ឯកឧត្តម វង្ស ពិសិដ្ឋ អនុរដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាការងារលើការអភិវឌ្ឍវិស័យទឹកស្អាតនៅកម្ពុជា ភ្នំពេញ៖ ថ្ងៃសុក្រ ១៤រោច ខែអស្សុជ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី១៦ ខែតុលា ឆ្នាំ២០២០ ឯកឧត្តម វង្ស ពិសិដ្ឋ អនុរដ្ឋលេខាធិការ ក្រសួងសាធារណការ និងដឹកជញ្ជូន តំណាងឯកឧត្ដមអនុរដ្ឋលេខាធិការ កឹម បូរី ប្រធានក្រុមការងារទទួលបន្ទុក បានអញ្ជើញដឹកនាំកិច្ចប្រជុំ ស្ដីពីការអភិវឌ្ឍវិស័យទឹកស្អាត និងគម្រោងផ្គត់ផ្គង់ទឹកស្អាត និងអនាម័យ ដោយមានការអញ្ជើញចូលរួមពីមន្ត្រីជំនាញក្រោមឱវាទ ក្រសួង និងភាគីពាក់ព័ន្ធ។ កិច្ចប្រជុំនេះ ធ្វើឡើងដើម្បីជជែកពិភាក្សាលើរបៀបវារៈមួយចំនួនដែលជាគំនិតផ្តួចផ្តើមរួមគ្នារបស់ក្រសួងសាធារណការ និងដឹកជញ្ជូន ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងស្ថាប័ន-ភាគីពាក់ព័ន្ធសំខាន់ ដើម្បីពង្រឹងការគ្រប់គ្រងទឹកស្អាតជូនប្រជាពលរដ្ឋ។ ឯកឧត្ដមអនុរដ្ឋលេខាធិការបានមានប្រសាសន៍ថា ដើម្បីធានាប្រយោជន៍សុខភាពសាធារណៈ អនាម័យនៅក្នុងទីក្រុង ជនបទ និងដើម្បីបំពេញបន្ថែមលើការវិនិយោគដោយធនាគារអភិវឌ្ឍន៍អាស៊ី រាជរដ្ឋាភិបាលកម្ពុជាបានស្នើសុំការគាំទ្រពីធនាគារពិភពលោក សម្រាប់ការអភិវឌ្ឍ និងចូលរួមចំណែកធានាឱ្យបាននូវបរិស្ថានស្អាត សុខភាពអនាម័យសាធារណៈល្អប្រសើរ លើកកម្ពស់ជីវភាពរស់នៅ ក៏ដូចជាឆ្លើយតបទៅនឹងគោលដៅអភិវឌ្ឍន៍ប្រកបដោយចីរភាពឆ្នាំ២០៣០ និងការគ្រប់គ្រងទឹកស្អាត និងអនាម័យប្រកបដោយប្រសិទ្ធភាពសម្រាប់ទាំងអស់គ្នា។ ឯកឧត្ដមអនុរដ្ឋលេខាធិការ បានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះ ធនាគារពិភពលោក ដៃគូសហការយូរអង្វែងដទៃទៀតរបស់ក្រសួងសាធារណការ និងដឹកជញ្ជូន និងក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ សម្រាប់ការអភិវឌ្ឍវិស័យផ្គត់ផ្គង់ទឹកស្អាត តាមរយៈគម្រោងផ្គត់ផ្គង់ទឹកស្អាត និងអនាម័យធានាបានសុខភាព ចំពោះបងប្អូន ប្រជាពលរដ្ឋ រួមចំណែក អភិវឌ្ឍន៍ប្រទេស កសាងសេដ្ឋកិច្ចជាតិឱ្យបានរីកចំរើន៕