ភ្នំពេញ៖ រដ្ឋបាលរាធានីភ្នំពេញកបានចេញសេចក្តីជូនដំណឹងមួយ ដើម្បីប្រកាសជ្រើសរើសកម្មករជាច្រើននាក់ ដើម្បីបំពេញការងារជាអ្នកប្រមូល និងដឹកជញ្ជូនសំរាម សំណល់រឹង នៅរាជធានីភ្នំពេញ ក្រោយពីកម្មករក្រុមហ៊ុន ស៉ិនទ្រីធ្វើកូដកម្មផ្អាក មិនប្រមូលសំរាម។ នេះបើយោងតាមសេចក្ដីជូនដំណឹងរបស់រដ្ឋបាលរាជធានីភ្នំពេញ ដែលព័ត៌មានយើងទទួលបាននៅរសៀលនៅថ្ងៃទី០៥ ខែតុលា ឆ្នាំ២០២០នេះ ។ ក្នុងសេចក្តីបានបញ្ជាក់ថា ប្រសិនបើប្រជាពលរដ្ឋចាប់អារម្មណ៍ ក្នុងបំពេញការងារជាអ្នកប្រមូល និងដឹកជញ្ជូនសំរាមសំណល់រឹង នៅរាជធានីភ្នំពេញត្រូវទៅដាក់ពាក្យនៅរដ្ឋបាលរាជធានីភ្នំពេញ ឬទំនាក់ទំនងតាមរយទូរស័ព្ទលេខ ‪០១៧ ៧២២ ២២៨‬ និង ‪០១២ ៩៩២៥៩៩‬ ចាប់ពីថ្ងៃនេះតទៅ។ គួរបញ្ជាក់ថា រដ្ឋបាល​រាជធានី​ភ្នំពេញ កាលពីថ្ងៃទី​៣ ខែ តុលា ឆ្នាំ​២០២០កន្លងមកនេះបានចេញ​សេចក្តីជូនដំណឹងម្តងហើយ ដោយបានអំពាវនាវ​ដល់​បងប្អូន​កម្មករ​របស់​ក្រុមហ៊ុន​ស៊ីន​ទ្រី បញ្ឈប់​ការធ្វើ​កូដកម្ម ដោយ យក​បញ្ហា​សំរាម​ជា​ចំណាប់ខ្មាំង ដើម្បី​ទាមទារ​លក្ខខណ្ឌ​ដែល​ខុសច្បាប់ ហើយ​ត្រូវ​ចូល​បំពេញការងារ​ផ្តល់​សេវា​ប្រមូល និង​ដឹកជញ្ជូន​សំរាម​ជា​តាម​ធម្មតា​វិញ យ៉ាងយូរបំផុត​នៅ​ថ្ងៃ​ចន្ទ ទី​៥ ខែតុលា ឆ្នាំ​២០២០នេះ ជា​កំហិត​។ បើ​មិន​ដូច្នេះ​ទេ រដ្ឋបាល​រាជធានី​ភ្នំពេញ នឹង​ប្រកាស​ជ្រើសរើស​កម្មករ​ថ្មី ដើម្បី​បំពេញការងារ​ផ្តល់​សេវា​ប្រមូល និង​ដឹកជញ្ជូន​សំរាម ដោយ​មិន​ទទួលយក​កម្មករ​រប​ស់​ក្រុមហ៊ុន​ស៊ីន​ទ្រី​ឡើយ​ ហើយនេះជាថ្ងៃទី០៥តុលាហើយ ទើបប្រកាសជ្រើសរើសកម្មករប្រមូលសំរាម ខណៈកម្លាំងប្រជាការពារមិនគ្រប់គ្រាន់ ក្នុងការដើរប្រមូលសំរាមនៅក្នុងភូមិសាស្ត្ររាជធានីភ្នំពេញ៕