ការបើកកិច្ចប្រជុំការងារប្រចាំខែកក្កដារបស់អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ ក្រោមអធិបតីភាព ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន នាថ្ងៃអង្គារ ១៥កើត ខែស្រាពណ៍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៤ ខែសីហា ឆ្នាំ២០២០ វេលាម៉ោង ៨:៣០នាទីព្រឹក នៅសាលប្រជុំធំ នៃទីស្តីការក្រសួងសាធារណការ និងដឹកជញ្ជូន មានបើកកិច្ចប្រជុំការងារប្រចាំខែកក្កដារបស់អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ ក្រោមអធិបតីភាព ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន។ កិច្ចប្រជុំនេះក៏មានការអញ្ជើញចូលរួមពីឯកឧត្តម ម៉ក់ ស៊ីដេត លោក-លោកស្រី អគ្គនាយករង ប្រធាន-អនុប្រធាននាយកដ្ឋាន ប្រធាន-អនុប្រធានការិយាល័យ និងមន្ត្រីពាក់ព័ន្ធនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ។ បន្ទាប់ពីបានស្តាប់នូវការធ្វើបទបង្ហាញរបស់លោកប្រធាននាយកដ្ឋានហេដ្ឋារចនាសម្ព័ន្ធផ្លូវទឹក និងសំណង់កំពង់ផែ ព្រមទាំងលោកប្រធាននាយកដ្ឋាននាវាជំនួញសមុទ្ររួចមក ឯកឧត្តមប្រធានអង្គប្រជុំក៏បានផ្ដល់នូវអនុសាសន៍មួយចំនួនសម្រាប់អគ្គនាយកដ្ឋានដូចតទៅនេះ ៖ -បន្តជំរុញបញ្ចប់ការផលិតផែនទីនាវាចរណ៍អេឡិចត្រូនិក ENC ដោយស្នើឲ្យអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ សិក្សាអំពីសារៈសំខាន់ និងផលប្រយោជន៍នានាក្នុងការចូលជាសមាជិក IALA IHO និង IMSO ដើម្បីដាក់ជូន ឯកឧត្តមទេសរដ្ឋមន្រ្តី ពិនិត្យសម្រេច និងគ្រប់នាយកដ្ឋានកំណត់អាទិភាពការងារ ពន្លឿនការរៀបចំលិខិតបទដ្ឋាន គតិយុត្ត ។ -ជាមួយនោះផងដែរ ឯកឧត្តម ស្នើឲ្យអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ សហការជាមួយ រដ្ឋបាលជលផល លើការងារចុះបញ្ជីនាវានេសាទ ដើម្បីលុបកាតក្រហមចេញពី សហគមន៍អឺរ៉ុប (EU) លើការងារប្រយុទ្ធប្រឆាំងនឹងការនេសាទខុសច្បាប់ ការនេសាទគ្មានរបាយការណ៍ និងការនេសាទគ្មានការអនុញ្ញាត (IUU) ព្រមទាំងសិក្សាស្រាវជ្រាវ អំពីស្ថិតិកំពង់ផែ និងចុះពិនិត្យទីតាំងកំពង់ផែទាំងនោះឲ្យបានច្បាស់លាស់ រួមមាន សកម្មភាពអាជីវកម្មជាក់ស្តែងរបស់កំពង់ផែ ឋបនីយភណ្ឌផែ និងជម្រៅទឹក។ល។ ជាពិសេសគឺត្រូវសហការជាមួយកំពង់ផែឯកជន ដើម្បីពង្រឹងការងារលើការស្នើសុំលិខិត អនុញ្ញាតនាវាចូលនៅតាមកំពង់ផែនៃព្រះរាជាណាចក្រកម្ពុជា។ -ចំពោះគម្រោង Port EDI ត្រូវផ្អាកជាបណ្តោះអាសន្នដោយសារបញ្ហាជំងឺកូវីដ១៩ (COVID-19) ដូច្នេះគម្រោងនេះអាចនឹងត្រូវពន្យារពេល ទន្ទឹមនោះ ឯកឧត្តម ស្នើឲ្យអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ សហការជាមួយ កំពង់ផែស្វយ័តទាំង២ លើការផ្តល់ព័ត៌មានការចូល-ចេញរបស់នាវា ដើម្បីងាយស្រួល រាយការណ៍ជូនថ្នាក់ដឹកនាំក្រសួងបានទាន់ពេលវេលា។ -ស្នើឲ្យមានវត្តមានតំណាងមន្ទីរសាធារណការ និងដឹកជញ្ជូនរាជធានី-ខេត្តដែលមានការពាក់ព័ន្ធនឹងផ្លូវទឹក ចូលរួមកិច្ចប្រជុំលើកក្រោយ ដើម្បីសហការផ្តល់ព័ត៌មាន និងពិភាក្សាលើបញ្ហាប្រឈមនានា ចំពោះGuide line សម្រាប់ Oil tanker ដែលបានរៀបចំរួចរាល់ ត្រូវអញ្ជើញក្រុមហ៊ុនដឹកជញ្ជូនធ្វើការត្រួតពិនិត្យលក្ខខណ្ឌរបស់យើង តើក្រុមហ៊ុនអាចទទួលយកបានរឺអត់ ដើម្បីក្រសួងរៀបចំជាសេចក្តីណែនាំជារួមមួយ។ -ការងារផ្តល់លិខិតអនុញ្ញាតឲ្យនាវាចូលនៅតាមកំពង់ផែនៃព្រះរាជាណាចក្រកម្ពុជា ត្រូវមានការត្រួតពិនិត្យ Check & Control ដើម្បីប្រសិទ្ធភាពការងារ និងពង្រឹងការងារនេះឲ្យបានម៉ត់ចត់អគ្គនាយកដ្ឋានត្រូវសហការជាមួយមន្ទីរសាធារណការនិងដឹកជញ្ជូនរាជធានី-ខេត្ត ប្រសិនបើនាវាណាមិនមានលិខិតអនុញ្ញាតឲ្យនាវាចូល នៅតាមកំពង់ផែទេ កំពង់ផែមិនត្រូវអនុញ្ញាតឲ្យនាវាចូលចតជាដាច់ខាត។ ដោយឡែក ចំពោះការស្នើសុំE/P ដែលធ្វើឡើងចំថ្ងៃឈប់សម្រាកគឺត្រូវបន្តឲ្យមាននិរន្តភាព ដូចថ្ងៃធ្វើការធម្មតា -ត្រូវស្នើសុំឧបករណ៍សម្រាប់បំពាក់ការគ្រប់គ្រងចលនារបស់នាវាដោយសិក្សា និងដាក់ចូលទៅក្នុងផែនការឆ្នាំរបស់អគ្គនាយកដ្ឋាន។