[Kampuchea Thmey] - ផ្លូវក្រវាត់ក្រុងទី ៤ រដ្ឋាភិបាលសិក្សាចប់សព្វគ្រប់ហើយ
2020-10-01
Go to the website published Kampuchea Thmey
ក្នុងពេលផ្លូវក្រវាត់ក្រុងទី ៣ កំពុងសម្រុកស្ថាបនាបានជាង ៤០ ភាគរយ រដ្ឋមន្ត្រីក្រសួងសាធារណការនិងដឹកជញ្ជូន បានបង្ហើបពីគម្រោងស្ថាបនាផ្លូវក្រវាត់ក្រុងទី ៤ ដែលបានសិក្សាចប់សព្វគ្រប់។
ក្នុងពិធីដាក់ដំណើរការមជ្ឈមណ្ឌលផ្តល់សេវាសាធារណនៅផ្សារទំនើបជីបម៉ុង កាលពីម្សិលមិញ លោករដ្ឋមន្រ្តី ស៊ុន ចាន់ថុល បានបង្ហើបពីគម្រោងអភិវឌ្ឍផ្លូវក្រវាត់ក្រុងទី ៤ បន្ទាប់ពីផ្លូវក្រវាត់ក្រុងទី ៣ កំពុងសម្រុកស្ថាបនាបានជាង ៤០ ភាគរយទៅហើយនោះ។ លោករដ្ឋមន្រ្តីបញ្ជាក់ថា ផ្លូវក្រវាត់ក្រុងទី ៤ បានសិក្សាចប់សព្វគ្រប់ហើយ។ យ៉ាងណា តម្លៃក៏ដូចជាគម្រោងអាចចាប់ផ្តើមនៅពេលណានោះ លោករដ្ឋមន្រ្តីមិនផ្តល់ព័ត៌មានលម្អិតទេ។
ផ្លូវក្រវាត់ក្រុងទី៣ (ចាប់ពីផ្លូវជាតិលេខ ៤ ដល់ផ្លូវជាតិលេខ ១) មានប្រវែង សរុបជិត ៥៣គីឡូម៉ែត្រ គិតត្រឹមខែកញ្ញា សម្រេចបានជាង ៤០ ភាគរយ។ គម្រោងនេះ បានបើកការដ្ឋានសាងសង់កាលពីថ្ងៃទី ១៤ ខែមករា ឆ្នាំ២០១៩ ដែលគ្រោងចំណាយថវិកា ២៧៣ លានដុល្លារអាមេរិក ក្រោមហិរញ្ញប្បទានសម្បទានពីរដ្ឋាភិបាល នៃសាធារណរដ្ឋប្រជាមានិតចិន និងថវិកាបដិភាគរបស់រាជរដ្ឋាភិបាលកម្ពុជា៕
