ថ្ងៃសុក្រ ១០កើត ខែភទ្របទ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៨ ខែសីហា ឆ្នាំ២០២០ នៅទីស្ដីការក្រសួង ឯកឧត្ដម ឡេង ធនយុទ្ធា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួងចូលរួមក្នុងសន្និសីទការតភ្ជាប់អាស៊ានលើកទី ១១ តាមរយៈវីដេអូ ពីចម្ងាយ ស្តីពីការពង្រឹងសាមគ្គីភាព និងការតភ្ជាប់ហេដ្ឋារចនាសម្ព័ន្ធ និងការអភិវឌ្ឍធនធានមនុស្ស។ សន្និសីទនេះដឹកនាំដោយឯកឧត្ដម Tran Duc Binh ប្រធានគណៈកម្មាធិការសម្របសម្រួល ការភ្ជាប់ អាស៊ាន (Chair of the ASEAN Connectivity Coordinating Committee) ដោយមានការចូល រួមពីមន្ត្រីជំនាញនៃប្រទេសសមាជិកអាស៊ានទាំងអស់។ សន្និសីទនេះផ្តោតជាសំខាន់លើមធ្យោបាយនៃការពង្រឹងហេដ្ឋារចនាសម្ព័ន្ធក្នុងតំបន់អាស៊ានឱ្យកាន់តែ មាននិរន្តរភាព ការអនុម័តលើការប្រើប្រាស់ប្រព័ន្ធឌីជីថលដើម្បីឆ្លើយតបទៅនឹងមេរោគកូវីដ-១៩ និងមធ្យោបាយដែលធ្វើ ឱ្យអ្នកជំនាន់ក្រោយរបស់អាស៊ានអាចត្រៀមខ្លួនបានល្អក្នុងការឆ្លើយតបទៅនឹង វិបត្តិនានាតាមរយៈការវិនិយោគលើធនធានមនុស្ស។ សូមជម្រាបជូនថា៖ សន្និសីទស្ដីពីការតភ្ជាប់អាស៊ាននេះ គឺជាព្រឹត្តិការណ៍ប្រចាំឆ្នាំដែលចាប់ផ្ដើមតាំងពី ឆ្នាំ២០១០ ដោយសារបញ្ហាមេរោគកូវីដ-១៩ សន្និសីទលើកទី១១នេះត្រូវធ្វើឡើងតាមរយៈវីដេអូពីចម្ងាយ ដើម្បីបន្តវេទិការបស់ខ្លួនសម្រាប់ភាគីពាក់ព័ន្ធដើម្បីអនុវត្តផែនការមេតភ្ជាប់អាស៊ានឆ្នាំ២០២៥ និង កំណត់វិស័យសហប្រតិបត្តិការដែលមានសក្ដានុពលរបស់ខ្លួនសំដៅឱ្យការអនុវត្តផែនការមេតភ្ជាប់ អាស៊ានឆ្នាំ២០២៥កាន់តែប្រសើរឡើង៕