[Kampuchea Thmey] - ការអនុវត្តច្បាប់ចរាចរណ៍ផ្លូវគោកថ្ងៃទី៨កញ្ញា រកឃើញមធ្យោបាយល្មើស ១ ២៤៧ គ្រឿង
2020-09-09
Go to the website published Kampuchea Thmey
ភ្នំពេញ ៖ ការរឹតបន្ដឹងអនុវត្តច្បាប់ ស្ដីពីច្បាប់ចរាចរណ៍ផ្លូវគោក ចាប់ពីវេលាម៉ោង១៤និង០០នាទី ថ្ងៃទី៧ ខែកញ្ញា ដល់វេលាម៉ោង១៤និង០០នាទី ថ្ងៃទី៨ ខែកញ្ញា ឆ្នាំ២០២០ សមត្ថកិច្ចនគរបាលចរាចរណ៍រកឃើញមធ្យោបាយល្មើសប្រមាណ ១ ២៤៧ គ្រឿង។នេះបើយោងតាមរបាយការណ៍ដែលកាសែតកម្ពុជាថ្មីទទួលបានពីនាយកដ្ឋាននគរបាល ចរាចរណ៍ និង សណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ។
ក្នុងចំណោមមធ្យោបាយដែលល្មើសច្បាប់ចរាចរណ៍ទាំង ១ ២៤៧ គ្រឿងនេះ ក្នុងនោះមានម៉ូតូ ចំនួន៥០៦គ្រឿង និងយានយន្តផ្សេងៗទៀត រួមទាំងរថយន្ត៧៤១គ្រឿង។ ដោយឡែក សម្រាប់រយៈពេល៨ថ្ងៃ គិតចាប់ពីថ្ងៃទី១ ដល់ថ្ងៃទី៨ ខែកញ្ញា ឆ្នាំ២០២០ លទ្ធផល នៃការរឹតបន្ដឹងអនុវត្តច្បាប់ ស្ដីពីច្បាប់ចរាចរណ៍ផ្លូវគោក សមត្ថកិច្ចនគរបាលចរាចរណ៍រកឃើញមធ្យោបាយល្មើសច្បាប់ សរុបប្រមាណ ១១ ៦៦០ គ្រឿងនេះ ក្នុងនោះមាន ម៉ូតូ ចំនួន ៤ ៨៥០ គ្រឿង និងយានយន្តផ្សេងៗទៀត រួមទាំងរថយន្តសរុបចំនួន ៦ ៨១០ គ្រឿង។
សូមជម្រាបជូនឲ្យដឹងថា ចាប់ពីថ្ងៃសុក្រ ១០កើត ខែពិសាខ ឆ្នាំជូត ទោស័ក ព.ស ២៥៦៣ ត្រូវនឹងថ្ងៃទី១ ខែឧសភា ឆ្នាំ២០២០ តទៅ កម្លាំងនគរបាលចរាចរណ៍ នឹងអនុវត្តការពិន័យអន្តរការណ៍ ចំពោះអំពើល្មើសនឹងច្បាប់ ស្ដីពីចរាចរណ៍ផ្លូវគោក តាមអនុក្រឹត្យលេខ ៣៩ អនក្រ .ប.ក ចុះថ្ងៃទី១៧ ខែមីនា ឆ្នាំ២០២០ ស្ដីពី ការកែសម្រួលអនុក្រឹត្យលេខ ៤៤ អនក្រ .ប.ក ចុះថ្ងៃទី២១ ខែមីនា ឆ្នាំ២០១៧ ស្តីពី ការពិន័យអន្តរការណ៍ចំពោះអំពើល្មើសនឹងច្បាប់ ស្តីពី ចរាចរណ៍ផ្លូវគោក ដែលបានដំឡើងកម្រិតទឹកប្រាក់ពិន័យក្នុងចំនួនពី ៣ ( បី ) ទៅ ៥ ( ប្រាំ ) ដង។
សមត្ថកិច្ចនគរបាលចរាចរណ៍ សូមអំពាវនាវដល់ប្រជាពលរដ្ឋដែលប្រើប្រាស់ផ្លូវថ្នល់ទាំងអស់ ត្រូវចូលរួមគោរពច្បាប់ចរាចរណ៍ផ្លូវគោក ដើម្បីការពារអាយុជីវិតខ្លួនឯង និងអ្នកដទៃ ប្រកបដោយឆន្ទៈភ្ញាក់រលឹកខ្ពស់ សំដៅលើកស្ទួយកិត្តិយស សេចក្ដីថ្លៃថ្នូរ និងសណ្ដាប់ធ្នាប់សង្គមនៅព្រះរាជាណាចក្រកម្ពុជា៕
