[168 News] - ដំណឹង!! នាវាចម្បាំងរុស្ស៊ីគ្រោងនឹងមកចូលចតនៅកំពង់ផែស្វយ័តក្រុងព្រះសីហនុ
2020-08-20
Go to the website published 168 News
សម្តេចពិជ័យសេនា ទៀ បាញ់ ឧបនាយករដ្ឋមន្ត្រីក្រសួងការពារជាតិបានមានប្រសាសន៍ប្រាប់រស្មីកម្ពុជា កាលពីថ្ងៃទី១៨ ខែសីហា នេះថា នាវាចម្បាំងសហព័ន្ធរុស្ស៊ីគ្រោងនឹងមកចូលចតនៅកំពង់ផែស្វយ័តក្រុងព្រះសីហនុ ខាងមុខនេះ ប៉ុន្តែនៅមិនទាន់កំណត់ថ្ងៃជាក់លាក់នៅឡើយទេ។ ដោយភាគីទាំងពីរកំពុងតែពិភាក្សាគ្នា។
សម្តេចពិជ័យសេនាបានមានប្រសាសន៍បញ្ជាក់ថា “ទាក់ទងនាវាចម្បាំងសហព័ន្ធរុស្ស៊ី មកកម្ពុជាគឺភាគីទាំងពីរកំពុងតែធ្វើការ មិនទាន់កំណត់ថ្ងៃជាក់លាក់នៅឡើយទេ គេកំពុងតែធ្វើការ ព្រោះប្រទេសទាំងពីរ គឺក៏ត្រូវប្រុងប្រយ័ត្នដែរ រឿងបញ្ហាមួយចចំនួនជាពិសេសរឿងវីរុសកូវីដ១៩ ហើយកំពុងតែពិភាក្សាឯកភាពគ្នារកពេលវេលាសមស្របណាមួយ”។
ទាក់ទងនាវាចម្បាំងសហព័ន្ធរុស្ស៊ី គ្រោងនឹងមកចូលចតនៅកំពង់ផែស្វយ័តក្រុងព្រះសីហនុកាលពីថ្ងៃទី១៣ ខែសីហា ឆ្នាំ២០២០ នាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិ បានដឹកនាំកិច្ចប្រជុំដើម្បីពិភាក្សាទៅលើខ្លឹមសារ និងមាត្រាមួយចំនួន នៃកិច្ចព្រមព្រៀងស្តីពីនីតិវិធីសម្រាប់នាវាចម្បាំងសហព័ន្ធរុស្ស៊ី ចូលចតនៅកំពង់ផែស្វយ័តក្រុងព្រះសីហនុ។
គួរបញ្ជាក់ថា គិតចាប់ពីឆ្នាំ២០១១ រហូតមកដល់ត្រឹមឆ្នាំ២០១៨ នាវាកងទ័ពជើងទឹកសហព័ន្ធរុស្ស៊ីបានចូលចតនៅកំពង់ផែស្វយ័តក្រុងព្រះសីហនុ ចំនួន៤លើករួចមកហើយ៕
