ភ្នំពេញ៖ ថ្ងៃសុក្រ ២រោច ខែភទ្របទ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៤ ខែកញ្ញា ឆ្នាំ២០២០ ឯកឧត្តម សូរ វិចទ័រ រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិនិត្យលើរបាយការណ៍បណ្តោះអាសន្ន និងជ្រើសរើសខ្សែផ្លូវនៃការសិក្សា គម្រោងសាងសង់ផ្លូវវាងទីក្រុងសៀមរាប ក្នុងក្របខណ្ឌEDCF Loan ដោយមានការអញ្ជើញចូលរួមពីភាគី និងស្ថាប័នពាក់ព័ន្ធ។ នេះគឺជាកិច្ចប្រជុំថ្នាក់បច្ចេកទេសរៀបចំឡើង ក្នុងគោលបំណងស្ដាប់ការធ្វើបទបង្ហាញរបស់ក្រុមហ៊ុនទីប្រឹក្សាបច្ចេកទេសអំពីលទ្ធផលនៃការសិក្សាលើគម្រោងសាងសង់ផ្លូវក្រវាត់ក្រុងសៀមរាប ក៏ដូចជាការប្រមូលធាតុចូលបន្ថែមទៀតពីភាគី និងស្ថាប័នពាក់ព័ន្ធ សំដៅឈានទៅធ្វើរបាយការណ៍បញ្ចប់នៃគម្រោងនេះ មុនពេលដាក់ជូនថ្នាក់ដឹកនាំសម្រេច។ តាមយោបល់និងរបាយការណ៍បណ្ដោះអាសន្នរបស់ក្រុមហ៊ុនទីប្រឹក្សាបច្ចេកទេសបានឱ្យដឹងថា ការសាងសង់ផ្លូវក្រវាត់ក្រុងសៀមរាបមានបីជម្រើស និងគួរសាងសង់ជាផ្លូវមាន៤គន្លង ដើម្បីឆ្លើយតបទៅនឹងទំហំចរាចរណ៍និងកំណើនសេដ្ឋកិច្ចនាពេលបច្ចុប្បន្ននិងអនាគត។ ឯកឧត្ដមរដ្ឋលេខាធិការបានឱ្យដឹងថា ជាលទ្ធផល អង្គប្រជុំបានឯកភាពយកការសាងសង់ផ្លូវវាងក្រុងជម្រើសទី១ ដោយហេតុថាជម្រើសនេះមិនប៉ះពាល់ដល់តំបន់អភិរក្សរបស់អជ្ញាធរអប្សរា អាជ្ញាធរទន្លេសាប និងមានផលប៉ះពាល់ទ្រព្យសម្បត្តិរបស់ប្រជាពលរដ្ឋតិច ទោះបីជាផ្លូវវាងក្រុងជម្រើសទី១នេះឆ្ងាយពីទីក្រុងបន្តិចក្ដី។ ទោះជាយ៉ាងនេះក្ដី ឯកឧត្ដមរដ្ឋលេខាធិការបានបន្តថា លទ្ធផលនៃកិច្ចប្រជុំ នេះមិនមែនជាការសម្រេចចុងក្រោយឡើយ ដោយសារគម្រោងនេះត្រូវសិក្សាឱ្យបានលម្អិតបន្ថែមទៀត ដោយផ្ដោតជាសំខាន់ទៅលើផលប៉ះពាល់សង្គម សេដ្ឋកិច្ច និងថវិកាសម្រាប់សាងសង់។ ជាមួយគ្នានោះផងដែរឯកឧត្ដមរដ្ឋលេខាធិការ ក្នុងនាមឯកឧត្ដមទេសរដ្ឋមន្ត្រី បានជម្រាបជូនអង្គប្រជុំអំពីគម្រោងធ្វើឱ្យប្រសើរឡើងវិញផ្លូវទាំង៣៨ខ្សែនៅក្នុងទីក្រុងសៀមរាប ហើយគម្រោងនេះទទួលបានគោលការណ៍ឯកភាពពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងកិច្ចប្រជុំគណៈរដ្ឋមន្ត្រីនាព្រឹកនេះ។ ឯកឧត្ដមរដ្ឋលេខាធិការបានសម្ដែងនូវការកោតសរសើរ និងថ្លែងអំណរគុណចំពោះការធ្វើបទបង្ហាញរបស់ក្រុមហ៊ុនទីប្រឹក្សាបច្ចេកទេស និងស្ថាប័នពាក់ព័ន្ធទាំងអស់ដែលបានផ្ដល់ធាតុចូលយ៉ាងសំខាន់ និងមានតម្លៃបំផុតដើម្បីឱ្យការរៀបចំរបាយការណ៍សាងសង់ផ្លូវវាងក្រុងសៀមរាបនេះកាន់តែមានលក្ខណៈគ្រប់ជ្រុងជ្រោយ និងបានសំណូមពរឱ្យភាគី និងស្ថាប័នពាក់ព័ន្ធបន្តសហការនិងសិក្សាបន្ថែមទៀតដើម្បីឈានទៅបញ្ចប់របាយការណ៍ចុងក្រោយនាពេលឆាប់ៗនេះ មុនដាក់ជូនថ្នាក់ដឹកនាំសម្រេច៕