[Kampuchea Thmey] - សមត្ថកិច្ចខណ្ឌដូនពេញ បង្ក្រាបបានមុខសញ្ញាលួចស្លាកលេខរថយន្ត និងបន្លំឯកសារសាធារណៈបានចំនួន០៦នាក់
2020-08-25
Go to the website published Kampuchea Thmey
ភ្នំពេញ ៖ នគរបាលខណ្ឌដូនពេញ បានបង្ហាញមុខក្រុមជនសង្ស័យចំនួន០៦នាក់ កាលពីល្ងាចថ្ងៃទី២៤ ខែសីហា ឆ្នាំ២០២០ ដែលត្រូវបានចាប់បង្ក្រាបក្នុងករណីក្លែងបន្លំឯកសារសាធារណៈ និងលួចស្លាកលេខរថយន្ត ក្រោយពីម្ចាស់ប្រទះឃើញស្លាកលេខរថយន្តរបស់ខ្លួន ដែលបាត់នោះ កំពុងពាក់ប្រើប្រាស់នៅរថយន្តឡិចស៊ីសស៊េរីទំនើបទៅវិញនោះ។
នគរបាលខណ្ឌដូនពេញ បានបញ្ជាក់ថា ក្រុមជនសង្ស័យ ត្រូវបានឃាត់ខ្លួន ក្នុងករណីលួច (ស្លាកលេខរថយន្តម៉ាកព្រូសពាក់ស្លាកលេខPP2AY-9021) និងក្លែងបន្លំឯកសារសាធារណៈ និងសមគំនិតទទួលផលចោរកម្ម។
ជាក់ស្តែងកាលពីថ្ងៃទី២១ ខែសីហា ឆ្នាំ២០២០ វេលាម៉ោង១០និង៣០នាទី កម្លាំងប៉ុស្តិ៍នគរបាលរដ្ឋបាលបឹងរាំង ខណ្ឌដូនពេញ បានទទួលដំណឹងពីជនរងគ្រោះ ដែលបានរកឃើញស្លាកលេខរថយន្តរបស់ខ្លួនស្លាកលេខ 2AY-9021 ដែលខ្លួនបានបាត់ នោះកំពុងពាក់នៅលើរថយន្តផ្សេងម៉ាក Lexus RX400H ពណ៌ស កាលពីថ្ងៃទី០៨ ខែកក្កដា ឆ្នាំ២០២០ វេលាម៉ោង២០និង៣០នាទីភ្លាមនោះ កម្លាំងប៉ុស្តិ៍នគរបាលរដ្ឋបាលបឹងរាំង បានចុះសហការណ៍ជាមួយកម្លាំងប៉ុស្តិ៍នគរបាលរដ្ឋបាលអូរឫស្សីទី៤ ចុះទៅដល់ចំណុចផ្លូវលេខ១០៧ សង្កាត់អូរឫស្សីទី៤ ខណ្ឌ៧មករា រាជធានីភ្នំពេញ កម្លាំងយើងក៏បានធ្វើការឃាត់ខ្លួនជនសង្ស័យចំនួន០១នាក់ បញ្ជូនមកកាន់អធិការដ្ឋាននគរបាលខណ្ឌដូនពេញ ដើម្បីសាកសួរបន្ត រហូតឈានដល់ការស្រាវជ្រាវបន្តចាប់ខ្លួនជនសង្ស័យចំនួន០១នាក់ទៀត ជាអ្នកជូនទៅទិញរថយន្ត(អ្នកគក់ជេរ)។
សមត្ថកិច្ចបន្តថា ជនសង្ស័យឃាត់ខ្លួននោះរួមមាន ១. ឈ្មោះ ឆេង ភិរម្យ ភេទប្រុស អាយុ៥៤ឆ្នាំជនជាតិខ្មែរ មុខរបរមន្ត្រីរាជការ (ម្ចាស់រថយន្ត Luxue Rx 400H ពាក់ស្លាកលេខភ្នំពេញ 2AY-9021(គ្មានសារធាតុញៀន) ២. ឈ្មោះ ផុន រ័ត្ននា ភេទប្រុស អាយុ៣៨ឆ្នាំ ជនជាតិខ្មែរ មុខរបរអ្នកគក់ជេររថយន្ត។ វត្ថុតាងដកហូតរួមមាន៖ ១. រថយន្តម៉ាក Leuxe Rx4០០H ពណ៌ស ពាក់ស្លាកលេខភ្នំពេញ 2AY-9021 (គ្មានសារធាតុ)។ លុះដល់ថ្ងៃទី២២ ខែសីហា ឆ្នាំ២០២០ វេលាម៉ោង១៧និង០០នាទី កម្លាំងសមត្ថកិច្ចយើងបានបើកការស្រាវជ្រាវឈានដល់ការឃាត់ខ្លួនជនសង្ស័យចំនួន០២នាក់បន្ថែមទៀត នៅចំណុចក្រោយហាងកាហ្វេអាម៉ាហ្សូន ផ្លូវលេខ១៦៩ ភូមិ៤ សង្កាត់ស្រះចក ខណ្ឌដូនពេញ ជនសង្ស័យទាំង០២នាក់ មានឈ្មោះដូចខាងក្រោម៖ ៣. ឈ្មោះ ខាត់ វណ្ណៈ ភេទប្រុស អាយុ២៨ឆ្នាំ ជនជាតិខ្មែរ ស្នាក់នៅផ្ទះជួលបុរីកីឡា សង្កាត់វាលវង្ស ខណ្ឌ៧មករា(គ្មានសារធាតុញៀន) ៤. ឈ្មោះ ពៅ សេដ្ឋារ័ត្ន ភេទប្រុស អាយុ២៦ឆ្នាំ ជនជាតិខ្មែរ ស្នាក់នៅបុរីពិភពថ្មី ផ្ទះលេខA៣៩ផ្លូវលេខ៨ សង្កាត់ក្រាំងធ្នង់ ខណ្ឌសែខសុខ(គ្មានសារធាតុញៀន)។ សម្ភារៈដកហូតរួមមាន៖ ១. រថយន្តម៉ាក Luxus ពណ៌ស ចំនួន០១គ្រឿង គ្មានស្លាកលេខ ២. រថយន្តម៉ាក TOYOTA HIGHLANDER ពណ៌ទឹកប្រាក់ ពាក់ស្លាកលេខភ្នំពេញ 2AN-6778 ចំនួន០១គ្រឿង ៣. ស្លាកលេខសម្គាល់យានយន្ត ភ្នំពេញ 2BE-4015 ចំនួន០១គូរ (មិនប្រក្រតី) ៤. ប័ណ្ណសម្គាល់យាន្ត ចំនួន០៣សន្លឹក ៥. សន្លឹកបង់ពន្ធប្រចាំឆ្នាំ ចំនួន០១សន្លឹក។
សមត្ថកិច្ចបន្តថា ក្រោយពីប្រើប្រាស់វិធានការជំនាញយកចម្លើយមកដល់ថ្ងៃទី២៣ ខែសីហា ឆ្នាំ២០២០ វេលាម៉ោង១៤និង០០នាទី កម្លាំងអធិការដ្ឋាន ប៉ុស្តិ៍បានបើកការស្រាវជ្រាវបន្តនិងបានធ្វើការឃាត់ខ្លួនជនសង្ស័យចំនួន០២នាក់ទៀត នៅចំណុចផ្លូវR6 ភូមិ៣ សង្កាត់ស្រះចកខណ្ឌដូនពេញ ជនសង្ស័យទាំង០២នាក់មានឈ្មោះដូចខាងក្រោម៖ ៥. ឈ្មោះ រ៉ា ជាក់ ភេទប្រុស អាយុ១៩ឆ្នាំ ជនជាតិខ្មែរ ស្នាក់នៅផ្ទះជួល ភូមិម័រ សង្កាត់ដង្កោខណ្ឌដង្កោ មុខរបរលក់រថយន្ត(គ្មានសារធាតុញៀន) ៦. ឈ្មោះ ជួប វុត្ថា ភេទប្រុស អាយុ៣៣ឆ្នាំ ជនជាតិខ្មែរ ស្នាក់នៅ ស្រុកខ្សាច់កណ្តាល ខេត្តកណ្តាល មុខរបរលក់រថយន្ត(គ្មានសារធាតុញៀន)។ ត្រូវដកហូតវត្ថុតាងដកហូតរួមមាន៖ ១. រថយន្តម៉ាក Luxus ពណ៌ស ពាក់ស្លាកលេខខេមរភូមិន្ទ02 2-8441 ២. ស្លាកលេខរថយន្ត ភ្នំពេញ 2BG-4682(មិនប្រក្រតី) ៣. ម៉ាស៊ីនបាញ់ថ្នាំ បំពង់ខ្យល់ ៤. ទឹកថ្នាំពណ៌ខៀវ ស ចំនួន០២កំប៉ុង ៥. ថ្នាំបាញ់រលោងចំនួន០១កំប៉ុង ៦. កូនសោសម្រាប់ធ្វើស្លាកលេខកែច្នៃមួយចំនួន ៧. ម៉ាស៊ីនស្វានចំនួន០១គ្រឿង ៨. ម៉ាស៊ីនផ្លុំសក់ចំនួន០២គ្រឿង
សមត្ថកិច្ចបញ្ជាក់ទៀតថា ចំពោះមុខ អធិការដ្ឋានប៉ុស្តិ៍ កំពុងធ្វើការសាកសួរ ដើម្បីកសាងនីតិវិធីបញ្ជូនទៅសាលាដំបូងរាជធានីភ្នំពេញ៕
អត្ថបទ៖ រស្មី
