[Kampuchea Thmey] - គយនឹងដាក់លក់ដេញថ្លៃជាសាធារណៈ ប្រសិនបើម្ចាស់យានយន្តនិងម្ចាស់ទំនិញគេចពន្ធ មិនព្រមចូលខ្លួន មកបង់ពន្ធនិងពិន័យតាមច្បាប់
2020-08-25
Go to the website published Kampuchea Thmey
ភ្នំពេញ ៖ មន្ត្រីអគ្គនាយកដ្ឋានគយ និងរដ្ឋាករកម្ពុជាបានប្រាប់ឲ្យដឹងថា ប្រសិនបើម្ចាស់យានយន្តនិងម្ចាស់ទំនិញគេចពន្ធ មិនព្រមចូលខ្លួនមកបង់ពន្ធនិងពិន័យតាមច្បាប់ទេនោះ រដ្ឋបាលគយនឹងដាក់លក់ដេញថ្លៃរថយន្ត និងទំនិញទាំងនោះជាសាធារណៈ តាមនីតិវិធីជាធរមាន ដើម្បីប្រមូលថវិកាចូលរដ្ឋ ខណៈកាលបរិច្ឆេទនឹងត្រូវផុតកំណត់នៅដើមខែកញ្ញា ឆ្នាំ២០២០ខាងមុខនេះហើយ។
អគ្គនាយកដ្ឋានគយនិងរដ្ឋាករកម្ពុជា បានជូនដំណឹងដល់ម្ចាស់យានយន្ត និងម្ចាស់ទំនិញគេចពន្ធ ដែលត្រូវបានបង្ក្រាបនិងរក្សាទុកបណ្ដោះអាសន្ន ដោយរដ្ឋបាលគយឲ្យចូលខ្លួនមកបំពេញកាតព្វកិច្ចពន្ធអាករនិងពិន័យ តាមច្បាប់និងបទប្បញ្ញត្តិជាធរមានដោយទុករយៈពេល៦០ថ្ងៃ ដោយចាប់ពីថ្ងៃទី៨ខែកក្កដា ឆ្នាំ២០២០។
ក្នុងនោះអគ្គនាយកដ្ឋានគយនិងរដ្ឋាករកម្ពុជា បានណែនាំចំពោះ រថយន្តចង្កូតស្ដាំម្ចាស់រថយន្ត ត្រូវកក់ប្រាក់ចំនួន៧០% នៃប្រាក់ពន្ធអាករនិងពិន័យ ដែលត្រូវបង់និងយករថយន្តទៅកែចង្កូតពីស្ដាំមកឆ្វេងនៅយានដ្ឋាន ដែលទទួលស្គាល់ដោយស្ថាប័នមានសមត្ថកិច្ច។ ក្នុងរយៈពេលមិនលើសពី៣០ថ្ងៃម្ចាស់រថយន្ត ត្រូវយករថយន្តដែលបានកែរួចមកបង្ហាញមន្ត្រីគយនិងរដ្ឋាករមានសមត្ថកិច្ចបង់ប្រាក់ពន្ធអាករនិងពិន័យបន្ថែម ៣០%ទៀត ដើម្បីទទួលបានបង្កាន់ដៃពន្ធយានយន្ត សម្រាប់ប្រើប្រាស់ក្នុងការចុះបញ្ជីយានយន្តស្របតាមច្បាប់និងបទប្បញ្ញត្តិជាធរមាន។
មន្ត្រីគយដដែលនោះ បានបន្តថា ចាប់តាំងពីជួនដំណឹងមករហូតមកដល់ពេលនេះ មានរថយន្តចង្កូតស្តាំនិងម្ចាស់ទំនិញមួយចំនួន បានចូលខ្លួនមកបង់ពន្ធនិងពិន័យតាមច្បាប់ តែនៅមានមួយចំនួនទៀត នៅមិនទាន់ចូលខ្លួនមកដោះស្រាយនៅឡើយទេ។
មន្ត្រីខាងលើបានបញ្ជាក់ថា«ក្នុងករណីម្ចាស់ខកខាន មិនបានចូលខ្លួនបំពេញកាតព្វកិច្ចកិច្ចតាមលក្ខខណ្ឌនិងពេលវេលា ដែលបានកំណត់ទេនោះយានយន្តនិងទំនិញទាំងនោះ នឹងត្រូវចាត់ទុកជាទំនិញគ្មានការទាមទារ ហើយអគ្គនាយកដ្ឋានគយនិងរដ្ឋាករកម្ពុជានឹងប្រកាសដាក់លក់ដោយដេញថ្លៃជាសាធារណៈ តាមនីតិវិធីជាធរមាន ដើម្បីប្រមូលថវិកាចូលរដ្ឋ»៕
អត្ថបទ៖ សំអឿន
