រដ្ឋមន្រ្ដីក្រសួងសាធារណការ និងដឹកជញ្ជូន ជំរុញឱ្យនគរបាល ចុះបង្ក្រាបទីតាំងកែច្នៃរថយន្ដ ខុសបច្ចេកទេស ដើម្បីកាត់បន្ថយអត្រាគ្រោះថ្នាក់ចរាចរណ៍ឱ្យមកនៅកម្រិតទាប។ ក្នុងពិធីជួបសំណេះសំណាលជាមួយ នាយនគរបាលជាន់ខ្ពស់ នៃអគ្គស្នងការដ្ឋាននគរបាលជាតិ នាព្រឹកថ្ងៃទី០៨ ខែកញ្ញានេះ ឯកឧត្តមទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូនបានណែនាំឱ្យសមត្ថកិច្ចបង្កើនសកម្មភាពដោយសហការជាមួយក្រសួងសាធារណការ ដើម្បីបញ្ឈប់ការកែច្នៃរថយន្តខុសបច្ចេកទេសគ្រប់ប្រភេទឱ្យមានប្រសិទ្ធភាព។ ឯកឧត្តមទេសរដ្ឋមន្ដ្រីបញ្ជាក់ថា កន្លែងយានដ្ឋានកែច្នៃរថយន្ដខុសច្បាប់ទាំងនេះ ជាដើមចមដែលនាំឱ្យមានគ្រោះថ្នាក់ចរាចរណ៍ ។ ក្រសួងសាធារណការ និងដឹកជញ្ជូន បានសហការជាមួយស្ថាប័នពាក់ព័ន្ធ ចាត់វិធានការតឹងរ៉ឹង ក្នុងការលុបបំបាត់យានដ្ឋានកែច្នៃយានយន្តខុសច្បាប់និងយានយន្តដឹកជញ្ជូនលើសទម្ងន់កម្រិតកំណត់ ដែលជាមូលហេតុចម្បងធ្វើឱ្យមានគ្រោះថ្នាក់ចរាចរណ៍និងការខូចខាតផ្លូវមុនអាយុកាល។កាលពីពេលថ្មីៗនេះមន្ត្រីជំនាញក្រសួងសាធារណការ និងដឹកជញ្ជូនបានបើកកិច្ចប្រជុំមួយជាមួយមន្ត្រីពាក់ព័ន្ធ ដើម្បីពិភាក្សាពីវិធានការទប់ស្កាត់យានដ្ឋានជួសជុលនិងកែច្នៃ និងយានដ្ឋានដំឡើងយានយន្តខុសច្បាប់ ការត្រួតពិនិត្យយានយន្តកែច្នៃខុសលក្ខណៈបច្ចេកទេស និងការងារមួយចំនួនទៀត។ ជាមួយគ្នានោះ ឯកឧត្តមរដ្ឋមន្ត្រី ស៊ុន ចាន់ថុល បានចាត់ឱ្យមន្ត្រីជំនាញធ្វើរបាយការណ៍អំពីស្ថានភាពនៃយានដ្ឋានគ្មានច្បាប់អនុញ្ញាត យានដ្ឋានមានច្បាប់អនុញ្ញាត និងយានដ្ឋានមានច្បាប់អនុញ្ញាតតែកែច្នៃយានយន្តខុសលក្ខណៈបច្ចេកទេស ជូនក្រសួងមហាផ្ទៃនិងអាជ្ញាធរដែនដី ដើម្បីចាត់ការតាមច្បាប់៕