[CEN] - សម្ដេចពិជ័យសេនា ទៀ បាញ់ ដឹកនាំកិច្ចប្រជុំគម្រោងសាងសង់ផ្លូវចំនួន ៣៨ខ្សែ ក្នុងក្រុងសៀមរាប
2020-09-10
Go to the website published CEN
ភ្នំពេញ៖សម្ដេចពិជ័យសេនា ទៀ បាញ់ ដឹកនាំកិច្ចប្រជុំគម្រោងសាងសង់ផ្លូវចំនួន ៣៨ខ្សែ ក្នុងក្រុងសៀមរាប ក្នុងគោលបំណងប្រែក្លាយក្រុងមួយនេះឱ្យក្លាយជាទីក្រុង ដែលពោរពេញដោយសោភ័ណភាព បរិស្ថានល្អ ជំរុញការបង្កើតការងារ និងលើកស្ទួយជីវភាពប្រជាពលរដ្ឋ ព្រមទាំងជំរុញកំណើនភ្ញៀវទេសចរណ៍ និងកំណើនសេដ្ឋកិច្ចជាតិក្រោយវិបត្តិជំងឺ កូវីដ-១៩ បន្ទាប់ពីរាជរដ្ឋាភិបាលបានសម្រេចបញ្ចេញកញ្ចប់ថវិកា ប្រមាណ ១៥០ លានដុល្លារអាមេរិក សម្រាប់ការអនុវត្តគម្រោងនេះ។
នៅ ថ្ងៃទី៩ ខែកញ្ញា ឆ្នាំ២០២០ នៅ ទីស្តីការក្រសួង មានបើកកិច្ចប្រជុំ ស្តីពី គម្រោងកែលម្អហេដ្ឋារចនាសម្ព័ន្ធផ្លូវ ក្នុងទីក្រុងសៀមរាប ក្រោមអធិបតីភាពដ៏ខ្ពង់ខ្ពស់សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ដោយមានការអញ្ជើញចូលរួមពីឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួង រៀបចំដែនដី នគរូបនីយកម្ម និងសំណង់ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង សាធារណការ និងដឹកជញ្ជូន ព្រមទាំងមន្ត្រីជាន់ខ្ពស់ និងមន្ត្រីជំនាញក្រោមឱវាទក្រសួងទាំងបី ផងដែរ។
សូមជម្រាបជូនថា៖ រាជរដ្ឋាភិបាលបានសម្រេចបញ្ចេញកញ្ចប់ថវិកា ប្រមាណពី ១០០ ទៅ ១៥០ ដុល្លារអាមេរិក សម្រាប់គម្រោងសាងសង់ផ្លូវចំនួន ៣៨ខ្សែ ក្នុងក្រុងសៀមរាប ក្នុងគោលបំណងប្រែក្លាយក្រុងមួយនេះឱ្យក្លាយជាទីក្រុង ដែលពោរពេញដោយសោភ័ណភាព បរិស្ថានល្អ ជំរុញការបង្កើតការងារ និងលើកស្ទួយជីវភាពប្រជាពលរដ្ឋ ព្រមទាំងជំរុញកំណើនភ្ញៀវទេសចរណ៍ និងកំណើនសេដ្ឋកិច្ចជាតិក្រោយវិបត្តិជំងឺ កូវីដ-១៩។
គម្រោងកែលម្អហេដ្ឋារចនាសម្ព័ន្ធផ្លូវក្នុងទីក្រុងក្នុងទីរួមខេត្តសៀមរាបនេះ មានចំនួន៣៨ខ្សែ មានប្រវែង សរុប៩៨,៣៤គីឡូម៉ែត្រ ហើយគម្រោងនេះគ្រោងនឹងបញ្ចប់នៅចុងឆ្នាំ២០២១។ គម្រោងនេះគ្រោងនឹងសិក្សាសាងសង់ផងដែរ នូវប្រព័ន្ធលូ ចិញ្ចើមផ្លូវ ផ្លូវថ្មើរជើង ផ្លូវជិះកង់ ចំណតរថយន្ត ប្រព័ន្ធបំភ្លឺផ្លូវសាធារណៈ ផ្លាកសញ្ញានិងគំនូសចរាចរណ៍ ប្រព័ន្ធកាមេរ៉ាសុវត្ថិភាព អាចចម្រោះទឹកកខ្វក់ និងការធ្វើសួននិងដាំដើមឈើ ។
ការស្តារឡើងវិញនូវហេដ្ឋារចនាសម្ព័ន្ធទាំងនេះ ជាការបើកទំព័រប្រវត្តិសាស្ត្រថ្មីមួយ មិនធ្លាប់មានពីមុនមកក្នុងការស្ថាបនាផ្លូវទូទាំងក្រុងសៀមរាប បែបនេះ ហើយនេះគឺជាការបង្ហាញ នូវការយកចិត្តទុកដាក់ ពីប្រមុខរាជរដ្ឋាភិបាល ក្នុងការប្រែក្លាយទីក្រុងវប្បធម៌ប្រវត្តិសាស្ត្រ ដ៏សម្បូរបែបមួយនេះ ឲ្យកាន់តែមានភាពទាក់ទាញដល់ភ្ញៀវទេសចរ និងការវិនិយោគបន្ថែមទៀត ស្របទៅនឹងគោលនយោបាយអភិវឌ្ឍន៍របស់រាជរដ្ឋាភិបាល។
សម្ដេចពិជ័យសេនាឧបនាយករដ្ឋមន្ត្រី ប្រធានអង្គប្រជុំ បានសម្តែងនូវសេចក្តីសោមនស្សរីករាយ និងថ្លែងអំណរគុណយ៉ាងជ្រាលជ្រៅ ដល់សម្តេចតេជោនាយករដ្ឋមន្ត្រី ដែលបានសម្រេចផ្តល់ថវិកាជាតិ ដល់ការកែលម្អហេដ្ឋារចនាសម្ព័ន្ធដឹកជញ្ជូន នៅក្នុងក្រុងសៀមរាប ព្រមទាំងបានផ្តល់ទំនុកចិត្តដល់សម្តេចក្នុងការដឹកនាំគម្រោងនេះដោយផ្ទាល់ ដោយមានការចូលរួមជ្រោមជ្រែងពីក្រសួងជំនាញ រួមមានក្រសួងសាធារណការ និងដឹកជញ្ជូន ក្រសួងរៀបចំដែនដី នគរូបនីយកម្ម និងសំណង់ និងក្រសួង ស្ថាប័នពាក់ព័ន្ធផ្សេងទៀត។
ថ្លែងទៅកាន់អង្គប្រជុំនាឱកាសនោះ ឯកឧត្តមទេសរដ្ឋមន្ត្រី បានសម្ដែងនូវមោទនភាពជាអនេកដែលរាជរដ្ឋាភិបាល បានបញ្ចេញកញ្ចប់ថវិកា ក្នុងចំនួនទឹកប្រាក់យ៉ាងច្រើនបែបនេះ ក្នុងស្ថានភាពកម្ពុជាក៏ដូចជា ពិភពលោក កំពុងប្រឈមនឹងជំងឺកូវីដ១៩ ដើម្បីអភិវឌ្ឍហេដ្ឋារចនាសម្ព័ន្ធផ្លូវ ៣៨ខ្សែនៅក្នុងក្រុងសៀមរាប សំដៅកែប្រែមុខមាត់ថ្មី នៃទឹកដីអង្គរ នៃយើងឱ្យកាន់តែមានភាពស្រស់បំព្រង និងកាន់តែមានភាពទាក់ទាញ។ ជាងនេះទៅទៀត ឯកឧត្តមទេសរដ្ឋមន្ត្រីបានថ្លែងអំណរគុណយ៉ាងជ្រាលជ្រៅ ដែលគម្រោងនេះត្រូវបាន ដឹកនាំផ្ទាល់ដោយ សម្តេចពិជ័យសេនា ទៀ បាញ់ និងមានការចូលរួម ជ្រោមជ្រែង ពីសំណាក់ ឯកឧត្តមឧបនាយករដ្ឋមន្ត្រី ជា សុផារ៉ា តាមការសម្រេចដ៏ខ្ពង់ខ្ពស់ពី សម្តេចតេជោ នាយករដ្ឋមន្ត្រី។
ឯកឧត្តមទេសរដ្ឋមន្ត្រី បានប្ដេជ្ញាយ៉ាងមុតមាំថានឹងខិតខំប្រឹងប្រែងអនុវត្តគម្រោង សាងសង់ហេដ្ឋារចនាសម្ព័ន្ធផ្លូវចំនួន៣៨ខ្សែ នៅក្នុងទីក្រុងសៀមរាបនេះ ឲ្យទទួលបានជោគជ័យតាមការ គម្រោងទុក ដោយសហការយ៉ាងជិតស្និទ្ធជាមួយគណៈកម្មការអន្តរក្រសួង ព្រមទាំងអាជ្ញាធរដែនដី និងភាគីពាក់ព័ន្ធផងដែរ។
ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានផ្តល់អនុសាសន៍ដ៏មានសារសំខាន់ មួយចំនួនរួមមាន៖ ការស្នើឱ្យមានការពិនិត្យឱ្យបានលម្អិតលើលក្ខណៈបច្ចេកទេសសាងសង់, គោរពតាមប្លង់គោលប្រើប្រាស់ដីក្រុងសៀមរាប ចក្ខុវិស័យឆ្នាំ២០២៣ របស់គណៈកម្មាធិការរៀបចំដែនដី និងនគរូបនីកម្មថ្នាក់ជាតិ, ការសិក្សាឱ្យបានសព្វជ្រុងជ្រោយលើតម្រូវការ អភិវឌ្ឍន៍ហេដ្ឋារចនាសម្ព័ន្ធ ក្នុងក្រុងសៀមរាបទាំងមូលធ្វើជាផែនការមេ ការសាងសង់ផ្លូវដែលមានលក្ខណៈតភ្ជាប់ពីចំណុចចាប់ផ្តើមដល់ចំណុចគោលដៅនីមួយៗ, ការជ្រើសរើសប្រតិបត្តិករសម្រាប់ការសាងសង់ដែលមានបទពិសោធន៍ សម្រាប់ការអនុវត្តការងារសាងសង់ មានគ្រឿងចក្រគ្រប់គ្រាន់ និងមានទំនួលខុសត្រូវការងារខ្ពស់, ការសម្របសម្រួលឯកសារគម្រោង, ការគ្រប់គ្រងការដ
្ឋានសាងសង់ ដើម្បីបញ្ចៀសការកកស្ទះចរាចរណ៍, ការកំណត់រយៈពេលសាងសង់ពី១២ ទៅ ១៤ខែ និងការត្រៀមរៀបចំដើម្បីបើកការដ្ឋានជាផ្លូវការ នាពេលឆាប់ៗខាងមុខនេះ ជាដើម។
ឆ្លៀតក្នុងឱកាសនោះ ឯកឧត្តម ឧបនាយករដ្ឋមន្ត្រី ជា សុផារ៉ា បានគូសបញ្ជាក់ថា៖ គម្រោងសាងសង់ហេដ្ឋារចនាសម្ព័ន្ធផ្លូវចំនួន៣៨ខ្សែនេះគឺជាការបញ្ជាក់ឱ្យឃើញពីការខិតខំប្រឹងប្រែងពុះពារឧបសគ្គ របស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្តេចតេជោ នាយករដ្ឋមន្ត្រី ទោះបីជាកម្ពុជាកំពុងស្ថិតក្នុងស្ថានភាពប្រឈមនឹងជំងឺកូវីដ-១៩ យ៉ាងណាក៏ដោយ។
សម្ដេចពិជ័យសេនាឧបនាយករដ្ឋមន្ត្រី បានណែនាំឱ្យក្រុមការងារបច្ចេកទេសនៃ ក្រសួងទាំងពីរ ចុះពិនិត្យ សិក្សា និងធ្វើការវាយតម្លៃ បញ្ជាក់ឱ្យបានល្អិតល្អន់ លើស្ថានភាពជាក់ស្តែងផ្លូវទាំង ៣៨ខ្សែ ដែលបានស្នើឡើងនេះ ដើម្បីឈានទៅរកការ ឯកភាពគ្នា ក្នុងកម្រិតបច្ចេកទេសរួមមួយ ដែលអាចធានា នូវការសាងសង់ផ្លូវប្រកបដោយគុណភាពខ្ពស់ និងមាននិរន្តរភាពយូរអង្វែង។
អង្គប្រជុំបានសម្រេចឯកភាពគ្នាថា៖ ប្លង់នៃការសិក្សាលម្អិត និងផែនការនៃការអនុវត្តគម្រោងនេះ នឹងត្រូវបង្ហាញជូន ក្នុងកិច្ចប្រជុំ គណៈកម្មការអន្ដរក្រសួងដើម្បីសិក្សា និងអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវចំនួន ៣៨ខ្សែ ដែលគ្រោងនឹងធ្វើឡើង នៅក្រុងសៀមរាប នាថ្ងៃទី២៣ ខែកញ្ញា ខាងមុខនេះ៕
