិត្យខាងមុខទៀត។
ក្រោយពីបញ្ចប់ការក្រាលកៅស៊ូលើកំណាត់ផ្លូវខាងលើនេះរដ្ឋបាលខេត្តបាត់ដំបងក៏មានគម្រោងស្ថាបនាផ្លូវអ៊ុតកៅស៊ូបេតុង(AC)លើកំណាត់ផ្លូវលេខ១បន្តទៀតដោយចាប់ពីរបងសាលាខេត្តខាងត្បូងដល់ផ្សារអប្សរាផ្សារលើដែលមានប្រវែង៤៤៨ម៉ែត្រផងដែរ ក្នុងនោះក៏មានការដាក់លូរំដោះទឹកប្រវែង២២០ម៉ែត្រចាប់ពីអាហារដ្ឋានតៃតៃលី រហូតដល់ផ្សារអប្សរាផ្សារលើដែលការងារនេះនឹងចាប់ផ្តើមដំណើរការយ៉ាងយូរត្រឹមដំណាច់ឆ្នាំ២០២០។
ក្នុងកិច្ចការនេះរដ្ឋបាលខេត្តក៏បានសំណូមពរដល់លោកអភិបាលនៃគណៈអភិបាលក្រុងលោកចៅសង្កាត់ស្វាយប៉ោរួមជាមួយប្រជាពលរដ្ឋដែលរស់នៅសងខាងផ្លូវមេត្តាជួយបង្កលក្ខណៈងាយស្រួលក្នុងដំណើរការខាងលើនេះ ទទួលបានដោយជោគជ័យតាមផែនការរបស់រដ្ឋបាលខេត្ត៕
